देउवाको पत्रबारे महान्यायाधिवक्ताले बाेलेपछि प्रधानन्यायाधीशले भने- यसमा नजाऊँ

देउवाको पत्रबारे महान्यायाधिवक्ताले बाेलेपछि प्रधानन्यायाधीशले भने- यसमा नजाऊँ

A+ A A-

संसद् विघटनसम्बन्धी मुद्दामा सर्वाेच्च अदालतकाे संवैधानिक इजलाससमक्ष सरकार पक्षका वकिलको बहस जारी छ । सरकारी वकिलहरूकाे नेतृत्व गरेका महान्यायाधिवक्ता रमेश वडालले अहिले सरकारकाे प्रतिरक्षामा बाेलिरहेका छन् ।

बहसका क्रममा राष्ट्रपतिलाई नेपाली कांग्रेसका सभापति शे‍रबहादुर देउवालाई प्रधानमन्त्री बनाउन गरिएको दाबीको पत्रमा भएको केरमेटबारे महान्यायाधिवक्ता बडाल र प्रधानन्यायाधीश चोलेन्द्रशमशेर राणाबीच सवाल जवाफ भएको छ ।

महान्यायाधिवक्ता बडालले केरमेट गरेको कागजमा कार्यालयको छाप नभएको जिकिर गर्दा प्रधानन्यायाधीश राणाले हिजो नै भएन भन्ने कुरा छोड्नुहोस् भने । त्यसपछि बडालले देउवा पक्षले परमादेश मागे‍काले कागजको वैधानिकता पनि हेर्नुपर्ने जिकिर गरेपछि राणाले त्यसमा नजान आग्रह गरे ।

यस्तो छ सवाल जवाफ

बडाल : यसरी केरमेट गरेको कागजमा कार्यालयको छाप चाहिन्छ । यसमा छैन ।

राणा : हिजो नै हेर्नु पर्थ्यो, हेरिएन । भएन भन्ने कुरा छोड्नुहोस् ।

बडाल : राष्ट्रपतिले इज्जतको जामा पहिर्‍याएर पठाउनुभएको थियाे । आफैँ जामा खोलेपछि त हामीले भन्न पाउनुपर्‍यो नि- आफैँ जामा खोलेका हुन् । उहाँहरूले आफैँ परमादेश माग गर्नुभएपछि त्यो कागजको वैधानिकता पनि हेर्नुपर्‍यो नि ।

राणा - यसमा नजाऊँ । जुन प्रयोजनका लागि यो हस्ताक्षर गरेकाे हो, त्यसको विपरीत भयाे भनेर कानुनआनुसार उहाँहरू जानुहोला नि । त्यो कुरा यहाँ भन्ने हो र ?

बडाल : होइन श्रीमान्, यहाँ त हामी प्रधानमन्त्री नियुक्तिको कुरा गर्दै छौँ । त्यस्तो प्रधानमन्त्री के र कुन कागजको आधारमा हुँदै छन भन्ने त थाहा हुनुपर्‍यो ।

श्रीमान्‌बाट आदेश हुन्छ भने त हामी कारबाहीमा कानुनी प्रक्रियामा जान्छौँ नि । भोलि कीर्ते, जालसाजी हुन्छ भन्ने प्रमाणित भयो भने त के हुन्छ ? यस्तो जालसाजी कागज गर्ने मान्छे यो देशको प्रधानमन्त्री हुन्छ त ।

म देशको महान्यायाधिवक्ता हुँ । त्यस कारण यो लिखतले यो देशको कुनकुन कानुन तोडेको छ भन्ने कुरा श्रीमान्‌को सामु ल्याइदिनु मेराे कर्तव्य हो ।

इजलाससमक्ष फ्रान्स र बेलायतमा राजा काटिएजसरी नेपालमा पनि प्रधानमन्त्री र राष्ट्रपति काटिन सक्छन् भन्दा श्रीमान्‌बाट अब्जेकसन हुनुपर्थ्यो ।

त्यसकारण यहाँ गालीको खोला बगाउँदा आफ्नो कागजको वैधानिकता हेर्नुपर्थ्यो नि । ओली र राष्ट्रपतिले मिलिभगत तथा दुराशयकाे आरोप लगाउँदा आफ्नो कागज हेर्नुपर्दैन ।

प्रकाशित मिति: सोमबार, असार १४, २०७८ १५:१८