मलेसियामा गुड इयर टायरविरुद्धकाे मुद्दा नेपालीसहितका श्रमिकले जिते

A+ A A-

मलेसियाको अमेरिकी कम्पनी गुड इयर टायरविरुद्धकाे मुद्दा नेपालीसहितका श्रमिकहरूले जितेका छन् ।बुधबार त्यहाँकाे अदालतले श्रमिकको पक्षमा फैसला सुनाएकाे हाे ।

स्थानीय सञ्चारमाध्यमका अनुसार नेपालीलगायतका दर्जनौँ श्रमिकले आफूले पाउनुपर्ने सेवा सुविधा, ओभरटाइमबापतकाे रकम नपाएको, राहदानीलगायतको व्यक्तिगत कागजात कम्पनीले अवैधानिक रूपमा कब्जामा राखेको भन्दै मुद्दा हालेका थिए ।

समाचार एजेन्सी एएफपीका अनुसार दर्जनौँ श्रमिकले हालेको मुद्दामा श्रमिकको पक्षमा फैसला आएको हो । यसअघि नै दुईवटा मुद्दा श्रमिकले जितिसकेका थिए ।

२० लाख रिङ्गिटबराबरको रकम आफूहरूले कम्पनीबाट नपाएको भन्दै ती श्रमिकले मुद्दा हालेको अधिवक्ता सेगरनले बताएको भनाइ उद्धृत गर्दै एएफपीले उल्लेख गरेकाे छ । कम्पनीले आफ्नो तर्फबाट कुनै रकम दिन बाँकी नरहेको बताए पनि अदालतले श्रमिककाे दाबीअनुसार रकम भुक्तानी गर्नुपर्ने आदेश दिएको छ ।

सेलेङ्गरमा रहेको गुड इयर टायरमा नेपाल, म्यानमार तथा भारतका ६५ जना श्रमिकले मुद्दा हालेका थिए । उनीहरूको तर्फबाट अधिवक्ता आर चन्द्रा सेगरनले मुद्दा लड्दै आएका थिए ।

अधिवक्ता सेगरनले अदालतले मलेसियामा काम गर्ने विदेशी श्रमिकले पनि मलेसियन नागरिकले जस्तै सेवा, सुविधा पाउनुपर्ने पक्षमा फैसला गरेको बताएको समाचारमा जनाइएको छ । 'आप्रवासी श्रमिकलाई कुनै भेदभाव गर्न पाइन्न भन्ने कुरा अदालतले स्थापित गरेको छ', उनले भनेका छन् ।

गुड इयर कम्पनीले भने अदालतको फैसलाका बारेमा पुनरावेदन गर्ने वा नगर्ने भन्ने बारेमा स्पष्ट पारेको छैन । यस विषयमा कम्पनीले कुनै जवाफ दिएको छैन । यसअघि १ सय १९ जना श्रमिकले हालेको मुद्दामा अदालतले यस्तै फैसला गरेकोमा कम्पनीले उच्च अदालतमा पुनरावेदन हालेको छ ।

मलेसियामा कम्पनीहरूले आप्रवासी श्रमिकलाई ठगेको, विभेद गरेको मुद्दा पछिल्ला केही वर्षयता चर्को रूपमा उठ्दै आएको छ । आप्रवासी श्रमिकलाई ठगिएको घटना सार्वजनिक भएपछि टप ग्लोब्सलगायतका कम्पनी समस्यामा परेका थिए ।

प्रकाशित मिति: आइतबार, जेठ ३०, २०७८ १२:५८