सभापतिमा दोहोरिने देउवाको दाउ, पुरानो वाचा तोडेर कसरी मनाउलान् निधिलाई ?

A+ A A-

१३औँ महाधिवेशनमा सभापतिमा शेरबहादुर देउवालाई आफूले सहयोग गर्ने भन्दै विमलेन्द्र निधिले १४औँ महाधिवेशनमा आफूलाई सभापतिको उम्मेदवारमा सहयोगको प्रतिबद्धता खोजे । देउवाले त्यसबेला जनाएको प्रतिबद्धता स्मरण गर्दै नेता निधि सुनाउँछन्, ‘म पटक-पटक प्रधानमन्त्री पनि भएँ, कांग्रेस प्रजातान्त्रिकको सभापति पनि भइसकेँ । कांग्रेसको सभापति भएपछि म विश्राम लिन्छु । नेतृत्वमा दोहोरिन जोडबल गर्दिनँ ।’

देउवाको यही आश्वासनपछि निधिले सभापतिमा उनलाई सहयोग गर्दै केन्द्रीय सदस्यको उम्मेदवार बने । शनिबार देउवा निवास बूढानीलकण्ठमा प्रदेश १ र २ का केन्द्रीय सदस्यहरूसँगको छलफलमा निधिले यो कुराको पनि स्मरण गर्दै समापतिमा आफ्नो पनि दाबेदारी रहने कुरा खुलस्त भने । ‘यतिञ्जेल मैले तपाईंलाई सहयोग गरेँ । अब तपाईं मलाई सहयोग गर्नुस् । तपाईंको सहयोगमै सभापति जित्ने हो,’ निधिको भनाइ थियो ।

निधिसँगको विगतको वाचाबारे देउवाले कुनै जवाफ दिएनन् । ‘सभापतिमा जो पनि लड्न पाउँछ नि,’ निधिको आग्रह भुइँमा खस्न नपाउँदै देउवाले भने । बैठकमा देउवाले एक कार्यकालका लागि आफूले तयारी थालनी गरिसकेकाले सहयोगका लागि सबैलाई आग्रह गरे । ‘मैले एक कार्यकालको तयारी थालिसकेँ तपाईंहरूले मलाई सहयोग गर्नुस्,’ सभापति देउवाको भनाइ उद्धृत गर्दै डिला संग्रौलाले भनिन् ।

१४औँ महाधिवेशनको कार्यतालिका पारित भएसँगे देउवाले आफूले सभापतिमा दोहोरिन चाहेको भन्दै छलफललाई तीव्रता दिएका छन् ।

किन दोहोरिन चाहेका छन् देउवा ?

शनिबार र आइतबार भएको छलफलमा देउवाले आफू दोहोरिन चाहेको कारणबारे समेत आफूनिकट केन्द्रीय सदस्यहरूलाई बताएका छन् । आफ्नो नेतृत्वमा पार्टी कमजोर भएको कलंक मेटाउने चाहना उनले प्रकट गरिरहेका छन् ।

पार्टीको लोकप्रियता आफ्नो कार्यकालमा खस्किएको आरोपलाई मेटाउन चाहेकाले उनले दोस्रोपटक दाबेदारी दिन थालेको उनीनिकट नेताहरू बताउँछन् । नेकपा विभाजनदेखि एमालेभित्रको किचलोका कारण कम्युनिस्टप्रतिको जनमत ओरालो लागेकाले कांग्रेसको सिट संख्या बढ्नसक्ने देउवाको आकलन छ । त्यसकै निम्ति उनी सभापतिमा दोहोरिन चाहेका छन् ।

‘पार्टीलाई एकढिक्का बनाएर अघि बढ्न र कांग्रेसको स्थिति सुधारका निम्ति सभापतिमा उहाँ फेरि पनि दोहोरिन खोज्नुभएको छ । अहिलेको राजनीतिक परिस्थितिका कारण पन उहाँ नै निर्विकल्प उम्मेदवार हो भन्ने सुझाव नेताहरूले दिइरहनुभएको छ,’ केन्द्रीय सदस्य महालक्ष्मी उपाध्याय डिना भन्छिन् ।

आइतबार गण्डकी र बागमती प्रदेशका आफूनिकट केन्द्रीय सदस्यहरूसँगको छलफलमा पनि देउवाले भनेका छन्, ‘राजनीति र पार्टीलाई एकढिक्का बनाएर अघि बढ्न मैले सभापतिमा दोहोरिने निर्णय गरेको छु । तपाईंहरूले सहयोग गर्नुस् ।’

निधिको व्यवस्थापन गर्न देउवालाई सुझाव

आइतबारको छलफलमा सहभागी नेताहरूले आफ्नो समूहमा विभाजन आउन नदिन सभापति देउवालाई सुझाव दिएका छन् । आफ्नो समूहलाई एकढिक्का बनाउन भन्दै नेताहरूले नेता निधिको उचित व्यवस्थापन गर्न सुझाएका थिए ।

सभापतिमा नेता निधिले समेत दाबेदारी नछाड्ने बताएकाले निधिको सम्मानजनक हैसियतको सुनिश्चितता गर्न देउवालाई सुझाएको नेता शंकर भण्डारीले बताए । ‘यो समूहबाट विमलेन्द्र निधिले पनि दाबेदारी दिँदै हुनुहुन्छ । उहाँको उचित व्यवस्थापन गरेर समूहलाई एकढिक्का बनाउनुस् भन्ने साथीहरूको साझा सुझाव थियो,’ नेता शंकर भण्डारीले भने ।

नेता निधिको विषयमा कुरा उठेपछि देउवाले उनीसँग केही न केही समझदारी बन्ने भन्दै चिन्ता नलिन केन्द्रीय सदस्यहरूलाई आग्रह गरेका थिए । ‘उहाँले सभापतिमा सहयोग गर्न आग्रह गर्नुभएको छ । उहाँसँग कुराकानी गरेर म मिलाउँछु। चिन्ता नलिनुस्,’ देउवाले बैठकमा भनेका थिए ।

नेता निधि भने व्यवस्थापनको मुडमा देखिँदैनन् । उनले शनिबार पनि यो विषयमा देउवालाई जानकारी गराइसकेका छन् । राजनीतिमा नेतृत्व हस्तान्तरण महत्त्वपूर्ण हुने भन्दै उनले अर्को महाधिवेशनसम्म आफूभन्दा तल्लो पुस्ताले अवसर पाउनुपर्ने भएकाले हाल आफूले दाबेदाबरी नछाड्ने बताउँछन् ।

‘पार्टीको अर्को महाधिवेशनसम्म अर्को पुस्ताले पनि अवसर पाउनुपर्छ । नयाँ पुस्ताको पालोमा गगन-विश्वप्रकाशका पुस्तासँग भिड्ने मनस्थितिमा म छैन,’ उनी भन्छन् ।

गत शुक्रबारको कांग्रेस केन्द्रीय समिति बैठकले भदौ १६ गते देखि १९ सम्म महाधिवेशन गर्ने कार्यतालिका पारित गरेको थियो । महाधिवेशनको कार्यतालिका पारित भएसँगै सभापति देउवाले आफ्नो समूहबाट सभापतिमा सर्वसम्मत उम्मेदवार बन्न छलफललाई तीव्रता दिएका छन् ।

प्रकाशित मिति: आइतबार, असार ६, २०७८ १८:२३