बोले प्रधानमन्त्रीः बम पड्काउने आतंककारीलाई सोध्छु, माग के हो ?

A+ A A-

प्रधानमन्त्री केपी शर्मा ओलीले सरकारले नेपाललाई विकास हुन नदिने तत्वहरु अहिले पनि सक्रिय रहेको बताएका छन् ।

राष्ट्रिय मानवअधिकार आयोगको १९औं वार्षिकोत्सवका अवसरमा आज आयोजित कार्यक्रमलाई सम्बोधन गर्दै प्रधानमन्त्री ओलीले नेपाललाई विकास हुन नदिने तत्वहरु अहिले पनि सक्रिय रहेको बताए ।

‘हिजो बम पड्काउने आतंककारी समूहलाई सोध्न चाहन्छु, माग के हो ?’ उनको प्रश्न थियो ।

प्रधानमन्त्रीले संविधानबमोजिम भएको निर्वाचनबाट सरकार निर्माण भएको उल्लेख गर्दै भने, ‘अब के चाहियो ?’ उनले सिलिन्डर बम हानेर आतंकित पार्ने र लुटपाटका लागि क्रान्तिको नाम लिने यो मानवअधिकार का लागि खतरनाक पक्ष भएको बताए ।

नेत्रविक्रम चन्द (विप्लव) नेतृत्वको नेकपा समूहको उद्देश्य पैसा उठाउने बाहेक केही पनि नभएको प्रधानमन्त्रीको भनाइ छ । नेपाललाई अशान्तितिर लैजाने प्रयासलाई सरकारले रोक्ने प्रधानमन्त्रीको चेतावनी पनि दिए ।

प्रधानमन्त्री ओलीले सरकारले प्रेस स्वतन्त्रतामा शतप्रतिशत ग्यारेन्टी गर्ने समेत बताए । संविधानमै रहेको प्रेस स्वतन्त्रताको व्यवस्थालाई सरकारले सम्मान गर्ने उनकाे भनाइ छ ।

‘प्रेस स्वतन्त्रताको सम्बन्धमा संविधानले व्यवस्था गरेभन्दा सरकार एक अक्षर पनि तलमाथि गर्दैन,’ प्रधानमन्त्री ओलीले भने ।

प्रधानमन्त्रीले पत्रकारितामा कतिपय विसंगति देखिएको भन्दै सुधारको आवश्यकता भने औंल्याए ।

‘समाचार सत्यमा आधारित हुनुपर्छ, कसैलाई व्यक्तिगत रुपमा र रिस उठेको भरमा सभ्यताको सीमा नाघ्न मिल्दैन,’ प्रधानमन्त्री ओलीले भने, ‘सभ्य ढंगले समाचार प्रस्तुत गर्न नेपाली भाषामा शब्दको भण्डार छ ।’

प्रधानमन्त्री ओलीले नेपाललाई मानवअधिकार मा कमजोर भएको देश हुन नदिने समेत बताए । उनले मानवअधिकार लाई एउटा पक्षबाट मात्रै हेर्न नमिल्ने बताउँदै विभिन्न पक्षबाट हेर्नुपर्ने बताए ।

प्रधानमन्त्रीले मानवअधिकारको प्रश्न लोकतन्त्रमा नै हुने बताउँदै तानाशाहीमा मानवअधिकार भन्ने शब्द नै नहुने बताए ।

‘तानाशाहीमा मानवअधिकारको चर्चै हुँदैन,’ उनले भने ।

घरघरमा हुने महिला र बालबालिकाको मानवअधिकार उल्लंघनका घटना रोकिनुपर्ने बताउँदै प्रधानमन्त्री ओलीले घरघरमा मानवअधिकार को संरक्षण हुनुपर्नेमा जोड दिए ।

प्रकाशित मिति: मंगलबार, जेठ १४, २०७६ ०२:५२