कालीगण्डकी डाइभर्सनबारे गण्डकी सरकार – प्रदेशबीच द्वन्द्व निम्त्याउने काम गरियो

A+ A A-

कालीगण्डकी–तिनाउ डाइभर्सन आयोजनाको काम अगाडि बढेपछि गण्डकी सरकारले त्यसको विरोध गरेको छ ।

संघ सरकारका उपप्रधान तथा अर्थमन्त्री विष्णु पौडेलले शनिबार बुटवलमा आयोजनाको कार्यालय उद्घाटन गरेका थिए । गण्डकी सरकारले भने यो आयोजना अगाडि नबढाउन आग्रह गरेको छ । कालीगण्डकीको पानी लुम्बिनीतर्फ लैजाँदा सुख्खापन हुने चिन्ता गण्डकी प्रदेश र लुम्बिनीका केही पालिकालाई छ ।

मुख्यमन्त्री कृष्णचन्द्र नेपाली पोखरेलले गण्डकी र लुम्बिनी प्रदेश दुवैसँग जोडिएको विषय भए पनि समन्वय नै नभएको भन्दै आफूहरूको ध्यानाकर्षण भएको बताएका छन् ।

राम्दीदेखि देवघाटसम्मका बासिन्दाको भावना विपरीतको यो आयोजनाको काम सुरु नगर्न मुख्यमन्त्री पोखरेलले आग्रह गरेका छन् । ‘गण्डकी प्रदेशसँग कुनै सरोकार नै नराखी आयोजना कार्यालय उद्घाटन भएपछि प्रदेशवासीलाई झस्काएको छ,’ उनले फेसबुकमा लेखेका छन्, ‘२०७१ सालका नीति तथा कार्यक्रममा यो आयोजना समेटिएदेखि नै तत्कालीन अवस्थामा गण्डकी अञ्चल र लुम्बिनी अञ्चलका जिल्लामा यसको विरोध हुँदै आएको हो ।’

विरोध हुँदै आए पनि ती आवाजको सम्बोधन नभएको मुख्यमन्त्री पोखरेलले उल्लेख गरेका छन् । निवर्तमान मुख्यमन्त्री पृथ्वीसुब्बा गुरुङ पनि कुनै हालतमा आयोजना अगाडि बढाउन नहुने पक्षमा थिए ।

गण्डकी र लुम्बिनी प्रदेश हुँदै बग्ने नदीलाई डाइभर्सन गरेर रुपन्देही र कपिलवस्तुमा सिँचाइका लागि प्रयोग गर्न लागिएको हो । कालीगण्डकी नदीको अधिकांश भाग गण्डकी प्रदेशतर्फ पर्छ । यसरी लैजाँदा आफूहरुलाई सिँचाइमा समस्या हुने भन्दै पाल्पा, स्याङ्जा, तनहुँ, नवलपुरका पालिकाले विरोध गर्दै आएका छन् ।

पाल्पाको रामपुर नगरपालिका र रम्भा गाउँपालिका, स्याङ्जाको चापाकोट र गल्याङ नगरपालिका, तनहुँको घिरिङ गाउँपालिका, नवलपुरको बौदिकाली गाउँपालिकालगायत स्थानीय तह नदी डाइभर्सन गर्न नहुने पक्षमा छन् ।

यो आयोजना अघि बढाएर संघ सरकारले प्रदेशबीच द्वन्द्व निम्त्याउने काम गरेको मुख्यमन्त्री पोखरेलको दाबी छ । ‘कालीगण्डकी डाइभर्सन आयोजना अघि बढाएर सरकारले प्रदेश–प्रदेशबीच द्वन्द्व निम्त्याउने काम गरेको छ,’ पोखरेलले भनेका छन्, ‘विस्तृत अध्ययन र अनुसन्धानबिना समन्वय नगरी यस्ता दीर्घकालीन महत्व राख्ने ठूला परियोजना सुरू गर्न हुँदैन भन्ने गण्डकी सरकारको ठम्याइ छ ।’

प्रकाशित मिति: शनिबार, असार १२, २०७८ १७:५७