‘भर्चुअल’ कक्षामा जोडिए ५८ हजार विद्यार्थी

A+ A A-

नेपालमै पहिलोपटक आयोजना गरिएको ‘भर्चुअल’ शैक्षिक मेलामा विद्यार्थी तथा अभिभावकले उत्साहजनक सहभागिता जनाएका छन् । नेपाल एडुफेयरको वेबसाइट नेपाल एडुफेयरडटकममा मंगलबार बिहान ११ बजेसम्म ५८ हजारले भिजिट गरिसकेका छन् । शिलापत्रडटकमको प्रस्तुतिमा सञ्चालित शैक्षिक मेला १६ जेठसम्म सञ्चालन हुनेछ ।

एडुफेयरमा विद्यार्थी तथा अभिभावकले शैक्षिक संस्थाको भौतिक संरचनाको ‘थ्रिडी इमेज’मार्फत भर्चुअल टुर गर्न पाएका छन् । उनीहरूले घरै बसीबसी चाहेको शैक्षिक संस्थाको लबी, ल्याब, लाइब्रेरी, कक्षाकोठा, हलदेखि सबै संरचना र सुविधाका विषयमा बुझ्न र कुराकानीसमेत गरिरहेका छन् ।

शैक्षिक संस्थाका अध्ययन सामग्री, ब्रोसर, फारम र अन्य अध्ययन सामग्रीसमेत प्राप्त गरिरहेका छन् । पहिलो चरणमा ग्लोबल, युनिग्लोब, लिबर्टी र भ्याली–भ्यु कलेजबारे मात्रै मेलामा सहभागी भएका छन् ।

पहिलो चरणको मेला समाप्तिपछि अरू २० भन्दा बढी कलेज एडुफेयरमा जोडिन इच्छुक रहेकाे मुख्य आयोजक शिलापत्रडटकमका अध्यक्ष सुरेश सिम्खडाले बताए । मेलामा आईटी, इन्जिनियरिङ, मेडिसिनलगायतका कार्यक्रमबारे सोधपुछ गर्नेको संख्या धेरै रहेको आयोजकले जनाएको छ ।

सबैभन्दा बढी उपत्यकाका ७० प्रतिशत भिजिटर छन् । विराटनगर, जनकपुर, वीरगन्ज, नेपालगन्ज र धनगढी तथा पहाडी र हिमाली जिल्लाबाट समेत अवलोकनकर्ता धेरै रहेका अध्यक्ष सिम्खडाले बताए । ‘राजधानीमा थुप्रै शैक्षिक मेला हुन्छन्, जहाँ सीमित विद्यार्थी र अभिभावकले मात्रै समय दिन सक्थे । तर, पहिलोपटक भएको अनलाइन मेलामा देखिएको सहभागिताले हौसला मिलेको छ,’ उनले भने ।

एडुफेयरडटकमबाट अवलोकनकर्ताले सोमबारसम्म ११ लाखभन्दा बढी तथ्यांक र सूचना प्राप्त गरेका छन् । अवलोकनकर्ताले अहिलेसम्म नेपाल एडुफेयरको सर्भरबाट १ सय ४० जीबी डेटा लिएका छन् । सामाजिक सञ्जाल फेसबुक, इन्स्टाग्राम र युट्युबलगायतबाट सात लाख बढी भिजिटर रहेकाे एडुफेयरको आईटी पार्टनर टेक १०१ ले जनाएको छ ।

भर्चुअल मेलाको पाँचौं दिनसम्म सहभागी भएका ३० भन्दा बढी देशका अवलोकनकर्तामध्ये नेपालबाट ८६ प्रतिशत छन् । अमेरिकाबाट तीन प्रतिशत, भारतबाट दुई प्रतिशत, यूएईबाट १.५ प्रतिशत र कतारबाट एक प्रतिशत छन् । यस्तै, अस्ट्रेलिया, जापान, बेलायत, दक्षिण कोरिया र साउदी अरेबियाबाट समेत अवलोकनकर्ताको संख्या बढ्दो छ । अवलोकनकर्तामध्ये १८ देखि ३४ वर्षसम्मका धेरै छन् ।

प्रकाशित मिति: मंगलबार, जेठ १४, २०७६ २०:२६