छिन-छिनमै नेट जाँदा व्यवसाय चौपट हुने डर, ग्राहकलाई इन्टरनेटको छैन भर

A+ A A-

बुधबार बिहानदेखि नै इन्टरनेटमा समस्या आयो । अधिकांश इन्टरनेट कम्पनीहरूले नेटवर्कमा समस्या देखाउँदै उपभोक्तामा इन्टरनेट पुर्‍याउन सकेनन् । त्यसैको शिकार बनिन् सानोठिमी बस्ने स्नेहा थापा ।

स्नेहाको ९ बजेदेखि परीक्षा सुरु हुँदै थियो । हैदरबादमा रहेको ओस्मानिया विश्वविद्यालयमा स्नातक तहमा इन्जिनियरिङ पढ्ने उनी परीक्षा दिन तम्तयार भएर नेपालमा बसिन् । कोरोना संक्रमणले गर्दा अनलाइन परीक्षा हुने भएपछि उनि भारत जानु परेन । मंगलबारसम्म पढाई सकेर ढुक्क बनेकी उनलाई परीक्षा सक्न भने हम्मेहम्मे पर्‍यो ।

‘भायोनेटको ४५ एमबीपीएसको इन्टरनेट छँदैछ भनेर ढुक्क थिएँ,’उनि गुनासो गर्छिन्, ‘परीक्षा सुरु भएको ३० मिनेटमै नेट चलेन । हतार हतार कस्टमर केयरमा फोन गरेँ उताबाट नेटवर्कको समस्या केही समयपछि समाधान हुन्छ म्यासेज हेर्नुहोला भनेर राखिदिए । समय लाग्छ भनेपछि डेटा किनेँ तर त्यो पनि स्लो हुँदा भाइवा नै छुट्यो ।’

उनको बुधबार भाइवा थियो । इन्टरनेट बन्द हुँदा उनले यो वर्षको भाइवा नै गुमाउनु पर्‍यो ।

पत्रकार रामेश्वर बोहोराले पनि इन्टरनेटले दिएको दु:ख बुधबार ट्विटरमा पोखे ‘वर्ल्ड लिंकको गैरजिम्मेवारीपन धेरै भयो अबदेखि यसको सेवा रिन्यु गरिन्न ।’ उनको ट्विटमा कमेन्ट गर्नेहरू पनि एकपछि अर्को इन्टनेटले दिएको दु:ख सुनाउन थाले ।

अहिले सामाजिक सञ्जाल फेसबुकदेखि ट्विटर र क्लबहाउससम्ममा उपभोक्ताहरू इन्टरनेटप्रति आक्रोश पोख्न थालेका छन् ।

इन्टरनेट प्रयोगकर्ता रिकेश दाहाल किन्दा गरेको सम्झौता इन्टरनेट प्रदायक कम्पनीले भोलिपल्टैदेखि नमान्ने गरेको गुनासो गर्छन् । उनी भन्छन्,‘मैले ३५ एमबीपीएस नेट भायोनेट कम्पनीबाट किनेँ । तर, भोलिपल्टैबाट जम्मा १० देखि १५ एमबीपीएसको स्पिडमा मात्र नेट चल्यो । फोन गर्‍यो एक छिन् चल्छ अनि फेरि उस्तै पारा । वाक्क भइसकेँ ।’

यी त प्रतिनीधि पात्र मात्र हुन् । नेपाल दुरसञ्चार प्राधिकरणका अनुसार नेपालमा अहिले २ करोड १० लाखको हाराहारीमा इन्टरनेट प्रयोगकर्ता छन् । जसमा ३५ प्रतिशत उपभोक्ताले ब्रोडब्यान्ड नेट हुँदाहुँदै पनि डाटा खरिद गरेर नेट चलाउँछन् ।

यसरी झुक्किन्छन् उपभोक्ता

नेपालमा इन्टरनेट जोडेपछि नेट स्लो हुँदा सिधै सेवा प्रदायक कम्पनीलाई फोन गरेर समस्या बताउने धेरै छन् । धेरैले नेटको स्पिड कति छ र आफूले कति किनेको हो भन्नेमा हेक्का राख्दैनन् । यसको फाइदा भने सेवाप्रदायक कम्पनीहरूले उठाउँदै आएका छन् । नेपालमा सीमित व्यक्तिहरूले हेर्ने स्पिड चेक गर्ने साइट फास्टनेट डटकमले पनि कति स्पिडमा इन्टरनेट चलेको छ भन्ने सहि देखाउँदैन । ३५ एमबीपीएसको नेट प्रयोगकर्ताले नेट नचलेर फास्ट नेट डटकममा हेर्दा ६० एमबीपीएसमा चलिरहेको पनि देखाउने गरेको छ । यसले गर्दा ठ्याक्कै कतिको स्पिडमा इन्टरनेट चलिरहेको छ भन्ने जानकारी उपभोक्ताले पाउँदैनन् ।

