देशभर सुरक्षा सतर्कता, गृह भन्छः डराउनुपर्दैन

A+ A A-

उपत्यकामा शृंखलाबद्ध विस्फाेट भएपछि सरकारले देशभरको सुरक्षा व्यवस्था कडाइ गरेको छ । गृह मन्त्रालयले सर्वसाधारणको दैनिकीमा असर नपरोस् भनेर सुरक्षा व्यवस्था मजबुद पार्न ७७ जिल्लाकै प्रमुख जिल्ला अधिकारीलाई निर्देशन दिएको छ ।

सर्वसाधारणको दैनिकीमा कुनै असर नपरोस् र शान्ति सुरक्षाको व्यवस्थामा खलल नपुगोस् भनेर सोहीअनुसारको व्यवस्था मिलाउन सबै जिल्लाका प्रमुख जिल्ला अधिकारीलाई निर्देशन दिइएको गृह मन्त्रालयका प्रवक्ता रामकृष्ण सुवेदीले जानकारी दिए ।

‘आज अपरान्हदेखि काठमाडौं उपत्यकाका केही स्थानमा हिसांत्मक गतिविधि भएका छन्, यस्तो कार्यमा संलग्न व्यक्ति र समूहको पहिचान भइसकेको छ त्यसैले सुरक्षा व्यवस्था मजबुद बनाउन र सर्वसाधारणको दैनिकीमा असर नपरोस् भनेर सुरक्षा व्यवस्था मिलाउन सबै जिल्लाका प्रमुख जिल्ला अधिकारीहरुलाई निर्देशन दिइसकेका छौं,’ प्रवक्ता सुवेदीले शिलापत्रसँग भने ।

सरकारले सबै सुरक्षा संयन्त्रलाई उच्च सतर्कता अपनाउन निर्देशन दिएको छ ।

यता, नेपाल प्रहरीले पनि उच्च सुरक्षा सतर्कता अपनाएको छ । हिसांत्मक गतिविधि नहोस् भनेर सुरक्षा सतर्कता अपनाएको नेपाल प्रहरीका प्रवक्ता डीआईजी विश्वराज पोखरेलले जानकारी दिए ।

कहाँ चुक्यो सरकार ?

सरकारले फागुन अन्तिम सातादेखि नेत्रविक्रम चन्द (विप्लव) नेतृत्वको नेकपाका राजनीतिक क्रियाकलापमाथि प्रतिबन्ध लगाएको थियो । विप्लव नेकपामाथि प्रतिबन्ध लगाएदेखि नै सत्तारुढ दलमा केही मतभेद देखिएको पनि थियो ।

सरकारले प्रतिबन्ध लगाएदेखि नै सरकारविरुद्ध आक्रामक देखिएको विप्लव समूहले हिंसात्मक गतिविधिको धम्की दिएको थियो । उसका हिसांत्मक गतिविधि बढेको भन्दै सरकारले प्रतिबन्ध लगाएको थियो ।

सरकारले प्रतिबन्ध लगाउनुअघि र लगाइसकेपछि पनि हिसांत्मक गतिविधिको विप्लव समूहले औपचारिक जिम्मेवारी लिएको छैन । आज (१२ जेठ) मा काठमाडौंको सुकेधारा र अनामनगर बम विस्फोटको औपचारिक जिम्मेवारी पनि उसले लिएको छैन । यस्तै, काठमाडौं उपत्यकाका अन्य विस्फोट र बम आतंकको पनि विप्लव समूहले जिम्मा लिएको छैन ।

तर, सरकारले यी सबै घटनामा विप्लव समूहको संलग्नताको आरोप लगाएको छ । हिंसात्मक गतिविधि बढे भनेर जुन समूहमाथि प्रतिबन्ध लगाइयो, सोही समूहले गर्न सक्ने क्रियाकलाप नियन्त्रणका लागि सरकारी प्रयास भने लगभग असफल देखियो ।

गृह प्रवक्ता सुवेदी घरभित्रका क्रियाकलापलाई लिएर सरकारको असफलता मान्न नहुने दाबी गर्छन् ।

‘सुकेधारमा सैलुन सञ्चालक लिजकुमार ठाकुरको भान्सामा बम विस्फोट भयो । अनामनगरमा लोकमञ्जरीको घरमा दुई महिनादेखि भाडामा बस्दै आएका प्रज्वल शाहीको संलग्नता देखियो, यी दुवै घटना घरभित्रका हुन्, सरकारले घरभित्रका क्रियाकलापको निगरानी गर्न गाह्रो हुन्छ त्यसैले सर्वसाधारणले पनि सुरक्षा सतर्कता अपनाउनुपर्यो, कस्तो मान्छेलाई भाडामा राखेको छु भनेर गतिविधिको रेखदेख पनि गर्नुपर्यो,’ प्रवक्ता सुवेदीले भने ।

उनले जस्तोसुकै तर्क गरे पनि आजको घटनाले सुरक्षा संयन्त्र भने असफल जस्तै देखिएको छ ।

प्रकाशित मिति: सोमबार, जेठ १३, २०७६ ०७:१८