धान रोप्ने खेत जस्तो झपडतल–बरडंगा सडक : मेयरको गुनासो- मैले भनेको ठेकेदारले टेरेन

धान रोप्ने खेत जस्तो झपडतल–बरडंगा सडक : मेयरको गुनासो- मैले भनेको ठेकेदारले टेरेन

A+ A A-

मोरङको सुनवर्षी नगरपालिका–७ स्थित झपडतल–बरडंगा सडक हिलाम्मे छ । बर्खा लागेसँगै हिलाम्मे भएको सडकमा सवारी साधन फस्ने गरेका छन् । पैदल हिँड्न पनि समस्या छ । सडकको अवस्था देखेर स्थानीय आजित छन् ।

यो सडक पूर्वमन्त्री तथा नेपाली कांग्रेसका नेता डा. मिनेन्द्र रिजालको निर्वाचन क्षेत्रमा पर्छ । त्यस्तै प्रदेश १ को सार्वजनिक लेखा समितिका सभापति शिवनारायण सिंह गनगाईको निर्वाचन क्षेत्र तथा आफ्नै गाउँ पनि यही हो । सुनवर्सी नगरपालिकाका मेयर कालीप्रसाद दासको गाउँ पनि यहीँ हो ।

सडकको स्तरोन्नती र मर्मत सम्भार नहुँदा सुनवर्षी नगरपालिका–७ स्थित झपडतल–बरडंगा सडक धान रोप्न लागिएको खेत जस्तो हुने स्थानीय बताउँछन् । बर्खाभरी हिँड्न समस्या हुन्छ ।

तीनै जना जनप्रतिनिधि (रिजाल, गनगाई र दास) नेपाली कांग्रेसबाट निर्वाचित हुन् । स्थानीयका अनुसार रिजाल हत्तपत्त आउँदैनन् । तर, गनगाई र मेयर दास भने बिहान बेलुकै यही सडक भएर हिँड्छन् ।

ठाउँ-ठाउँमा खाल्डा र धान रोप्न ठिक्क पारेको जस्तो सडकले जनप्रतिनिधिहरूलाई गिज्याइरहेको बताउँछन्, स्थानीय । सुनवर्षीका सडकहरूमध्ये झपडतल–बरडंगा मुख्य सडक हो ।

स्थानीय दिनेश राजवंशी यो सडक भएर आउजाउ गर्नु ठूलै जोखिम मोलेजस्तै लाग्ने बताउँछन् । ‘अहिले यो बाटोमा पैदलसमेत हिँड्न नसक्ने अवस्था छ । मोटरसाइकल, साइकल र अरु साधनहरू त झन् ओहरदोहर गर्नै सक्दैनन्,' उनी भन्छन्, ‘चुनाव जितेर गएपछि नेताहरू कानमा तेल हालेर सुतिरहेका छन् । नेताहरूको घर जाने बाटोको हालत त यस्तो छ भने अरुतिर के विकास भयो होला ?’

राजवंशीका यो यस वर्षको मात्र समस्या होइन । हरेक वर्षा वर्षायाममा यही नियती दोहोरिन्छ । सडकको मर्मत सम्भार नहुँदा बर्खा लागेसँगै समस्या सुरु हुन थाल्छ ।

स्थानीय महेन्द्र सिंहका अनुसार सडको अवस्थाबारेमा जनप्रतिनिधि जानकार नभएका होइनन् । बरु, उनीहरूले यसको स्तरोन्नतीमा भने चासो नदिएको सिंहको दाबी छ ।

सडकको दुरावस्थाले स्थानीयमा आक्रोश बढाउँदै गएको छ । कृषि उत्पादन बजारसम्म पुर्‍याउन समस्या छ । ढुवानी गर्ने सवारी साधन हिलोमा फस्ने गरेका छन् ।

स्थानीय नरेश सहनी कोही बिरामी भइहाले सडककै कारण अस्पताल पुर्‍याउन समस्या हुन्छ कि जस्तो लाग्ने गरेको बताउँछन् ।

‘बाटो एकदमै खराब भएर कोही साह्रै बिरामी परेर तत्काल अस्पताल लानु परे अस्पताल लैजान सक्ने अवस्था छैन,’ उनले भने, ‘बर्खा लागेपछि प्रत्येक वर्ष हाम्रो समस्या यही हो । धेरै वर्ष बितिसक्यो तर, सडक बनेन ।’

स्थानीय बर्तलाल राजवंशी दीर्घकालीन समाधान खोज्नुको साटो प्रत्येक वर्ष टालटुले काम मात्र हुँदै आएको बताउँछन् । सडकको मर्मतका नाममा माटो मात्र हाल्ने गरिएकाले समस्या बढेको उनको भनाइ छ ।

