७ सयभन्दा धेरै म्यानपावर खारेजी हुनबाट जोगिए, सरकारको उक्त निर्णयको व्यवसायीले गरे स्वागत

७ सयभन्दा धेरै म्यानपावर खारेजी हुनबाट जोगिए, सरकारको उक्त निर्णयको व्यवसायीले गरे स्वागत

A+ A A-

नेपालमा सञ्चालनमा रहेका ८ सय ५४ वटै म्यानपावर कम्पनीहरूको इजाजतपत्र नवीकरण हुने भएको छ । सोमबार राति बसेको मन्त्रिपरिषद् बैठकले वैदेशिक रोजगार ऐन, २०६४ को दफा ८२ अनुसार त्यस्तो निर्णय गरेको हो ।

उक्त निर्णयसँगै सय जनाभन्दा थोरै कामदार वैदशिक रोजगारीमा पठाउने म्यानपावर कम्पनीसमेत नवीकरण गर्न सहज भएको छ ।

मन्त्रिपरिषद् बैठकले सयभन्दा कम कामदार पठाउने म्यानपावरलाई पनि संस्था नवीकरणका लागि बाटो खोलिदिएको प्रगतिशील वैदेशिक रोजगार व्यवसायी मञ्चले जानकारी दिएको छ ।

म्यानपावर नवीकरण गराउन आर्थिक वर्ष २०७६/७७ र आर्थिक वर्ष २०७७/७८ मा गरी कुल २ सय जना कामदार श्रमिक विदेश पठाएको प्रमाणित गर्नुपर्ने व्यवस्था ऐनमा छ । कोभिड–१९ महामारीका कारण वैदेशिक रोजगारमा देखिएको समस्याका कारण ७ सयभन्दा धेरै म्यानपावर कम्पनीहरूले २ सय कामदार पनि वैदेशिक रोजगारीमा पठाउन सकेका थिएनन् ।

वैदेशिक रोजगार ऐनअनुसार म्यानपावर कम्पनीले प्रत्येक वर्षको असार मसान्तभित्र संस्था नवीकरण गराउनुपर्ने व्यवस्था छ । साथै, प्रत्येक महिनाको १० हजार शुल्क तिरेर असोज मसान्तसम्म इजाजतपत्र नवीकरण गर्नुपर्छ ।

वैदेशिक रोजगार ऐन २०६४ ले लगातार २ वर्षसम्म वार्षिक एक सय जना पनि कामदार पठाउन नसकेका म्यानपावरको इजाजतपत्र नवीकरण नहुने व्यवस्था गरेको छ । तर, गत वर्ष पनि मन्त्रिपरिषद्‌ले बाधा अड्काउ फुकाएर १ सय जना कामदार नपठाउने म्यानपावर कम्पनीहरूको इजाजत आर्थिक वर्ष २०७८/०७९ को असारसम्मका लागि नवीकरण गराउने व्यवस्था गरिदिएको थियो ।

तत्कालीन समयमा आर्थिक वर्ष २०७८/८९ असारसम्मका लागि नवीकरण गराउँदा २ सय जना कामदार पठाएको हुनुपर्ने सर्त राखिएको थियो । तर, कोरोनाका कारण पछिल्लो १ वर्षमा पनि म्यानपावर कम्पनीले तोकिएको संख्यामा श्रमिक विदेश पठाउन नसकेपछि बाधा अड्काउ फुकाउने निर्णय गरिएको हो ।

सरकारको उक्त निर्णयको प्रगतिशील वैदेशिक रोजगार व्यवसायी मञ्चले विज्ञप्ति जारी गरेर स्वागत गरेको छ ।

सरकारले व्यवसायीको उक्त समस्यालाई महत्त्वका साथ सम्बोधन गर्दै सोमबारको मन्त्रिपरिषद्‌ बैठकबाट वैदेशिक रोजगार ऐन, २०६४ को दफा ८२ प्रयोग गरी बाधा अड्काउ फुकाई सम्पूर्ण व्यवसायीको माग पूरा गरिदिएको मञ्चले बताएको छ ।

प्रकाशित मिति: मंगलबार, असार १५, २०७८ १६:१८