प्रदेश १ मा बाढी : विराटनगरको सुकुम्बासी वस्ती जलमग्न, दुई वटा पुल जोखिममा

A+ A A-

अविरल बर्षाका कारण प्रदेश १ का विभिन्न नदीहरूमा शनिबार बिहानैदेखि बाढी आएको छ । प्रदेश १ का झापा, मोरङ र सुनसरीका खोलाहरूमा बाढी आएको हो ।

जल तथा मौसम विज्ञान विभागले इलामा, झापा, मोरङ र सुनसरीका विभिन्न स्थानमा भएको अविरल वर्षाका कारण नदीमा पानीको वहाब अत्यधिक बढेको जनाएको । अझ थप वर्षा हुने सम्भावना रहेकाले थुप्रै बस्तीहरू जोखिममा परेका छन् ।

विभागका अनुसार झापाको मेची, बिरिङ, निन्दा कन्काई, मोरङको सिंघिया, रतुवा, मावा, बक्राहा, डाँस, चिसाङ, लोहन्द्रा, केशलीया, सुनसरीको बुढी, सेउतीलगायतका ठुला तथा विभिन्न साना तथा सहयक खोलाहरूमा पानीको सतह अत्यधिक बढेको छ ।

प्रहरीले प्रदेशका विभिन्न स्थानमा बाढीको जोखिम रहेको जनाएको छ । प्रदेश प्रहरी कार्यालय विराटनगरका प्रवक्ता प्रहरी उपरीक्षक नवीनराज राईले बाढी तथा डुवानले पुर्‍याउन सक्ने क्षतीलाई मध्यनजर गरी उच्च सतर्कता अपनाइएको बताए । खोलाको छेउछाउमा बसोबास गरिरहेकाहरूलाई सुरक्षित स्थानतर्फ सर्न आग्रह गरिएको उनको भनाइ छ ।

उनले बाढी, पहिरो र डुबानले पुर्‍याउने सम्भावित क्षतीलाई मध्यनजर गरी उद्धार तथा पुनर्स्थापनाका लागि नेपाल प्रहरी लगायतका सुरक्षा निकाय तयारी अवस्थामा रहेको जानकारी दिए । विभिन्न स्थानमा बाढी पसेपछि उद्धारको कार्यसमेत जारी रहेको प्रहरी उपरिक्षक राईले बताए ।

मोरङको रतुवामाई नगरपालिका- ३ चौकीघाटस्थित रतुवा खोलामाथिको पक्की पुल बाढीको जोखिममा परेको छ । बाढीले कटान सुरु गरेपछि झापा र मोरङलाई जोड्ने रतुवा खोलामाथिको पुल जोखिममा परेको हो ।

त्यस्तै रतुवामाईकै गिरि टोल र सुनवर्षी नगरपालिका जोड्ने झोलुङ्गे पुलसहित थुप्रै बस्ती डुबानको जोखिममा रहेको स्थानीयले बताएका छन् ।

विराटनगरको सिंघिया खोलामा पानीको वहाब बढेर सुकुम्बासी वस्ती डुबानमा परेको छ । वस्ती डुवानमा परेपछि स्थानीयलाई सुरक्षित स्थानमा सारिएको विराटनगर– ७ का वडाध्यक्ष मधुबाबु तिबारीले जानकारी दिए ।