नायब महान्यायाधिवक्ताको तर्क- मन लागेन भने पार्टी छाड्ने हो, दल मान्दिन भन्न पाइन्न

नायब महान्यायाधिवक्ताको तर्क- मन लागेन भने पार्टी छाड्ने हो, दल मान्दिन भन्न पाइन्न

A+ A A-

नायब महान्यायाधिवक्ता पदमप्रसाद पाण्डेयले बहुदलीय व्यवस्था र प्रजातन्त्रका लागि लढेका दलले दलीय ह्वीप लाग्दैन भन्न नमिल्ने तर्क गरेका छन् । मंगलबार प्रतिनिधिसभा विघटन मुद्दामा सरकार पक्षबाट बहस गर्दै पाण्डेले यस्तो बताएका हुन् ।

'दलको निर्णयबिना, दलको स्वीकृतिबिना शासन सञ्चालन हुन्छ भन्ने कुरा हाम्रो संविधानले स्वीकार्दैन,' पाण्डेयले भने, 'संसदीय प्रजातन्त्रमा आफ्नो घर भत्काएर अर्काको घर बनाउने कुरा हुँदैन ।'

उनले चुनावमा व्यक्तिलाई नभइ दललाई मत दिएको पनि तर्क गरे । 'चुनावमा जनताले व्यक्तिलाई होइन दललाई मत हालेका हुन्छन्,' उनले भने, 'एउटा पार्टी हुनका लागि सामान विचार, दर्शन र कर्यक्रम चाहिन्छन् । त्यही दलको विचार, दर्शनका भरमा चुनाव जितेर म त्यो दल मान्दिन भन्न पाइन्न । मन लागेन भने पार्टी छाड्ने हो ।'

पाण्डेयले प्रधानमन्त्रीले विश्वासको मत पाउँदिनँ भन्ने पक्का भएपछि विश्वासको मत नलिएको तर्क गरे । 'विश्वासको मत नपाउने अवस्था भएपछि नलिनुभएको हो,' उनले भने, 'विश्वासको मत नपाएपछि उहाँको दायीत्व पूरा गरेर अर्को उपधारामा जानुभयाे ।'

त्यसपछि प्रधान्यायाधीश चोलेन्द्रशमशेर राणाले विश्वासको मत प्राप्त गरेको र नगरेको घोषणा संसद्‌बाट हुन्छ नि भन्दै प्रश्न गरे, 'यो प्रक्रिया छल्न पाइन्छ र ? यसको घोषणा गर्ने त संसदले हाेला ।'

जवाफमा पाण्डेयले पहिले नै टेस्टेड भइसकेको कुराका लागि संसदमा जानु नपर्ने तर्क गरे ।

पाण्डेयले उपधारा ३ को प्रधानमन्त्रीले राजीनामा नदिइकनै उपधारा ५ मा जान पाउने तर्क गरे । राजीनामा दिएपछि धारा ७७ को उपधारा १ को खण्ड क मा जाने उनको भनाइ छ । र, त्यसले फेरि ७६ को उपधारा १ को प्रक्रिया सुरु हुने उनले जिकिर गरे ।

'प्रधानमन्त्रीले राजीनामा दिनुपर्ने बाध्यता छैन । उपधारा ३ काे प्रधानमन्त्रीले उपधारा ५ अनुसार दाबी गर्न पाइँदैन भनेर संविधानमा लेखेको छैन,' उनले भने,' 'उपधारा ५ बमोजिम उहाँले प्रतिनिधिसभाको सदस्यको हैसियतमा दाबी गर्नुभएको हो ।'

पाण्डेयले उपधारा ५ ले दलीय समर्थन खोज्छ की खोज्दैन भन्दै प्रश्न गरेका थिए । धारा ७६ काे उपधारा ४ बमोजिम विश्वासको मत खोज्दा ह्वीप नलाग्ने भए ५ मा पनि नलाग्ने भन्दै पाण्डेयले ह्वीप नलाग्ने हो भने उपधारा ४ अनुसारको विश्वासको मत कसरी लिने ? भन्ने प्रश्न गरे ।

'दलको ह्वीप लाग्दैन भने उपधारा ४ अनुसार विश्वासको मत कसरी लिने त ? जसरी पनि उपधारा ४ बमोजिम त विश्वासको मत लिनै पर्छ,' उनले भने, 'धारा ७६ काे ५ ले विश्वासको मत पाउन सक्ने आधार व्यक्तिले त दिने होइन । यो आधार त दलले दिने हो ।'

प्रकाशित मिति: मंगलबार, असार १५, २०७८ १२:५८