अबदेखि बीमा कम्पनीले एजेन्ट र संस्थागत एजेन्ट राख्न पाउने, एजेन्टको योग्यता एसईई पास भए पुग्ने

अबदेखि बीमा कम्पनीले एजेन्ट र संस्थागत एजेन्ट राख्न पाउने, एजेन्टको योग्यता एसईई पास भए पुग्ने

A+ A A-

अबदेखि बीमा कम्पनीहरूले संस्थागत अभिकर्ता (एजेन्ट) राख्न पाउने भएका छन् । बीमा समितिले बीमा अभिकर्तासम्बन्धी निर्देशिका जारी गर्दै संस्थागत एजेन्ट राख्न पाउने सुविधा दिएको हो ।

हाल जारी गरिएको बीमा अभिकर्तासम्बन्धी निर्देशिकामा संस्थागत अभिकर्ताले काम गर्न पाउने र उनीहरूको क्षेत्राधिकारसमेत तोकिएको समितिका कार्यकारी निर्देशक राजुरमण पौडेलले बताए ।

संस्थागत अभिकर्ता राख्न पाउने व्यवस्था निर्देशिकामा छ । निर्देशिकाअनुसार अब बीमा कम्पनीहरूले संस्थागत अभिकर्ता राखेर निर्देशिकाले व्यवस्था गरेअनुसार काम गराउन सक्ने उनको भनाइ छ ।

हाल पनि कार्यान्वयनमा रहेको बीमा ऐनमा संस्थागत अभिकर्ता राख्न पाउने व्यवस्था भएकाले समितिले त्यसैलाई कार्यान्वयनमा मात्र ल्याएको कार्यकारी प्रमुख पौडेलले बताए ।

एजेन्टका हकमा कम्तीमा एसईई वा सोसरहको योग्यता हुनुपर्ने निर्देशिकामा उल्लेख छ । संस्थागत एजेन्टका लागि कुनै पनि बीमा कम्पनी अथवा सम्बन्धित बीमा कम्पनीका मुख्य वा प्रमुख व्यवस्थापकहरूमार्फत तालिम लिएको हुनुपर्नेछ ।

एजेन्टका लागि आवश्यक किसिमको बीमा अभिकर्ताको तालिममा सहभागी भई प्रमाणपत्रसमेत दिएको हुनुपर्ने निर्देशिकामा उल्लेख छ । विद्युतीय प्रणालीमार्फत कारोबार गर्न सम्बन्धित निकायबाट इजाजतसमेत एजेन्ट लिनुपर्छ ।

संस्थागत अभिकर्ताले बीमितसँग बीमा शुल्क भुक्तानी हुने समयको जानकारी दिने र पुनः बीमा गर्नुपरेमा सहयोग गर्ने, बीमा शुल्क संकलन गरी बीमकलाई भुक्तानी गर्ने, बीमा प्रस्ताव फाराम भर्न सहयोग गर्ने, बीमकको तर्फबाट बीमितलाई विवरण, जानकारी तथा सूचनाहरू उपलब्ध गराउनेलगायतका काम गर्न पाउने अधिकारसमेत एजेन्टलाई दिइएको समितिले जानकारी दिएको छ ।

प्रकाशित मिति: आइतबार, जेठ ३०, २०७८ १७:०७