नेपाललाई प्रचण्ड र देउवाको आग्रह- ओलीको सर्वसत्तावाद अन्त्य गर्न सहकार्य नछोडौँ

नेपाललाई प्रचण्ड र देउवाको आग्रह- ओलीको सर्वसत्तावाद अन्त्य गर्न सहकार्य नछोडौँ

A+ A A-

कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल 'प्रचण्ड'ले पूर्वप्रधानमन्त्री माधवकुमार नेपाललाई विपक्षी गठबन्धनको राजनीतिक एजेण्डामा साथ नछोड्न आग्रह गरेका छन् ।

एमाले अध्यक्ष ओलीले असार पहिलो साता नेपाल समूहको समेत सहभागितामा स्थायी कमिटी बैठक राख्ने तयारी गरेका छन् । पार्टी एक राख्ने प्रयत्नसहित २ जेठ २०७५ अघिको अवस्थाको स्थायी कमिटी बैठक राख्ने तयारी गरेका बखत उनीहरूले विपक्षी गठबन्धन नछोड्न नेता नेपाललाई आग्रह गरेका हुन् । नेता नेपाललाई भेट्न कांग्रेस सभापति देउवा र माओवादी केन्द्रका अध्यक्ष प्रचण्ड कोटेश्वर पुगेका थिए ।

भेटमा देउवाले संविधान र लोकतन्त्रको रक्षाका लागि राजनीतिक सहकार्यको निरन्तरता जरुरी रहेको बताएका थिए । ‘ओलीले संविधान र लोकतन्त्र दुवैलाई समाप्त पार्ने गतिविधि जारी राखेका छन् । हाम्रो राजनीतिक सहकार्यलाई अझै बलियो बनाऔँ । ओलीको सर्वसत्तावाद अन्त्यका लागि तपाईंको निरन्तर सहयोग चाहिन्छ,’ बैठकमा देउवाको भनाइ थियो ।

यस्तै, प्रचण्डले विपक्षी गठबन्धनका राजनीति एजेण्डाका जित हुँदै गएको बताएका थिए । नेता नेपालकै सहयोगका कारण प्रदेशदेखि केन्द्रमा ओलीलाई कमजोर बनाइएको भन्दै उनले पनि राजनीतिक सहकार्यलाई निरन्तरता दिन आग्रह गरेका थिए ।‘तपाईंहरूको पार्टी एकढिक्का हुनैपर्छ, पार्टी विभाजन हितकर हुँदैन । तपाईंले गलत कदमको सधैँ प्रतिवाद गर्दै आउनुभएको छ । अहिले विपक्षी गठबन्धनबाट हामीले ओलीका असंवैधानिक कदमको विरोध गरेका हौँ । हाम्रो सहकार्यबाट उनलाई गतिलै धक्का पुगेको छ । राजनीतिक सहकार्य नछोड्नुहोला,’ प्रचण्डको आग्रह थियो ।

देउवा र प्रचण्डको आग्रहमा नेता नेपालले आफू सधैँ गलत कदमको विपक्षमा उभिने बताएका थिए । ‘संविधान र व्यवस्थापाको रक्षाका निम्ति रचनात्मक सहकार्यका लागि म जहिले पनि तयार छु । हामीहरूबीच अविश्वास पैदा गराउने काम भइरहेको छ । यसप्रति सजग बनौँ,’ नेता नेपालको भनाइ थियो ।

नेपाल समूहकै विद्रोहका कारण विपक्षी गठबन्धनको मनोबल बढेको थियो । कर्णाली प्रदेशमा ३ वैशाखमा माओवादी केन्द्रका तर्फबाट मुख्यमन्त्री बनेका महेन्द्रबहादुर शाहीलाई पार्टीको निर्णय विपरीत नेपाल समूहका सांसदले विश्वासको मत दिँदा शाही नेतृत्वको सरकार जोगिएको थियो ।

यता, सुदूरपश्चिम प्रदेशमा पनि नेपाल समूहका सांसदको सहयोगमा एमाले नेतृत्वको सरकार बनाउने अध्यक्ष ओलीको प्रयासमा धक्का पुगेको थियो भने बागमती र लुम्बिनी प्रदेशबाट राष्ट्रियसभा निर्वाचनमा भएको मतदानमा पनि नेपाल समूहले एमालेको आधिकारी उम्मेदवारलाई असहयोग गर्दा विपक्षी गठबन्धनको उम्मेदवार विजयी भएका थिए । केन्द्रमा पनि २७ वैशाखमा विश्वासको मत लिने प्रक्रियामा नेपाल समूहका सांसद अनुपस्थित भएका थिए ।

यस्तै, संविधानको धारा ७६ ५ (२) अनुसार सरकार गठनको प्रक्रियामा नेपाल समूहले प्रधानमन्त्रीमा देउवालाई समर्थन जनाएका थिए । यो विषय अदालतमा पुग्दा उनीहरूले सर्वोच्चमा देउवालाई प्रधानमन्त्री बनाउन परमादेश माग गरेको रिटमा पनि नेपाल समूहका २३ सांसदले हस्ताक्षर गरेका थिए ।

नेपाल समूहकै साथका कारण विपक्षी गठबन्धनको मोर्चाबन्दी कसिलो बनेको र ओलीलाई निरन्तर धक्का पुगिरहेकाले कांग्रेस र माओवादी केन्द्रले ओलीको सर्वसत्तावाद अन्त्यका लागि सहकार्यलाई निरन्तरता दिन आग्रह गरेका हुन् ।

सोमबारको बैठकमा तीन पूर्वप्रधानमन्त्रीहरूले सकारलाई अदालतमा विचाराधीन मुद्दा प्रभावित बनाउने गतिविधि नगर्न पनि ध्यानाकर्षण गराएका थिए । विपक्षी गठबन्धन एक अर्काविरुद्ध उपयोगका लागि नभएर संविधान र लोकतान्त्रिक गणतन्त्रको रक्षाका निम्ति बनेको भन्दै व्यवस्था र संविधान रक्षाका लागि राजनीतिक सहकार्य नटुट्ने निष्कर्ष बैठकले निकालेको छ ।

यस्तै, बैठकले कोभिड खोप सबैलाई उपलब्ध गराउन तथा विपन्न वर्गलाई राहतको घोषणा गर्न सरकारलाई ध्यानाकर्षण पनि गराएको छ । बैठकले पूर्वप्रधानमन्त्री झलनाथ खनालको स्वास्थ्यबारे चासो राख्दै शीघ्र स्वास्थ्य लाभको कामना गरेका छन् ।

प्रकाशित मिति: सोमबार, जेठ ३१, २०७८ २१:२३