ओली–नेपालकाे अडानले फुकेन एमाले कलहकाे गाँठो

A+ A A-

एमालेलाई एकता प्रक्रियामा देखा परेको गाँठो झन् झन् कस्सिँदै गएको छ । केन्द्रीय कमिटी बैठकमार्फत अध्यक्ष केपी शर्मा ओलीले दुई दिनभित्र शेरबहादुर देउवालाई प्रधानमन्त्री बनाउन परमादेशको माग गर्दै गरेको हस्ताक्षर फिर्ता गर्नुपर्ने निर्देशन दिएपछि माधव नेपाल समूहले ओलीले एकता प्रक्रियामा भाँजो हालेको बताएको छ । हस्ताक्षर फिर्ता नभए पार्टी एकतावद्ध नहुने घोषणा अध्यक्ष ओलीले शुक्रबारकाे केन्द्रीय कमिटी बैठकमा गरेका छन् ।

शुक्रबारको केन्द्रीय कमिटी बैठकअघि नेपाल-खनाल समूहका नेता सुरेन्द्र पाण्डे, भीम आचार्य र गोकर्ण विष्टले अध्यक्ष ओलीलाई एकताको पहलका लागि केन्द्रीय कमिटीको बैठक रोकेर नेता माधवकुमार नेपालसँग संवाद गर्न भनेका थिए ।

ओलीले बैठकलाई निरन्तरता दिँदै देउवालाई प्रधानमन्त्री बनाउन गरिएको हस्ताक्षरले एमाले विभाजनको घोषणा रहेको भन्दै ती हस्ताक्षर फिर्ता नभए एमाले एकतावद्ध हुन नसक्ने बताएका छन् । 'कांग्रेस नेतालाई प्रधानमन्त्री बनाउन एमालेका सदस्यलाई छुट छैन । यो कुरा किमार्थ स्वीकार्य छैन । यो कदम पार्टी फुटको घोषणा हो । दुई दिनभित्र हस्ताक्षर फिर्ता भएन भने पार्टी एकता हुन्न,' ओलीले बैठकमा भनेका छन् ।

कांग्रेस सभापति शेरबहादुर देउवालाई प्रधानमन्त्री बनाउन परमादेशको माग गर्दै सर्वोच्चमा दायर भएको रिटमा एमालेका २३ सांसदले हस्ताक्षर गरेका छन् । माधव नेपाल समूहले हस्ताक्षर फिर्ताको निर्देशन पार्टी एकता प्रक्रियामा भाँजो हाल्ने काम भएको बताएको छ । एमाले नेता अष्टलक्ष्मी शाक्यले अध्यक्ष ओलीको यो निर्णयले एकतामा अवरोध पुर्‍याउने बताइन् । 'हार्दिकताका साथ एकताको पहल गर्नुपर्नेमा उहाँले टेढो टेढो हुँदै एकतामा भाँजो हाल्ने काम गर्नुभयो,' उनले भनिन् ।

ओलीलाई नेपालको जवाफ - मलाई तपाईंको फोन उठाउनै मन थिएन, साथीहरूको दबाबले उठाएँ

खनाल-नेपाल समूह आफूले संविधान र संसदको रक्षाका लागि देउवालाई प्रधानमन्त्री बनाउन हस्ताक्षर गरेकाले फिर्ता नहुने अडानमा छ । सर्वोच्च अदालतमा विचाराधीन मुद्दालाई कमजोर बनाउने उद्देश्य र तुष राखेर हस्ताक्षर फिर्ताको निर्देशन आएको त्यस समूहको ठहर छ ।

'नवौँ महाधिवेशन आयोजक कमिटीलाई केन्द्रीय कमिटीमा रुपान्तरण गरेर बसेको याे बैठक नै अवैध छ । पार्टीको विधानविपरीत बैठक बसेको हुनाले यसको निर्देशन मान्न हामी बाध्यकारी छैनौँ । यो निर्देशन अदालतमा विचाराधीन मुद्दालाई कमजोर बनाउने मनस्थितिका साथ आएको छ,' नेता भीम रावलले भने ।

दुवै पक्षको अडानले अड्किएको एकता प्रक्रिया

एमाले अध्यक्ष ओली र असन्तुष्ट खनाल-नेपाल समूह आफ्नो अडानबाट टसमस नहुँदा एकता प्रक्रिया अप्ठ्यारोमा परेको छ । असन्तुष्ट समूहले अध्यक्ष ओलीसँग २०७५ जेठ २ को स्थायी र केन्द्रीय कमिटीको बैठक बोलाउनुपर्ने अडान राखेको थियो ।

