गण्डकी प्रदेश : मन्त्रालय टुंग्याउन सकस भएपछि नेताहरू भन्छन्- गठबन्धन भन्या गाह्रो रहेछ

गण्डकी प्रदेश : मन्त्रालय टुंग्याउन सकस भएपछि नेताहरू भन्छन्- गठबन्धन भन्या गाह्रो रहेछ

मुख्यमन्त्री तथा मन्त्रिपरिषद् कार्यालय ।

A+ A A-

सरकार गठन भएको १० दिनसम्म पनि गण्डकी प्रदेशमा मन्त्रीको टुंगो लाग्न सकेको छैन । गण्डकीमा २९ जेठमा कांग्रेसको नेतृत्वमा सरकार बनेको थियो । कृष्णचन्द्र नेपाली पोखरेल मुख्यमन्त्री बनेका थिए ।

२९ जेठमा मुख्यमन्त्रीसहित पाँच जनाले शपथ लिएका थिए । शपथ लिएका चार मन्त्रीको मन्त्रालय अझै टुंगो लागेको छैन । बाँकी ६ जना कुन पार्टीबाट को-को सरकारमा जाने भन्ने पनि निश्चित भइसकेको छैन ।

सरकारमा सहभागी हुन लागेका सबै दल र स्वतन्त्र सांसदले 'आकर्षक' मन्त्रालयमा दाबी गर्दा मन्त्रालय बाँडफाँटमा सकस भएको छ । ११ वटा मन्त्रालय रहेको गण्डकी प्रदेशमा मन्त्रालय र मन्त्री टुंग्याउन दलबीच निरन्तर छलफल भइरहेको छ ।

कुन मन्त्रालय कसले पाउने भन्नेबारे अन्तिम निर्णय हुन नसकेको माओवादी संसदीय दलका नेता हरिबहादुर चुमानले बताए । ‘धेरै छलफल भइसकेको छ । निर्णय गर्नमात्रै बाँकी हो । निर्णय गर्न एउटा एउटा कुराले अड्किराछ,’ उनले शिलापत्रसँग भने, ‘त्यो समाधान भए पाँचै मिनेटमा सकिन्छ । त्यो नमिल्दा कति दिन लाग्ने हो लाग्ने हो ।'

हरिबहादुर चुमान

मन्त्रीको टुंगो लगाउने जिम्मा आफूहरूले केन्द्रीय कार्यालयलाई दिएको चुमानले बताए । यसमा प्रदेशका नेताको सुझाव लिने काम भइरहेको उनको भनाइ छ । नेता चुमानले गठबन्धन सरकार बनाउँदा निकै गाह्रो महसुस गरेका छन् ।

‘सबै केन्द्रीय कार्यालयले फाइनल गर्ने भन्ने छ । मलाई मन्त्रालय टुंग्याउने जिम्मा हो,’ पूर्वकानुनमन्त्री रहेका उनले भने, ‘मन्त्रालय यहाँ एउटालाई चित्त बुझाए अर्को बटारिन्छ, अर्कोलाई चित्त बुझाए अर्को बटारिन्छ । यो गठबन्धन भन्या गाह्रै चिज रहेछ ।’

गण्डकी प्रदेशमा कांग्रेस, माओवादी, राष्ट्रिय जनमोर्चा, जसपा र एक स्वतन्त्र सांसद एक ठाउँमा उभिँदा कांग्रेसका पोखरेल मुख्यमन्त्री बनेका थिए । जनमोर्चा मन्त्रिमण्डलमा सहभागी नहुने पक्षमा छ । कसले कति मन्त्रालय पाउने भन्ने विषयमा दलबीच असहमति छैन । कांग्रेसले मुख्यमन्त्रीसहित चार, माओवादीले चार, जसपाले दुई र स्वतन्त्र सांसद राजीव गुरुङले एक मन्त्रालय पाउने सहमति छ ।

गण्डकीको मन्त्रीमण्डल : सबै सांसद आकांक्षी, पहुँच पुग्नेलाई मन्त्री !

अर्थ र भौतिक पूर्वाधार मन्त्रालयमा दलबीच कुरा मिलेको छैन । कांग्रेस, माओवादी, जसपा र स्वतन्त्र सांसद गुरुङको दाबी यीनै मन्त्रालयमा छ । दुई मन्त्रालयमा चार आकांक्षी हुँदा अन्तिम सहमति हुन नसकेको हो । कांग्रेसले जसपालाई अर्थमन्त्री दिने भनेर सहमति गरे पनि दिइएको छैन ।

प्रदेशमा विवाद आए त्यसको असर केन्द्रको गठबन्धनलाई पर्ने डर पनि छ । ‘यहाँको कामले गठबन्धनलाई असर परे माथि पनि असर पर्छ । अविश्वास पैदा हुनसक्छ । त्यस्तो गर्नु भएन । नेताहरूले टुंग्याइदिनुस् । नेताहरूले भनेको मानिहाल्छौँ,’ चुमानले भने ।

मुख्यमन्त्रीसहित पाँच जनाले शपथ लिइसकेकाले सम्भवत अबको चार दिनमा बाँकी ६ जना मन्त्री नियुक्त हुने छन् । अब कांग्रेसबाट दुई, माओवादीबाट तीन र जसपाबाट एक जना मन्त्री बन्ने छन् ।

जसपालाई दुई मन्त्रालय दिने सहमति दलहरूबीचमा छ । प्रदेशसभामा जसपाका दुई जनामात्रै सांसद रहेकोमा एक जना मन्त्री नियुक्त भइसकेका छन् । नियुक्त हुन बाँकी ६ जनामध्ये जसपा सांसद धनमाया लामा मन्त्री बन्ने लगभग पक्का छ ।

गत २९ जेठमा कांग्रेसबाट मुख्यमन्त्रीमा कृष्णचन्द्र नेपाली पोखरेल र मन्त्रीमा कुमार खड्काले शपथ लिएका थिए । त्यस्तै माओवादीबाट मधुमाया अधिकारी गुरुङ, जसपाबाट हरिशरण आचार्य र स्वतन्त्र सांसद राजीव गुरुङले शपथ लिएका थिए ।

प्रकाशित मिति: मंगलबार, असार ८, २०७८ ०८:१३