विराटनगर सडक दुर्घटना प्रकरण : सांसद बिन्दियाका छोरा पुर्पक्षका लागि जेल चलान

विराटनगर सडक दुर्घटना प्रकरण : सांसद बिन्दियाका छोरा पुर्पक्षका लागि जेल चलान

आरोपी रबिन कार्की

A+ A A-

गत २० जेठमा एक भारतीय मजदुरको मृत्यु र अर्का एक जना गम्भीर घाइते हुनेगरी भएको कार दुर्घटनामा संलग्न भएको आरोपमा पक्राउ परेका नेपाली कांग्रेसकी प्रदेशसभा सदस्य बिन्दिया कार्कीका छोरा रबिन कार्की कारागार चलान भएका छन् । जिल्ला अदालत मोरङले बुधबार २४ वर्षीय कार्कीलाई पुर्पक्षका लागि थुनामा राख्न आदेश दिएको हो ।

जिल्ला अदालत मोरङका न्यायाधीश सुदर्शन लामिछानेको इजलासले कार्कीलाई पुर्पक्षका लागि थुनामा राख्न आदेश दिएको हो । अदालतको आदेशपछि कार्की विराटनगर कारागार चलान भएको मोरङ अदालतका श्रेस्तेदार राजकुमार दाहालले जानकारी दिए ।

सरकारी वकिलको कार्यालयले मंगलबार सवारी तथा यातायत व्यवस्था ऐन २०४९ दफा १६१ (२) र दफा १६२ (१) को कुसरमा कार्कीलाई सोही ऐनको दफा १६१(२) को बमोजिम तीन वर्षदेखि १० वर्षसम्म कैद र ३० हजार रुपैयाँदेखि १ लाख रुपैयाँसम्म जरिवानाका माग दाबी राखेर अदालतमा अभियोग दर्ता गराएको थियो । बुधबार प्रतिवादीको अदालतमा बयान सकिएपछि थुनछेक बहस हुँदा थुनामा राख्न आदेश भएको हो ।

गत २० जेठ राति प्रदेश सांसद बिन्दिया कार्कीले प्रयोग गर्दै आएको प्रदेश ३–०१–००२ च २१३९ नम्बरको कारले पैदलयात्रीलाई ठक्कर दिँदा ३५ वर्षीया भारतीय नागरिक मुकेश शर्माको मृत्यु भएको थियो भने मोरङको कटहरी गाउँपालिका–२ का २७ वर्षीया राजकुमार राजवंशी गम्भीर घाइते भएका थिए । मृतक र घाइते विराटनगर–४ स्थित न्यु एभरेष्ट स्टिल उद्योगका कामदार हुन् ।

ठक्कर दिने कार सांसद कार्कीका छोराले चलाएका थिए । मदिरा सेवन गरेपछि कार्कीले चलाएको कार दुर्घटना भएको अनुसन्धानमा खुलेको थियो । दुर्घटनापछि उनी फरार भएका थिए । तर, सांसद कार्कीले भने आफ्नो कार कोरोना संक्रमित बिरामीको उपचारका लागि एम्बुलेन्सका रूपमा प्रयोग गर्न दिएको दावी गरेकी थिइन् । दुर्घटना भएको तीन दिनपछि २३ जेठमा कार्कीलाई मोरङ प्रहरीले पक्राउ गरेको थियो ।