ओलीसमक्ष उनीहरूले नवौँ महाधिवेशनबाट निर्वाचित स्थायी कमिटीको बैठकमार्फत माओवादीबाट एमालेमा प्रवेश गरेकाहरूको व्यवस्थापनको प्रस्ताव तयार गर्दै केन्द्रीय कमिटीबाट अनुमोदन गराउने प्रस्ताव गरेको थियो ।

बामदेवले भने - माधव नेपाललाई अपमान गरेर एमालेको एकता हुँदैन

तर ओलीले महाधिवेशन आयोजक कमिटीको बैठकमार्फत एमालेबाट स्थायी कमिटीमा रघुबीर महासेठ, रघुजी पन्त, वेदुराम भुसाल र विष्णु रिमाललाई मनाेनीत गरे । यस्तै, माओवादीबाट एमालेमा प्रवेश गरेका रामबहादुर थापा बादल, टोपबहादुर रायमाझी, लेखराज भट्ट र मणि थापालाई स्थायी कमिटीमा समेटे ।

यो निर्णयबाट अध्यक्ष ओलीले माओवादीबाट एमालेमा प्रवेश गरेकाहरूलाई उचित स्थान दिनुपर्ने आफ्नो अडानको कार्यान्वयन गरे । यता आफूहरूको ६ बुँदे लिखित प्रस्तावको विरुद्धमा रहेको भन्दै खनाल-नेपाल समूह शुक्रबारको केन्द्रीय कमिटीको बैठकमा सहभागी भएन ।

देउवालाई प्रधानमन्त्री बनाउन आफूहरूले गरेको हस्ताक्षर संविधान र लोकतन्त्रको रक्षाका लागि भएको दाबी खनाल-नेपाल समुहले गर्दै आएको छ । आफूहरूको हस्ताक्षर फिर्ता नहुने उनीहरूको अडान छ । तर अध्यक्ष ओलीले उनीहरूको यो अडान पार्टी फुटको घोषणा भनेका छन् । अध्यक्ष ओलीले दुई दिनभित्र हस्ताक्षर फिर्ता नभए पार्टी एकता नहुने घोषणा गरेका छन् ।

देउवालाई प्रधानमन्त्री बनाउन गरेको हस्ताक्षर दुई दिनभित्र फिर्ता लिन आफ्ना नेतालाई एमालेको निर्देशन

यता खनाल-नेपाल समूहले हस्ताक्षरलाई प्रतिष्ठाको विषय बनाएकाले फिर्ता नगर्ने पक्षमा छन् । उनीहरूले अध्यक्ष ओलीबाट संसद् विघटन गल्ती भएको भन्दै आत्मालोचनाको माग अघि सारिरहेका छन् । 'संसद् र संविधानलाई अप्ठ्यारोमा पार्दै स्वेच्छारी रूपमा अघि बढ्ने आफ्नो कदमप्रति आत्मालोचना नगर्ने अनि हामीलाई हस्ताक्षर फिर्ताको निर्देशन दिने यो कुरा न्यायसंगत छैन,' स्थायी कमिटी सदस्य युवराज ज्ञवाली भन्छन् ।

संवादका लागि समेत सँगै बस्न तयार छैनन् ओली- नेपाल

एकता लागि शीर्ष नेताबीच संवाद हुनुपर्ने भन्दै दुवैतर्फका दोस्रो तहका नेताहरूले संवादको वातावरण मिलाएका थिए । ओली र नेपालबीच पछिल्लो पटक ३० वैशाखपछि बिहीबार मात्रै फोन संवाद भएको थियो । फोन संवादमा नेता नेपालले भेट्न अस्वीकार गरेको अध्यक्ष ओलीले केन्द्रीय कमिटीमा जानकारी गराएका छन् ।

नेता नेपालले फोन संवादमा 'साथीहरूको दबाबले मात्रै फोन उठाएको' भनेपछि ओली नेपालसँग रुष्ट बनेका छन् । लिखित प्रस्ताव दिँदा पनि बारम्बार उल्लंघन गर्ने प्रवृत्तिका कारण बैठकमा बसिरहनुको औचित्य नभएको नेता नेपालले आफूनिकट नेतासँग बताउँदै आएका छन् ।

