दण्डहीनताका कारण एसियामा बलपूर्वक बेपत्ता पारिने क्रम बढ्यो

A+ A A-

एसिया महादेशमा गएको दुई दशकको अवधिमा कानुनी शासनको अभाव, बढ्दो दण्डहीनता, गरिबी, सामाजिक अन्याय, अधिनायकवादी शासन प्रणाली, स्वतन्त्रताको संघर्ष, युद्ध तथा आतंकवादका कारण बलपूर्वक बेपत्ता पारिने घटनाहरू बढ्दै गएको इन्सेकका कार्यकारी निर्देशक विजयराज गौतमले बताएका छन् ।

अनौपचारिक क्षेत्र सेवा केन्द्र (इन्सेक) र एड्भोकेसी फोरम नेपालको संयुक्त आयोजनामा एसियामा बलपूर्वक बेपत्ता: प्रचलित कानुन, चुनौती तथा समाधानका उपाय विषयक १३ र १४ जेठमा ललितपुरमा गरिने दुईदिने कार्यशालाको उद्देश्यबारे जानकारी दिन ललितपुरमा १२ जेठमा आयोजित पत्रकार सम्मेलनमा उनले सो कुरा बताएका हुन् ।

पत्रकार सम्मेलनमा श्रीलंकमा २४ हजार नागरिक बेपत्ता भएको भनी उजुरी परेको जनाइएको छ । त्यसैगरी, भारतको स्वःशासित क्षेत्र जम्मु काश्मीरमा ७ हजार नागरिक बेपत्ता पारिएको जानकारी दिइयो ।

गौतमले भने, ‘इन्सेकले संकलन गरेको अभिलेखमा ९ सय ३२ जनालाई सशस्त्र द्वन्द्वको बेलामा बलपूर्वक बेपत्ता बनाएको उल्लेख छ । तर, बेपत्ता पारिएका व्यक्तिको छानबिन आयोगमा ३ हजारको हाराहारीमा उजुरी परेको जानकारी पाएका छौँ ।’

उनका अनुसार १३ र १४ जेठमा हुने कार्यशालामा एसिया महादेशका १२ देशका २० जना प्रतिनिधि, संयुक्त राष्ट्रसंघकाे बलपूर्वक बेपत्तासम्बन्धी समितका उपाध्यक्ष, द्वन्द्व पीडित, नेपालका सरकारी तथा गैरसरकारी संस्थाका प्रतिनिधिको सहभागिता रहनेछ ।

कार्यशालामा विभिन्न देशका विज्ञले सम्बन्धित राष्ट्रको बेपत्तासम्बन्धी कानुनको विद्यमान अवस्था तथा बेपत्ता पारिएका घटनाका सन्दर्भमा अनुभव आदानप्रदान गर्ने आयोजकले जनाएको छ ।

१३ जेठमा बिहान परराष्ट्रमन्त्री प्रदीप ज्ञवालीले उद्घाटन गर्ने समारोहमा बलपूर्वक बेपत्ताः पारिएका नागरिकबारे जानकारी दिइने कार्यकारी निर्देशक गौतमले बताए ।

बेपत्ता पारिएका व्यक्तिको खोजीका लागि एसियाली राष्ट्रहरूका सन्दर्भमा सरोकारवालाको सुझाव र प्रतिक्रिया लिन कार्यशाला फलदायी हुने आयोजकले जनाएको छ ।

विश्वमै सबैभन्दा बढी बलपूर्वक बेपत्ता पार्ने मुलुकहरूमा एसिया महादेशका देशहरू रहेको एफिडकी महासचिव आई लिनले बताइन्