बहुमत सदस्यले बहिस्कार गरेपछि ओमसतियाको बजेट सभा स्थगित

फाइल तस्वीर

A+ A A-

बजेट बाँडफाँडमा विवाद हुँदा रूपन्देहीको ओमसतिया गाउँपालिकाको बजेट सभा स्थगित भएको छ । वडा अध्यक्षसहित कार्यपालिका सदस्य (२५ जना) र गाउँपालिका अध्यक्ष हीरा केवट पक्षधरबीच बजेटको बाँडफाँडका विषयमा विवाद हुँदा आज हुने भनिएको बजेट सभा स्थगित भएको हो ।

गाउँपालिकासँग विभिन्न सातबुँदे असमति जारी गर्दै वडाध्यक्षसहित २५ जना गाउँसभा सदस्यले बैठक सुरु हुन साथ गाउँसभा बहिस्कार गरेका थिए । स्थानीय सरकारले १० असारमा बजेट ल्याउनुपर्ने प्रावधान छ ।

आज बिहान गाउँपालिकाका अध्यक्षको विपक्षमा उभिएको बहुमत पक्षधरले गाउँपालिका अध्यक्ष केवटले एकलौटी ढंगले कार्ययोजना तथा कार्यक्रम संचालन गर्ने गरेको, आय–व्ययको पारदर्शीता नगरी आर्थिक अनियमितता गरेको, स्वेच्छाचारी ढंगले अगाडि बढ्न खोजेको भन्दै गाउँसभा बहिष्कार गर्ने घोषणा गरेका थिए ।

ओमसतिया गाउँपालिका-६ का अध्यक्ष शिवकुमार धवलले गाउँपालिकामा संचालित अधिकांश योजनामा सम्बन्धित वडा अध्यक्षसहितका प्रतिनिधिसँग कुनै समन्वय नगरी अध्यक्ष एकलौटी र स्वेच्छाचारी ढंगले ल्याएको भन्दै गाउँसभा बहिष्कार गरेको बताए ।

गाउँपालिका अध्यक्ष केवटले भने आफ्नो विपक्षमा उभिएका वडा अध्यक्षले आफ्नो वडामा आफ्नै तजवीजीमा योजना तथा कार्यक्रम संचालन गर्न पाउने गरी २ करोड रुपैयाँको दरले बजेट माग गरेको र गाउँपालिकाको आम्दानी अनुरूप त्यो बजेट उपलब्ध गराउन नसकिने भएपछि विरोधमा उत्रिएको बताए ।

उनले विपक्षीमा उभिएका जनप्रतिनिधिले २५ करोड बजेट बनाउन भने पनि पालिकाको आम्दानीले नपुग्ने भएपछि १५ करोडको बजेट बनाउन लागेको समेत बताए । १० असारमा प्रत्येक पालिकाले नीति तथा कार्यक्रम पारित गरी बजेट पेश गर्नु पर्ने र त्यसो हुन नसकेमा कार्य सम्पादन मूल्यांकनमा कमजोर भई संघ र प्रदेशबाट प्राप्त हुने बजेटमा कमी हुने प्रावधान छ ।

प्रकाशित मिति: बिहीबार, असार १०, २०७८ १८:२६