‘यहीँबाट जितेर गिरिजाबाबु प्रधानमन्त्री बन्नुभयो । आमोदप्रसाद उपाध्याय पनि यही क्षेत्रबाट जितेर मन्त्री बन्नुभयो,’ उनले भने, ‘गएको निर्वाचनमा पनि संघीय सांसदमा मिनेन्द्र रिजाल, प्रदेशमा शिनारायण सिंह र मेयरमा कालीप्रसाद दासले जित्नुभएको छ । तर, पनि यो सडक कहिल्यै बनेन । प्रत्येक वर्ष ग्राभेल हाल्नुपर्नेमा टालटुले काम मात्र हुन्छ ।’

प्रदेश सरकारको योजना अन्तर्गत यो सडक निर्माणको ठेक्का करिब डेढ वर्षअघि नै लागिसकेको छ । तर, ठेकेदार कम्पनीले गरेको ढिलासुस्तीका कारण समस्या समाधान भएको छैन ।

निर्माण कम्पनी निकिता कन्ट्रक्स प्रा.लिले बर्खा लागेपछि मात्र काम सुरु गरेको स्थानीय बताउँछन् । अघिल्लो आर्थिक वर्ष समाप्त भएयता काम नगरेको कम्पनीले अहिले फेरि आर्थिक वर्ष सकिन लागेपछि काम सुरु गरेको स्थानीयको भनाइ छ ।

अहिले सडकको केही ठाउँमा दुवैपट्टी पक्कि नाला निर्माणको काम भइरहेको छ । तीन वर्षमा निर्माण सक्ने गरी ठेक्का लिएको र अबको दुई वर्षमा साढे सात किलोमिटर सडक कालोपत्रे गरिसक्ने निर्माण कम्पनीको दाबी छ ।

ओहोरदोहोर गर्नका लागि सहज बनाउन बिग्रिएको ठाउँमा माटो र ग्राभेल हालेको निर्माण कम्पनीका सञ्चालक राजेशकुमार साहले दाबी गरे । उनले भने, ‘ढिलो गर्दा हामीलाई नै अप्ठेरो पर्ने हो । हामी सम्झौताअनुसार जसरी पनि काम सम्पन्न गर्छौँ । अब झण्डै दुई वर्षजति बाँकी छ त्यो अवधि भित्र सकिन्छ ।’

अहिले नाला र कल्भर्ट निर्माणको काम भइरहेको जानकारी दिँदै उनले बिग्रिएको सडक मर्मत गर्ने हाम्रो काम आफूहरूको नभएको बताए । 'हामीले मर्मतको भुक्तानी समेत पाउदैनौँ । तर, पनि स्थानीयको समस्या हेरेर केही ठाउँमा मर्मत गरिदिएका छौँ,’ उनले भने ।

सुनवर्षी नगरपालिका–७ का वडाध्यक्ष प्रकाश यादव ठेकेदार कम्पनीले सुस्त गतिमा निर्माण कार्य गरिरहेको बताउँछन् । नगरपालिकाले वडालाई सडक मर्मत गर्न नदिएको र नगरपालिकाले माटो मात्र हालेकाले हिलो भएको उनले बताए ।

‘ठेकेदार कम्पनीले सडक निर्माणमा ढिलासुस्ती गरिरहेकाले पटक-पटक सचेत गराएका छौँ । बिग्रिएको सडक हाम्रो वडाकै बजेटबाट मर्मत गर्छौँ भन्दा नगरपालिकाले आफैँ गर्छौँ भन्छ,’ उनले भने, ‘त्यसैले वडाबाट हामीले यो सडकका लागि केही गर्न नसकेका हौँ ।’

सुनवर्षी नगरपालिकाका मेयर कालीप्रसाद दास सडक निर्माणका लागि पटक-पटक ताकेता गर्दा पनि ठेकदार कम्पनीले अटेर गरेको बताउँछन् । ‘यो प्रदेश सरकारको योजना भएकाले ठेकेदारलाई सडकका लागि धेरै ताकेता गर्दा पनि अटेर गरिरहेको छ । मेरो र सार्वजनिक लेखा समितिका सभापति ज्यूको घर २ सय मिटर वरपर भएकाले उहाँलाई पनि ध्यानाकर्ष गराएको छु,’ उनले भने, ‘घर जाँदा आउँदा मेरो आफ्नै गाडी पनि फस्छ । ठेकेदारले एकदमै अटेरी गर्दैछ ।’

प्रकाशित मिति: शनिबार, असार १९, २०७८ १०:१५