नेपाल सीआरएस कम्पनीको 'मेरी संगिनी' नामक नयाँ मोबाइल एप सार्वजनिक

A+ A A-

नेपाल सीआरएस कम्पनीले परिवार योजनासम्बन्धी 'मेरी संगिनी' नामक नयाँ मोबाइल एप निर्माण गरेको छ । उक्त एप कम्पनीले यूएसएआईडीको आर्थिक एवं सप्स प्लसको प्राविधिक सहयोग तथा राष्ट्रिय स्वास्थ्य शिक्षा, सूचना तथा सञ्चार केन्द्रको समन्वयमा निर्माण गरेको हो ।

अस्थाई र छोटो अवधिका परिवार योजनाका साधनहरूबारे विस्तृत जानकारी दिने उद्देश्यले 'मेरी संगिनी' मोबाइल एप सुरु गरिएको कम्पनीको भनाइ छ ।

'मेरी संगिनी'मार्फत अस्थाई तथा छोटो अवधिका परिवार योजनाका साधनहरूसम्बन्धी तथा ती साधनको प्रयोगबाट पर्न जाने साधारण प्रतिअसरहरूको समेत जानकारी प्रजनन् उमेरका जोकोहीलाई अति उपयोगी हुने बताइएको छ । विशेष गरी किशोर तथा किशोरी एवम् नवविवाहित जोडीहरूलाई यो एप अत्यन्त उपयोगी रहने कम्पनीको विश्वास छ ।

'मेरी संगिनी' एपमा रहेको 'प्राय: सोधिने प्रश्नहरू' खण्डले परिवार योजनाका अस्थाई तथा छोटो अवधिका साधन प्रयोगकर्ताहरूलाई ती साधनका बारेमा विस्तृत जानकारी दिइनुका साथै नयाँ प्रयोगकर्ताहरूलाई साधनहरूको सुसूचित छनोट गर्न उक्त एपले मद्दत गर्नेछ ।

साथै, अस्थाई तथा छोटो अवधिका परिवार योजनाका साधन उपलब्ध गराउने नजिकैको औषधि पसल, क्लिनिक र संगिनी सेवा केन्द्रको ठेगाना र नक्सा समेत उक्त एपमार्फत सजिलै उपलब्ध हुने हुँदा आफू नजिकैको तालिमप्राप्त र दक्ष सेवा केन्द्रबाट आफूलाई उपयुक्त हुने साधनको सेवा लिन मद्दत पुग्नेछ ।

परिवार कल्याण महाशाखाका निर्देशक डा.तारा नाथ पोख्रेलले परिवार योजनाका साधनहरूको पहुँच बढाउन मोबाइल प्रविधिको भूमिका अत्यन्त महत्वपूर्ण रहेको र मेरी संगिनी एपले उपभोक्ताहरूलाई अस्थाई गर्वनिरोधक साधनबारे सुसूचित छनोट गर्न सहयोग पुर्‍याउने बताए ।

त्यस्तै, राष्ट्रिय स्वास्थ्य शिक्षा, सूचना तथा संचार केन्द्र (NHEICC) का निर्देशक डा. राधिका थपलियाले उक्त एपले परिवार योजना र यसका साधनहरूबारे विस्तृत जानकारी सजिलोसँग हासिल गर्न मद्दत हुने बताए ।

नेपाल सीआरएस कम्पनीका प्रबन्ध निर्देशक जीवलाल पोखरेलले मातृ मृत्युदर घटाउन परिवार योजनाको ठूलो भूमिका रहेको र प्रयोगकर्तामाझ सही र अद्यावधिक सूचनाको पहुँच बढाउनमा सञ्चार प्रविधिको ठूलो महत्त्व रहेको बताए ।

कम्पनीले सामाजिक बजारीकरणको सिद्धान्तअनुसार विगत चार दशकदेखि परिवार योजना, मातृ तथा बाल स्वास्थ्य र यौनरोग रोकथामका साधनहरू बिक्री वितरण तथा व्यवहार परिवर्तनसम्बन्धी कार्यक्रम सञ्चालन गर्दै आएको छ ।

कम्पनीले परिवार योजनाका साधनहरू ढाल, प्यान्थर, संगिनी तीन महिने सुई, निलोकन ह्वाइट, सुनौलो गुलाफ, नवजीवन तथा आकस्मिक गर्भ निरोधक चक्की इकोन नेपालका ७७ वटै जिल्लामा उपलब्ध गराइरहेको जनाएको छ ।

प्रकाशित मिति: मंगलबार, असार १, २०७८ १४:२६