केन्द्रीय कमिटीमा ओलीको ब्रिफिङ : एकता जटिल बन्दै गए पनि केही दिनभित्रै परिणाम आउँछ

यता ओली पार्टीलाई भन्दा विपक्षी गठबन्धनलाई बलियो बनाउन लागिपरिरहेको भन्दै नेपालसँग बस्नुको औचित्य नरहेको बताउने गरेका छन् । 'पार्टीलाई भन्दा विपक्षी गठबन्धनलाई बलियो बनाउँदै केही साथीहरूले एकता प्रक्रियालाई विथोल्ने काम गरिरहनुभएको छ । मैले फोन गरेर भेटौँ भन्दा पनि माधव नेपालले मान्नुभएन । बरु तपाइसँग बोल्न पनि मन थिएन, साथीहरूको दबाबले फोन उठाएँ भन्नुभयो,' केन्द्रीय कमिटी बैठकमा ओलीले भनेका थिए ।

बामदेव गौतमले मागे एकताकाे जिम्मेवारी

खनाल-नेपाल समूहका दोस्रो तहका नेताले एकता प्रक्रियालाई तार्किक निष्कर्षमा पुर्‍याउन कार्यदल ब्युँताउने प्रस्ताव गरेका छन् । अध्यक्ष ओलीसँग शुक्रबारको केन्द्रीय कमिटी बैठकअघि छलफल गर्न पुगेका नेताहरू सुरेन्द्र पाण्डे, भीम आचार्य र गोकर्ण विष्टले विगतको कार्यदल ब्युँताउन प्रस्ताव गरेका थिए ।

खनाल-नेपाल समूहबाट कार्यदल संयोजक बनेका भीम रावललाई साधारण सदस्य समेत नरहनेगरी महाधिवेशन आयोजक कमिटीले कारबाही गरेपछि कार्यदल निष्क्रिय थियो । नेताहरूले अनौपचारिक माध्यमबाट संवादमा भने निरन्तर बसेका थिए । त्यस प्रस्तावबारे अध्यक्ष ओलीले सल्लाह गरेर निर्णय दिने जवाफ दिएको नेता भीम आचार्यले बताए । 'हामीले एकतालाई निष्कर्षमा पुर्‍याउने कार्यदल ब्युँताउन प्रस्ताव गरेका थियौँ, उहाँले सल्लाह गरे निर्णय दिने बताउनुभयो,' उनले भने ।

बैठक रोकेर एकताको पहल गर्न नेपाल समूहको आग्रह, ओलीले भने- सल्लाह गरेर निर्णय गर्छु

केन्द्रीय कमिटीको बैठकमा उपाध्यक्ष बामदेव गौतमले पनि एकता प्रक्रियाको वार्तामा आफूलाई पनि भूमिका दिन अध्यक्ष ओलीसँग माग गरेका छन् । बैठकमा बोल्दै उनले माधवकुमार नेपाललाई अपमान गरेर एकता नहुने पनि बताए । 'एकतामा हतार गरेर हुनेवाला केही छैन । माधवकुमार नेपाललाई अपमान गरेर एकता हुँदैन,' उनको भनाइ थियो ।

एकता प्रक्रियामा स्थान खोज्दै उपाध्यक्ष गौतमले भने,'मैले कहिल्यै पनि मित्रतामा धोका दिएको छैन । एकतावद्ध पार्टीको पक्षमा म पनि छु । यसलाई निष्कर्षमा पुर्‍याउन मलाई पनि जिम्मेवारी दिनोस्,' उनको भनाइ थियो ।

पार्टी एकताका लागि अध्यक्ष ओलीले दुई दिने डेडलाइन दिएका छन् । हस्ताक्षर कुनै पनि शर्तमा फिर्ता नहुने अडानमा खनाल-नेपाल समूह छ । बिहीबार बसेको स्थायी कमिटी सदस्यहरूकाे बैठकमा पार्टी एकताका लागि अधिकतम प्रयास गर्ने पक्षमा आफू रहेको नेता नेपालले बताएका थिए । बाध्यकारी अवस्थामा मात्रै नयाँ पार्टी घोषणा गर्ने उनको ब्रिफिङ थियो । आ-आफ्ना यी अडानबाट दुवै पक्ष टसमस नहुँदा एकताको गाँठो भने झन्-झन् कस्सिँदै गएको छ ।

प्रकाशित मिति: शुक्रबार, असार १८, २०७८ १९:५७