घुम्ने मेचमाथि विमलेन्द्र निधिः ‘ज्योतिषीले मलाई छिट्टै शिखरमा पुग्छौ भनेका छन्’ (भिडियाे)

घुम्ने मेचमाथि विमलेन्द्र निधिः ‘ज्योतिषीले मलाई छिट्टै शिखरमा पुग्छौ भनेका छन्’ (भिडियाे)

A+ A A-

आउँदो १४औँ महाधिवेशनमा सभापतिका आकांक्षी विमलेन्द्र निधिले हिजो आफ्नो बानेश्वरस्थित निवासमा कांग्रेस स्थापनाकालका शीर्षस्थ नेताहरूका अरु दुई छोराहरूसँग संवाद गरे । यसअघि सभापति शेरबहादुर देउवालाई सघाउँदै आएका निधिले शिलापत्रका प्रधान सम्पादक बसन्त बस्नेतसँग यो भिडियो अन्तर्वार्ताका लागि कुरा गर्ने क्रममा विगतका केही महत्त्वपूर्ण समझदारी र निर्णयहरूको खुलासा गरेका छन् । त्यसले कांग्रेसकाे भावी नेतृत्वमा आफ्नाे दाबेदारी सही ठहर्‍याउने उनकाे दाबी छ ।

विवाहकाे तीसाैँ वर्षगाँठ पारेर हिजो (सोमबार) निजी निवासमा महामन्त्री डा. शशांक कोइराला र नेता प्रकाशमान सिंहसँग भएका कुराकानीबारे आफ्नै मुखबाट केही खोलेका छन् । अनि कांग्रेसमा नेता चुनिने चार सम्भावित बाटा र आफ्नो तयारीबारे पनि बोलेका छन् ।

रोचक के छ भने, विमलेन्द्र निधिले यो पल्ट देउवालाई चुनौती दिँदै नेतृत्वको दाबी गर्दै छन् । उनै निधिको पनि शैली देउवाको झैँ रहेछ, ज्योतिषीहरूमा एकदमै विश्वास गर्ने । एकदम पढालेखा, देशीविदेशी ज्योतिषीहरूकहाँ उनी पुग्दा रहेछन् भन्ने कुरा यही अन्तर्वार्तामा उनले खोले । र, भने, ‘ज्योतिषीले मलाई छिट्टै शिखरमा पुग्छौ भनेका छन् ।’

उनलाई सोधियो, ‘त्यो त उनीहरूले देउवालाई पनि भनेका छन् । प्रधानमन्त्री बन्ने योग र सभापति बन्ने योगबारे उनीहरूले अलगअलग व्याख्या गरेका हुन् कि ?’

‘मैले देउवाजीलाई प्रधानमन्त्रीमा सहयोग गर्ने, उहाँले विगतदेखि नै अबको पालोमा तपाईंलाई मैले छाड्ने हो भन्नुभएकै छ ।’

‘देउवा र तपाईंका ज्योतिषी एउटै त परेनन् ?’

‘मेरा अरु पनि ज्योतिषी छन् । विश्वविद्यालयमा पढाउने ज्योतिषीहरू ।’ निधिले थपे, ‘मैले शेखर कोइराला, शशांकजी, प्रकाशमानजी, सिटौलाजी सबैसँग कुरा गरिरहेको छु । युवाहरूसँग पनि मेरो संवाद चलिरहेको छ ।’