बाढीले हाइड्रोको संरचना बगायो, मजदुरले फड्के तरेर जोगाए ज्यान

A+ A A-

कास्कीको मादी गाउँपालिकामा निर्माणाधीन ४४ मेगावाटको सुपरमादी जलविद्युत् आयोजनामा बाढीले क्षति पुर्‍याएको छ । आयोजनाका अनुसार मंगलबार मादी नदीमा आएको बाढीले बाँध र पावर हाउसमा क्षति पुगेको छ ।

बाढीले चारवटा स्क्याभेटर, चारवटा टिपर, सिमेन्ट, ढुंगालगायत निर्माण सामग्री बगाएको हाइड्रोका कार्यकारी अध्यक्ष पुष्पज्योति ढुंगानाले बताए । करिब ७० प्रतिशत काम सकिएकोमा बाढीले १ अर्बबराबरको क्षति भएको अनुमान आयोजनाको छ ।

आयोजनाको बाँध निर्माणमा खटिएका डेढ सय मजदुरको २४ घण्टापछि उद्धार गरिएको छ । आयोजना मादी–१ र २ को सीमानामा पर्छ । मादी नदी तरेर मजदुर काममा जान्छन् । मंगलबार पानी परेर आएको भीषण बाढीले १ सय ६० जना मजदुर बाँध क्षेत्रमै अलपत्र परे ।

नेपाल आर्मी, जनप्रतिनिधि र स्थानीयको प्रयासमा २४ घण्टापछि बुधबार बिहान उनीहरूको उद्धार गरिएको छ । मादी-१ का वडाध्यक्ष एकजंग गुरुङका अनुसार डोरी र काठको फड्केको सहायतामा उनीहरूको उद्धार गरिएको हो ।

‘उता नदीतिरबाट जान मिलेन । हिजै बेलुका प्रयास गरेको । पानी परेपछि सकेन,’ वडाध्यक्ष गुरुङले शिलापत्रसँग भने, ‘रातभर त्यहीँ भीरको अक्करमा बसे । बिहानै खोला छेउको झाडी हटाएर बाटो बनायौँ ।’

स्थानीय कलबन्दी खोलामा सेना, जनप्रतिनिधि र स्थानीयले फड्के बनाए । फड्के र डोरीमा समाएर मजदुरलाई खोला तराईको वडाध्यक्ष गुरुङले बताए । ‘चिया, खाजाको व्यवस्था गरेर सबै मजदुरलाई हाइड्रोको जिम्मा लगाइएको छ । यहाँ अरू हाइड्रोमा पनि क्षति पुगेको छ,’ उनले भने । उनका अनुसार मादी-२ को सेती खोलामा निर्माणाधीन नामर्जुङ जलविद्युत आयोजनाको पावरहाउसमा पनि बाढी पसेको छ ।

सुपर मादी जलविद्युत् आयोजनाको काम असारमै सक्ने तयारी थियो । तर, कोरोनाको जोखिमले नियमित काम हुन पाएन । तीन वर्षमा काम सक्ने गरी २०७५ सालमा निर्माण थालिएको यो आयोजना पोखराबाट २३ किलोमिटर उत्तर–पश्चिममा पर्छ । असारसम्म काम सक्ने भनिए पनि फेरि निर्माण अवधि चैतसम्म धकेलिने हाइड्रोका अध्यक्ष ढुंगानाले बताए ।