१४औँ महाधिवेशनमा सभापति चयनका लागि निधिले अघि सारेका चार नीति

A+ A A-

कांग्रेसका संस्थापक नेताहरूका सन्तान अब पार्टीकाे नेतृत्व दोस्रो पुस्ताले लिनुपर्छ भन्नेमा एकमत छन् । नेतृत्वमा भने एक अर्काले दाबी गरिरहेका छन् । विपी कोइरालाका छोरा सशांक कोइराला, गणेशमान सिंहका छोरा प्रकाशमान सिंह र महेन्द्र नारायण निधिका छोरा विमलेन्द्र निधि दोस्रो पुस्ताले नेतृत्व गर्नुपर्ने भन्दै आ-आफ्नै दाबेदारी प्रस्‍तुत गरिरहेका छन् । दोस्रो पुस्ताका अर्का नेता शेखर कोइराला पनि यही दौडमा छन् ।

संस्थापक नेताका सन्तानले वैकल्पिक समूह बनाउँदै महाधिवेशनमा अघि बढ्ने विषयमा छलफल गरिरहेका छन् ।

गत सोमबार निधिको वैवाहिक वर्षगाँठको अवसरमा उनीहरूबीच यो विषयमा छलफल भएपनि निष्कर्षमा पुगिसकेका छैनन् । १४औँ महाधिवेशनमा सभापतिको दाबेदारी पेस गरेका निधिले नेतृत्व चयनका लागि चार मोडल प्रस्ताव गरेका छन् ।

उनको पहिलो विकल्प भनेको १३औँ महाधिवेशनमा सभापतिमा उम्मेदवार बनेका शेरबहादुर देउवा, रामचन्द्र पौडेल कृष्णप्रसाद सिटौला र हाल नेतृत्वको दाबी गरिरहेका सशांक कोइराला, शेखर कोइराला, प्रकाशमान सिंह, निधिमध्ये एउटा नाममा सर्वसम्मतिको प्रयास उनको पहिलो विकल्प छ ।

यस्तै, अर्को प्रस्तावमा दोस्रो पुस्ताबाट नेतृत्वमा दाबी गरिरहेका चारमध्ये एकलाई शीर्षस्थ नेताले चयन गरेमा आफूलाई मान्य हुने बताएका छन् । 'अरुले के गर्छन्, म भन्न सक्दिनँ तर नेताहरूले हामी चारमध्ये कोही एकलाई चयन गर्नुभयो भने नेतृत्वमा दोस्रो पुस्ता स्थापित गर्न म यो विकल्प स्वीकार गर्न तयार छु,' निधि भन्छन् ।

निधिको तेस्रो प्रस्ताव भनेको दोस्रो पुस्ताबाट सभापतिमा दाबेदारी प्रस्तुत गरेका प्रकाशमान सिंह, शशांक कोइराला र शेखर कोइराला मिलेर नेतृत्वको निर्णय लिने भन्ने कुरा छ । यी चार जनाले सर्वसम्मतिले एक जनालाई चयन गरेमा आफूलाई मान्य हुने निधिको भनाइ छ । 'नेतृत्व चयनका लागि प्रयास गर्दा चार जनाबीच कुनै एक नाममा सर्वसम्मती भयो भने मलाई त्यो पनि स्वीकार छ,' निधिले भने ।

उनको चौथो मोडल भनेको नाममा सहमति नभएको अवस्थामा सबैबीच मैत्रीपूर्ण प्रतिस्पर्धा गर्ने भन्ने छ । प्रतिस्पर्धामा सबै सहभागी हुने र मतका आधारमा पछि अरु पछि हट्ने र सर्वाधिक मत प्राप्त गर्नेलाई सघाउने प्रस्ताव उनको छ । '१३औँ महाधिवेशनमा पनि शीर्ष तीन नेताबीच प्रतिस्पर्धा भएको थियो । पछि सिटौलाजीले शेरबहादुर देउवालाई समर्थन गरेपछि उहाँले जित्नुभएको हो । हामी पनि यो मोडलमा जान सक्छौँ,' उनले भने ।

