'सधैँ ८ सयमा घर पुगिन्थ्यो अहिले ३ हजार भन्छ, धानमा हाल्ने मल किन्ने पैसा गाडी भाडामै सकिने भो'

'सधैँ ८ सयमा घर पुगिन्थ्यो अहिले ३ हजार भन्छ, धानमा हाल्ने मल किन्ने पैसा गाडी भाडामै सकिने भो'

A+ A A-

सामान्य अवस्थामा भीडभाड हुने नयाँ बसपार्क बुधबार दिउँसो करिब २ बजे सुनसान थियो । प्रतिक्षालयमा केही यात्रु गाडीको पर्खाइमा थिए । केही भने यातायात व्यवसायी तथा 'गाडी स्टाफ'सगँ भाडा घटाउन अनुरोध गरिरहेका थिए ।

बर्दियाका बैधी चौधरी त्यही भीडमा थिए । आकासे रङ्गको ज्याकेट र जिन्सको पाइन्ट लगाएका थिए चौधरीले पट्पटी फुटेका खुट्टामा कालो चप्पल लगाएका थिए ।

उनलाई साहुले दिउँसो मोटरसाइकलमा बसपार्क ल्याएर छाडिदिए । त्यसपछि उनी घर फर्कन गाडी खोज्दैछन् । ‘सधैँ ८ सयमा पुर्‍याइदिन्थ्यो अहिले ३ हजार भन्छ । सबैले मौकाको फाइदा उठाइरहेका छन् । जति लिए पनि घर त पुग्नै पर्‍यो,’ चौधरीले भने ।

अघिल्लो वर्षको लकडाउनमा घरै बसेका उनी ५ महिनाअघि साहुले बोलाएपछि काठमाडौं आएका हुन् । आफूले बनेपा आसपास घर बनाउने काम गर्ने गरेको बताउँछन् चौधरी । उनी अहिले निर्माण सामाग्री महंगियो भनेर काम रोकिएपछि घर जान लागेका रहेछन् ।

काम रोकिए पनि उनी दु:खी भने छैनन् । बरु सरकारले मुक्त कमैयालाई दिएको ५ कट्ठामा 'राधा ४ धान' रोप्न भने उत्सुक छन् । ‘साहुले अहिले ८ हजार दिनुभएको छ । धानको ब्याड तयार भइसकेको छ । कर्तनिर्या बजारबाट मल किनेर लैजानु छ । मल किन्ने पैसा गाडी भाडामै जाने भयो,’ उनले सुनाए ।

०००

बसपार्म छिर्ने बित्तिकै वैदेसिक रोजगारीबाट आएका चन्द्र बुढाथोकी, गोपाल चौधरी र जित बहादुर चौधरीसँग भेट भयो ।
दाङ जान लागेका यी युवाहरूसगँ गाडीका स्टाफले जनही २५ सय रुपैयाँ भाडा मागेका रहेछन् ।

‘पहिले १ हजार पर्थ्यो । अहिले बल्ल-बल्ल घटाएर २५ सयमा मान्यो । जानैपर्ने बाध्यता छ के गर्नु । उनीहरूले जति भन्यो त्यति तिर्नै पर्‍यो,’ उनीहरूले भने । प्रहरी प्रशासनले पनि यसमा वास्ता नगरेकोमा भने उनीहरूको दुखेसो छ ।

‘पुलिस घुमिरहेको छ । सबै थाहा छ त्यही पनि केही भन्दैन,’ उनीहरूले भने । यस्ता समस्या देखिए प्रहरी प्रशासनलाई उजुरी दिनुपर्ने नेपाल यातायात व्यवसायी राष्ट्रिय महासघंका मासचिव सरोज सिटौलाले बताए ।

‘सरकारले रोकेको भएर हामीले गाडी चलाउ भनेका छैनौँ । यस्ता कुरा आएमा प्रहरीलाई भन्नुहोला,’ सिटौला भन्छन् ।

धेरै भाडा लिने करिब १ सय जनालाई मुद्दा चलाइएको महानगरीय ट्राफिक प्रहरी महाशाखाका प्रवक्ता श्याम कृष्ण अधिकारीले बताए । यस्तो समस्या परे ट्राफिकमा उजुरी दिन अधिकारीले यात्रुलाई आग्रह गरे ।

‘हामीले छड्के गर्न त नभ्याएको अवस्था हो । यात्रुलाई त्यस्तो समस्या परे उजुरी गर्नुस् । हामी तुरुन्त कारबाही गर्छौँ,’ उनले भने ।

तस्वीरहरू : सुशील श्रेष्ठ/शिलापत्र

प्रकाशित मिति: बिहीबार, असार १०, २०७८ ०९:१२