प्रदेश प्रमुखको निवासअगाडि नेतालाई रोकेपछि प्रहरीलाई सांसदको धम्की- तपाईंको हिसाबकिताब हुन्छ !

प्रदेश प्रमुखको निवासअगाडि नेतालाई रोकेपछि प्रहरीलाई सांसदको धम्की- तपाईंको हिसाबकिताब हुन्छ !

A+ A A-

गण्डकी प्रदेश प्रमुखको निवासअगाडि विपक्षी ३१ सांसदको धर्ना जारी थियो । निर्धारित समय सकिँदा पनि नियुक्त नगरेको र संसद् विघटन गर्ने उद्देश्यसहित पृथ्वीसुब्बा गुरुङले मुख्यमन्त्री दाबी गरेको भन्दै बहुमत सांसद धर्ना बसेका थिए ।

धर्ना चलिरहँदा कांग्रेस सांसद मेखलाल श्रेष्ठ उठे । प्रदेश प्रमुख निवास वरपर प्रहरीको बाक्लो उपस्थिति थियो । सांसद, पत्रकारबाहेक अरुलाई प्रवेश निषेध थियो । त्यत्तिकैमा कांग्रेस सांसदले एक पुरुषलाई धर्नास्थलमा लैजान खोजेपछि प्रहरीले रोक्यो ।

वडा प्रहरी कार्यालय बैदामका प्रहरी निरीक्षक (इन्स्पेक्टर) श्याम थापामगरसहितको टोली ती पुरुषलाई धर्नास्थल प्रवेशमा रोक लगाइरहेको छ । धर्नास्थलबाट उठेका सांसद ती युवालाई छोड्न प्रहरीलाई भन्छन् । तर, प्रहरी मान्दैनन् ।

‘उहाँ पार्टीको नेता हो, के हो यो ? यही हो तानाशाह ?,’ सांसद मेखलाल प्रहरीलाई भन्छन् । प्रहरीले ती युवालाई प्रवेश नदिएपछि कांग्रेस सांसद मेखलाल धर्नास्थलतिर लाग्छन् । जाँदैगर्दा उनी फेरि भन्छन्, ‘तपाईंको हिसाबकिताब हुन्छ ।’

प्रहरी इन्स्पेक्टर जवाफ फर्काउँछन्, ‘मेरो नाम श्याम थापामगर हो । बैदाममा कार्यरत छु ।’ इन्स्पेक्टर थापामगरको जवाफपछि सांसद श्रेष्ठ आक्रोशमा आउँदै भन्छन्, ‘फुर्ती नछाँटम् ।’ यसरी सांसद श्रेष्ठले प्रहरीलाई हिसाबकिताब हुन्छ भन्दै ड्युटीमा रहेका प्रहरीलाई धम्क्याएको भिडियो अहिले सामाजिक सञ्जालमा भाइरल भइरहेको छ ।

स्याङ्जाका घर भएका श्रेष्ठ कांग्रेसका समानुपातिक सांसद हुन् । उनी निकै उग्र स्वभावका मानिन्छन् । प्रदेश प्रमुखले नियुक्तिमा ढिलाइ गर्दा अन्य विपक्षी सांसदलाई धर्ना बस्न उक्साउने पनि सांसद श्रेष्ठ नै थिए । उनले धर्ना बस्नुअघि प्रहरीलाई भनेका थिए, ‘माननीयहरू कसैलाई केही भए राम्रो हुँदैन ।’ सांसद श्रेष्ठ कृष्णचन्द्र नेपाली पोखरेल नेतृत्वको क्याबिनेटमा मन्त्री हुने चर्चा छ ।

कास्की प्रहरीले भने उक्त घटना सामान्य रहेको प्रतिक्रिया दिएको छ । प्रवेशमा कडाइ गरिएको र त्यही विषयमा सामान्य भनाभन भएको कास्की प्रहरी प्रवक्ता प्रहरी नायब उपरीक्षक (डीएसपी) सुवास हमालले बताए । ‘सुरुमा माननीयज्यू भन्ने चिनिएन । भित्र अरुलाई छिर्न नदिनू भन्ने भएर रोकिएको थियो,’ उनले शिलापत्रसँग भने, ‘चिनेपछि उहाँलाई छोड्यौँ । थर्ड पार्टीलाई पनि छिराउन खोज्दा त्यस्तो भएको बुझियो ।’

सांसद श्रेष्ठको झुटो दाबी

सांसद श्रेष्ठले सेतो सर्ट लगाएका पुरुषलाई धर्नास्थलमा लैजान खोजेका थिए । प्रहरीले कसैलाई प्रवेश दिएको थिएन । आफूले लैजान खोजेका व्यक्ति धर्नास्थल छिर्न नपाएपछि उनी आक्रोशमा आएका हुन् ।

सांसद श्रेष्ठ भने आफूले कसैलाई लैजान नखोजेको दाबी गर्छन् । आफू शौचालय गएर फर्किंदा प्रवेश गर्न नदिएकाले वादविवाद भएको उनले शिलापत्रलाई सुनाए । ‘मेरो कुनै नियतले त्यो गरेको होइन । म धर्नामा बस्दा पिसाब लाग्यो,’ उनले भने, ‘पुलिस बसेको ठाउँअगाडि मेरो नातेदारको घर थियो । त्यहाँ जाँदा केही गरेन । फर्किंदा धर्नामा जान दिएन । म माननीय हो, जान पाउनुपर्छ भनेर जिद्दी गरेँ ।’

ड्युटीको प्रहरीले आफ्नो नाम भनेर हेपाहा व्यवहार देखाएको सांसद श्रेष्ठले बताए । आफूले हिसाबकिताब हुन्छ भनेर प्रहरीलाई नभनेको सांसद श्रेष्ठको दाबी छ । ‘भन्न त त्यहाँ पुलिसलाई नै भनेको देखिएको छ । तर, पुलिसलाई भनेको होइन । व्यक्तिलाई भनेको होइन,’ उनले दाबी गरे, ‘यसको हिसाबकिताब हुन्छ भनेको छु । तेरो भनेको छैन । तानाशाही प्रवृत्तिविरुद्ध धर्ना बसेका छौँ । त्यसको हिसाबकिताब हुन्छ भनेको हो ।’

प्रकाशित मिति: आइतबार, जेठ ३०, २०७८ १८:२८