हाल नेतृत्वमा दाबी गरिरहेका निधिले तेस्रो पुस्ताका युवासँग पनि छलफल गरिसकेका छन् । 'सभापतिमा उम्मेदवारी दिने मनस्थिति मेरो छ । बाँकी पदमा क-कसलाई कसरी व्यवस्थापन गर्ने तपाईंहरूले प्रस्ताव लिएर आउनुस्,' अनुपम फुडल्याण्डमा निधिले तेस्रो पुस्ताका नेताहरूसमक्ष सोमबार भनेका थिए ।

त्यस छलफलमा सहभागी हुन गगन थापा, प्रदीप पौडेल, चन्द्र भण्डारीलगायतका युवा नेता पुगेका थिए । युवा नेताहरूले दिएको सुझावबारे प्रदीप पौडेल भन्छन्, 'दोस्रो पुस्ताले नेतृत्व लिने यो अन्तिम अवसर हो । आपसमा समझदारी गरेर अघि बढ्नुपर्ने सुझाव सबैले दियौँ ।'

१३ औँ महाधिवेशनमा देउवाले जनाएको प्रतिबद्धता हाल पालना हुनैपर्ने अडानमा निधि छन् । देउवाले दोहोरिने दाउसहित छलफललाई तीव्रता दिइरहेका छन् । उनले निधिलाई भनिसकेका छन्,'महाधिवेशनमा जसलाई पनि लड्ने अधिकार छ नि ।'

यसका बाबजुद पनि निधि देउवाले आफूसँग गरेको समझदारी पालना हुनेमा विश्वस्त छन् । 'क्रियाशील सदस्यताको टुंगो अझै लागिसकेको छैन । उहाँले अहिले दाबेदारी प्रस्तुत गर्नुभएको हो समझदारीको पालना हुने आशा जीवितै छ नि,' निधि भन्छन् ।

महाधिवेशन प्रतिनिधिको संख्या धेरै हुने प्रदेश नम्बर २ मा आफ्नो दरिलो पकड रहेको निधिको विश्वास छ । आफ्ना मानिसलाई संरक्षण र सहयोग गर्ने निधिको शैलीका कारण देशभर नै उनका पक्षमा केही जमात रहेको कांग्रेसका युवानेता पौडेल बताउँछन् । 'दुई नम्बर प्रदेशमा उहाँको राम्रै मत छ । आफ्ना पक्षका नेता कार्यकर्तालाई संरक्षण र सहयोग गर्ने सवालमा उहाँ राम्रै नेता भएकाले देशभर उहाँ पक्षका कार्यकर्ता छन्,' उनी भन्छन् ।

सभापतिमा आफ्नो दाबेदारीको कारणबारे निधि भन्छन्,'लोकतन्त्रको लागि पटकपटक गिरफ्तारीमा परेँ । संविधान र त्यसका उपलब्धिको संरक्षण र पालनामा दृढ छु । नेतृत्वमा दाबी गर्ने मेरो यो नै अन्तिम मौका हो अर्को पटक त गगन र विश्वप्रकाशका पुस्ता हामीलाई विस्थापित गर्न आइपुग्छन् ।'

दोस्रो पुस्ताका कुनै एक नेतालाई शीर्ष नेताले अघि सारेमा वा ती पुस्ताका चार दाबेदारबीच कुनै एक नाम उनीहरूले नै चयन गरेमा जबरजस्ती प्रतिस्पर्धामा उत्रिने निधिको मुड छैन । निधि देउवाका लागि भने दाबेदारी छोड्ने पक्षमा छैनन् उनीसँग प्रतिस्पर्धा गर्ने निष्कर्षमा छन् ।

प्रकाशित मिति: बुधबार, असार ९, २०७८ १९:२७