छुवाछूत आरोपीलाई छुटाउन शिक्षामन्त्री पुगेकोमा नागरिक आन्दोलनको आपत्ति

A+ A A-

शिक्षामन्त्री कृष्णगोपाल श्रेष्ठकै प्रत्यक्ष संलग्नतामा जातीय भेदभाव तथा छुवाछूत कसुर मुद्दाका आरोपीलाई छुटाइएको भन्दै बृहत् नागरिक आन्दोलनले आपत्ति जनाएको छ ।

बृहत् नागरिक आन्दोलनले बुधबार एक विज्ञप्ति जारी गर्दै मन्त्री नै आरोपीलाई छुटाउन जानु जातजन्य विभेदलाई निरन्तराता दिनु भएको भन्दै आपत्ति जनाएका हुन् ।

बृहत् नागरिक आन्दोलनका अगुवाहरूले यो घटनाले शक्ति दुरुपयोग गरी दलित समुदायमाथि सदियौँदेखि हुने गरेका हिंसा र गम्भीर मानवअधिकार उल्लंघनका घटनालाई राज्यले संरक्षण दिन्छ भन्ने यथार्थको पुनर्पुष्टि भएको बताएका छन् ।

विज्ञप्तिमा भनिएको छ, ‘महानगरीय प्रहरी वृत्त सिंहदरबारमा पुगेर बहालवाला मन्त्रीले नै आरोपीलाई छुटाउन जानु जातजन्य विभेदलाई निरन्तरता दिनु त हो नै, दण्डहीनतालाई थप बलियो बनाउन राज्यशक्तिकै चरम दुरुपयोग गर्नु हो । यो घटनामा मन्त्रीले गरेको शक्तिको दुरुपयोग दलित समुदायमाथि सदियौंदेखि भएका हिंसा र गम्भीर मानवअधिकार उल्लंघनका घटनालाई राज्यले संरक्षण दिन्छ भन्ने यथार्थको पुनर्पुष्टि हो ।’

नागरिक अगुवाहरूले आरोपीलाई सरकारी वकिलको कार्यालयले मुलुकी फौजदारी कार्यविधि संहिता, २०७४ को कुन दफाअनुसार जमानीमा छाडेको हो त्यसको जानकारी पीडितलाई नभएको उल्लेख गरेका छन् ।

उनीहरूले यो घटनाले जातीय विभेदका घटनामा सरकारको उदासिनता र कानुन कार्यान्वयन गर्ने स्थानमा दलितसहित अन्य सीमान्तीकृत समुदायको बहिष्करणको सवालमा निरन्तर भेदभाव हुने यथार्थलाई थप पेचिलो बनाएको औँल्याएका छन् ।

नागरिक आन्दोलनका अगुवाहरूले दलितमाथि भएको विभेदप्रति गम्भीर हुन र यस घटनाको निष्पक्ष छानबिन गरी पीडितलाई न्याय दिन आग्रह गरेका छन् ।

छुवाछुत आरोपमा समातिएकी सरस्वती प्रधानलाई लिन शिक्षामन्त्री श्रेष्ठ आज झण्डावाला गाडी लिएर महानगरीय प्रहरी वृत सिंहदरबार पुगेका थिए । सञ्चारकर्मी रूपा सुनारले आफूलाई दलित भएकै कारण कोठा भाडामा नदिएको भन्दै उजुरी हालेपछि प्रधान पक्राउ परेकी थिइन् ।