युरोकप २०२० : जर्मनीविरुद्ध पहिलो गोल गर्ने दाउमा रोनाल्डो, फ्रान्स र स्पेनले जित निकाल्लान् ?

युरोकप २०२० : जर्मनीविरुद्ध पहिलो गोल गर्ने दाउमा रोनाल्डो, फ्रान्स र स्पेनले जित निकाल्लान् ?

A+ A A-

युरोकप २०२० अन्तर्गत शनिबार राति तीन खेल हुँदैछन् । आज उपाधिका दावेदार मानिएका चार देश खेल मैदानमा उत्रिँदैछन् । जसमा फ्रान्स, पोर्चुगल, जर्मनी, स्पेन रहेका छन् ।

नेपाली समयअनुसार बेलुका पौने ७ बजे फ्रान्सले हंगेरीको सामना गर्दैछ । पहिलो खेलमा जर्मनीलाई हराएको फ्रान्सले पोर्चुगलसँग हार बेहोरेको हंगेरीसँग खेल्नेछ ।

स्टार खेलाडीले भरिएको फ्रान्सले हंगेरीविरुद्ध जित निकाल्न सक्ने धेरैको अनुमान छ । तर, पोर्चुगलविरुद्धको खेलमा हंगेरीले जुन प्रदर्शन गरेको थियो त्यो हेर्दा फ्रान्सले जित निकाल्न उती सहज भने देखिँदैन । पोर्चुगलविरुद्धको खेलमा हंगेरी निकै आक्रमक देखिएको थियो । अन्तिम ६ मिनेटमा पोर्चुगलको जादु चल्दा हंगेरी हार्न पुगेको थियो ।

हंगेरीले राम्रो डिफेन्स खेल देखाउनेछ । फ्रान्समा भने उत्कृष्ट क्लबहरूलाई लिड गरेका ‘स्ट्राइगर’हरू छन् । त्यसैले उनीहरूबीचको प्रतिष्पर्धा रोचक हुने देखिन्छ ।

फ्रान्सविरुद्ध हंगेरीले यसअघि २३ खेल खेलेको छ । जसमा हंगेरीको दवदवा देखिन्छ । हंगेरीले १२ वटा खेल जित्दा फ्रान्सले जम्मा ८ खेल जितेको छ । बाँकी ३ खेल बराबरीमा सकिएका छन् ।

तर, पछिल्ला ५ खेललाई हेर्ने हो भने हंगेरीलाई फ्रान्सले जितको कुनै मौका नदिन सक्छ । ५ खेलमा ५ वटै खेल फ्रान्सले आफ्नो पोल्टामा पारेको छ ।

शनिबार हुने दोस्रो खेल हो, पोर्चुगल भर्सेस जर्मनी । नेपाली समयअनुसार राति पौने १० बजे यी दुई देश मैदानमा उत्रिनेछन् । यस खेललाई प्रतीक्षित खेल मानिएको छ । दुवै टिम उपाधिका दावेदार मानिएका कारण पनि यस खेल प्रतीक्षित बनेको छ ।

पहिलो खेलमा फ्रान्ससँग हारेको जर्मनीले सो खेलमा पनि उत्कृष्ट प्रदर्शन गरेको थियो । आत्माघाती गोलका कारण जर्मनीले फ्रान्ससँग हार बेहोर्नु परेको थियो । नत्र, फ्रान्सविरुद्ध जर्मनीले दवदवा बनाएको थियो ।

यता पहिलो खेलमा हंगेरीविरुद्ध ३-० को जित बनाएको पोर्चुगल पनि कमजोर छैन । स्टार खेलाडी क्रिस्टियानो रोनाल्डो भएको पोर्चुगलले जर्मनीलाई हराउन सक्ने धेरैको अनुमान छ ।

इतिहासलाई हेर्ने हो भने पोर्चुग र जर्मनीले १८ खेल खेलेका छन् । जसमा जर्मनीले १० खेल जितेको छ । ५ खेल बराबरी हुँदा पोर्चुगलले ३ खेलमा जित निकालेको छ । पछिल्लो ५ खेलमा जर्मनीले ४ खेल जितेको छ भने पोर्चुगलले जम्मा १ खेल जितेको छ । जर्मनी र पोर्चुगलबीचको अन्तिम खेल फिफा वर्ल्डकपमा भएको थियो । जसमा जर्मनीले पोर्चुगललाई ४-० ले हराएको थियो ।

पोर्चुगलका लागि सबैभन्दा आश गरिएका खेलाडी नै रोनाल्डो हुन् । तर, रोचक कुरा रोनाल्डोले आजसम्म जर्मनविरुद्ध कुनै गोल गर्न सकेका छैनन् । जर्मनीकै होम ग्राउण्डमा हुने आजको खेलमा रोनाल्डो जर्मनीविरुद्ध पहिलो गोल गर्ने दाउमा छन् ।

त्यस्तै, आज राति पौने १ बजे स्पेन पोल्याण्डविरुद्ध मैदानमा उत्रिनेछ । स्विडेनविरुद्ध गोलविहीन बराबरी खेलेको स्पेनको खेल निकै आकर्षक छ । स्पेनको पासको धेरैले प्रशंसा गर्छन् । स्विडेनविरुद्ध पनि दवदवा बनाएको स्पेनले गोल गर्न भने सकेको थिएन ।

यता पहिलो खेलमा हार बेहोरेको पोल्याण्ड स्पेनविरुद्ध मैदान उत्रिन पक्कै विशेष योजना बनाएको हुनुपर्छ । स्टार खेलाडी रोबर्ट लेवान्डोस्की सामेल पोल्याण्डले स्लोभाकियासँग हार बेहोरेको थियो । यदि यस खेलमा पनि हार बेहोर्नु परे पोल्याण्ड नकआउट चरणमा पुग्नेछैन । त्यसैले पोल्याण्ड पनि भरपूर तयारीका साथ मैदान उत्रिनेछ ।

स्पेन र पोल्याण्डले १० खेल खेलेका छन् । जसमा स्पेनले ८ खेल जितेको छ भने पोल्याण्डले जम्मा १ खेल जित्न सफल देखिएको छ । १ खेल बराबरीमा सकिएको थियो । ‘हेड टु हेड’ हेर्दा पोल्याण्डका लागि स्पेन विशेष चुनौती हुने देखिन्छ ।

प्रकाशित मिति: शनिबार, असार ५, २०७८ १७:५०