भायोनेट प्रालिका निर्देशक विनय बोहोरा नेट जाने समस्या माइनर भए पनि धेरैजसो समस्या उपभोक्ताका सामान्य गल्तीले पनि हुने बताउँछन् । ‘कहिले काँही सिस्टममा समस्या आए पनि तत्कालै उपभोक्तालाई जानकारी दिएर मर्मत गरिए पनि कहिलेकाँही उपभोक्ताले राउटरको स्थान परिवर्तन गर्ने, तार बङ्ग्याउने वा थिच्ने लगायतका काम गर्दा पनि नेट स्लो हुने, नचल्ने हुन्छ । तर, उपभोक्ता भने के कारणले चलेन भनेर हेर्नुभन्दा सिधै कम्पनीलाई नै दोष दिने गर्छन् ।’

निर्देशक बोहोरा इन्टरनेट सेयररिङले गर्दा पनि इन्टरनेको स्पिड कम हुने बताउँछन् ।

त्यसो त तपाईं हामीलाई थाहै नभएको मेगाबाइटस र मेगाबिट्स शब्दमा पनि कम्पनीहरू खेल्ने गरेका छन् । उपभोक्ताले खरिद गर्ने समयमा मेगाबाइट्समा इन्टरनेट दिने भने पनि कतिपय कम्पनीहरूले मेगबिट्समा मात्रै इन्टरनेट दिने गर्दछन् ।

आईटी पढ्दै गरेका अशेष मगर इन्टरनेट प्रदायक कम्पनीले टेक्निकल शब्दको 'कन्फ्युजन'मा पारेर खरीदकर्ताले चाहेको भन्दा कम्पनीले चाहेको इन्टरनेट दिने गरेको बताउँछन् । उनि भन्छन्, ‘हामीले चलाएको इन्टरनेट अधिकांशको स्पिड मेगाबिट्समा हुन्छ । तर, कम्पनीले इन्टरनेट प्रतिसेकेन्ड मेगाबाइटमा चल्छ भनेर दिएको हुन्छ । मेगाबाइट मेगाबिट्स भन्दै धेरै हो ।’

विश्वसनीयता गुम्दै

इन्टरनेट कम्पनीहरूले आफ्ना ग्राहकको विश्वास कसरी गुमाउँदैछन् भनेर जाँच्न टाढा जानु पर्दैन । कुनै संस्था वा कम्पनीमा पुगे हुन्छ । अहिले अधिकांश संस्थाले एकभन्दा धेरै कम्पनीको इन्टरनेट राख्ने गरेका छन् ।

अझ त्यसमा पनि ईकमर्स हुन् भने त भायोनेटदेखि वर्ल्डलिंक अनि क्लासिटेकदेखि वेभसर्वरसम्मको नेट एउटै कम्पनीमा जोडिएको पाइन्छ । यसको एक मात्र कारण कुनै पनि समयमा इन्टरनेटमा समस्या नआओस् भन्नु नै हो । तर, दुर्भाग्य यस्ता संस्थाले पनि इन्टरनेटमा समस्या भने भोग्न छोडेका छैनन् ।

ईकमर्स कम्पनी ग्यापुका मार्केटिङ म्यानेजर अभिमन्यु शर्मा नेटमा समस्या आइरहने हुँदा एकभन्दा बढी कम्पनीको इन्टरनेट जोड्नुपर्ने बाध्यता भएको बताउँछन् ।

उनि भन्छन्, ‘नेटको समस्या एकदमै विकराल छ । काम छिटो गर्नुपर्ने र इन्टरनेटमै काम हुँदा एउटै कम्पनीलाई मात्र विश्वास गर्न सकिँदैन । त्यसैले तीनवटा कम्पनीको इन्टरनेट राखेका छौँ । शर्मा तीन वटा कम्पनीको इन्टरनेट जडान गर्दा पनि कहिलेकाँही इन्टरनेट नआइदिँदा दिनभर समस्या झेल्नुपरेको बताउँछन् ।’

प्रकाशित मिति: शुक्रबार, असार ११, २०७८ ०७:५५