यस्तो छ ट्रायल पास गरेलगत्तै पाइने नयाँ सवारी लाइसेन्स (भिडियोसहित)

A+ A A-

तपाईंले सवारीचालक अनुमतिपत्रका लागि ट्रायल पास गरेको कति भयो ? एक वर्ष पनि भएको छैन भने त पक्कै लाइसेन्स पाउनुभएको छैन होला ।

अब भने यो झमेला बेहोर्नु नपर्ने भएको छ । यातायात व्यवस्था विभागले परीक्षणकालीन सवारीचालक अनुमति–पत्र लागू गर्ने भएको छ ।

सवारी तथा यातायात ऐन २०४९ को दफा ५० मा भएको व्यवस्थाबमोजिम सवारीचालक अनुमति–पत्र जारी गर्दा विभागले सुरुमा एक वर्षको परीक्षण काल रहने गरी जारी गर्ने प्रावधान भएकाले यो नियम लगाउन लागिएको यातायात व्यवस्था विभागका महानिर्देशक नमराज घिमिरेले जानकारी दिए ।

यो लाइसेन्सवाहक व्यक्तिले एक वर्षको अवधिमा पाँच पटक वा सोभन्दा धेरै गल्ती गरेको भेटिएमा पुन: परीक्षा दिएर फेरि एक वर्ष परीक्षणकालीन लाइसेन्स बोक्नुपर्नेछ । त्यस्तै, गल्ती नगरेको खण्डमा भने उक्त व्यक्तिले स्थायी लाइसेन्स पाउनेछ ।

यो नियम कागजी लाइसेन्स हुँदा अस्तित्वमा भए पनि स्मार्ट कार्ड लागू भएपछि चिप्स धेरै महँगो हुने भएकाले हटाइएको घिमिरेले जानकारी दिए ।

अत्याधुनिक प्रविधि

पीभीसी कार्ड प्रयोग गरिएको यो लाइसेन्सलाई ट्राफिक प्रहरीले क्यूआर कोडमार्फत तुरुन्त जाँच गर्न सक्ने हुँदा नक्कली लाइसेन्सको सम्भावना कम हुने विभागको विश्वास छ ।

त्यस्तै, इन्टरनेट नभएको अवस्थामा यसको होलोग्राम र यूभी लाइट डिटेक्टरले सक्कली वा नक्कली तुरुन्तै पत्ता लगाउन सकिने घिमिरेले जानकारी दिए ।

ड्यूटीमा खटिएका ट्राफिक प्रहरीको मोबाइलमा भएको एप्समार्फत क्यूआर कोड स्क्यान गर्दा उक्त लाइसेन्सको पूरै विवरण मोबाइलमा आउने भएकाले चालकले कति गल्ती गर्‍यो भनेर सजिलसँग पत्ता लगाउन सकिने विभागले जनाएको छ ।

तुरुन्तै लाइसेन्स

परीक्षार्थीले ट्रायल पास गरेर राजस्व बुझाएपछि तुरुन्त लाइसेन्स पाउने घिमिरेको दाबी छ । ‘एउटा प्रिन्टरले १ घण्टामा ९ सयवटा प्रिन्ट गर्न सक्छ । सेवाग्राहीले ट्रायल पास गरेपछि राजस्वको रसिदसँगै लाइसेन्स पनि पाउँछन्,’ उनले शिलापत्रसँग भने ।

यी प्रिन्टरको मूल्य डेढ लाखको हाराहारीमा पर्ने र एउटा कार्डको १२/१३ रुपैयाँ मात्र पर्ने भएकाले यातायात कार्यालयलाई धेरै आर्थिक भार नपर्ने र सेवाग्राहीले पनि झन्झट बेहोर्नु नपर्ने घिमिरेको तर्क छ ।

‘सुरुवाती चरणका लागि हामीले यातायात कार्यालयहरूलाई दिन कार्ड तयार पारेका छौँ । उहाँहरूले प्रिन्टर किनेर छपाइ सुरु गर्न सक्नुहुन्छ,’ उनले भने । यो व्यवस्था आगामी साउनदेखि लागू गर्नेगरी काम अघि बढाइएको घिमिरेले बताए ।

भिडियो : शमशेरसिंह बस्नेत

प्रकाशित मिति: मंगलबार, असार १५, २०७८ १९:२७