प्रदेश १ः नीति तथा कार्यक्रममाथिको छलफल सकियो, सत्तापक्षकै सांसदले गरे विरोध

प्रदेश १ः नीति तथा कार्यक्रममाथिको छलफल सकियो, सत्तापक्षकै सांसदले गरे विरोध

A+ A A-

प्रदेश १ को संसदमा पेश गरिएको नीति तथा कार्यक्रममाथिको छलफल सकिएको छ । शुक्रबारदेखि सुरुभएको छलफल शनिबार सम्पन्न भएको हो ।

सरकारले ल्याएको नीति तथा कार्यक्रमको विपक्षी दलका सांसदहरूले मात्रै हैन सत्तापक्षका सांसदहरूले पनि आलोचना गरेका छन् । सत्तारुढ नेकपा एमाले माधव नेपाल समूहका सांसद उपेन्द्र घिमिरेले सरकार सत्तापक्षका सांसदहरूदेखि पनि डराएको आरोप लगाए ।

सांसद घिमिरेले सत्तापक्षका सांसदहरूलाई चिठी लेखेर नीति तथा कार्यक्रमको पक्षमा बोल्न लगाइएको बताए । नेकपा एमाले संसदीय दलका प्रमुख सचेतक बुद्धिकुमार राज भण्डारीद्वारा मुख्यमन्त्री शेरधन राईको हवला दिएर नीति कार्यक्रमको पक्षमा बोल्न चिठी पठाएको प्रदेशसभा बैठकमा उनले बताए । बोल्नकै लागि चिठी लेखिनु संसदीय अभ्यासको गरिमालाई ठेस पुग्ने क्रियाकलाप भएको घिमिरेको टिप्पणी छ ।

सत्तारुढ सांसद खिनुलङ्वा लिम्बूले सरकारले पेश गरेको नीति तथा कार्यक्रम गोलमोल र अस्पष्ट भएको बताइन् । उनले सामान्य समन्वय गर्ने किसिमले मात्रै नीति तथा कार्यक्रम आएको धारणा राखिन् । लिम्बूले गाउँपालिकाको वडा कार्यलय र गैरसरकारी संस्थाले गर्ने खालका कार्यक्रम प्राथमिकतामा राखेर प्रदेशसरकारले नीति तथा कार्यक्रममा समेटेको बताइन् ।

कतिपय कार्यक्रमहरू गत वर्षको नीति तथा कार्यक्रममा समावेश भए पनि कार्यान्वयनमा नआएको र त्यहि कार्यक्रम यो वर्ष पनि समावेश भएर आएको टिप्पणी गरिन् ।

कार्यान्वयन गर्न नसक्ने तर, प्रत्यक वर्ष कार्यक्रम दोहोर्‍याएर ल्याउनु राम्रो नभएको बताइन् । लिम्बूले कार्यान्वयन गर्ने कार्यक्रम ल्याउन र गर्न नसक्ने कार्यक्रम नीति तथा कार्यक्रममा नराख्न सुझाव दिइन् ।

सत्तारुढ सांसद सर्वध्वज साँवाले विषम परिस्थितिमा सरकारले ल्याएको नीति तथा कार्यक्रम ठिकै रहेको बताए । साँवाले नीति तथा कार्यक्रमले यथार्थबाहेक सपना पनि देखेको टिप्पणी गरे । उनले नीति तथा कार्यक्रमको बारेमा सांसदहरूले आकाशमा उडठ्ने, चिलले, परेवाले, कोकालेले भुईमा फरक–फरक चारो देखेजस्तो आ–आफ्नो दृष्टिकोण राखेको बताए ।

कतिपय सांसदले खिचडी भनेर पनि टिप्पणी गरेको भन्दै उनले कोरोनामा खिचडी नै भए पनि खान पाउनु राम्रै भएको बताए । आगामि वर्षको नीति तथा कार्यक्रम सकारात्मक भए पनि चालु आर्थिक वर्षको बजेट कार्यान्वयन नभएकोमा भने चित्त दुखेको साँवाको गुनासो छ ।

आगामि वर्षको बजेटमा कार्यान्वयन हुने कार्यक्रम ल्याउन सुझाव दिँदै बजेटले प्रदेशका सबै जनतालाई कोरोनाविरुद्धको खोप सुनिश्चित गर्न उनले माग गरे ।

शनिबार बसेको प्रदेशसभा बजेट अधिवेशनको बैठकमा नेकपा एमाले पक्षका सांसदहरू अम्बिका थापा, आशारत्न जबेगु, उत्तमकुमार बस्नेतलगायले आगामी आर्थिक वर्षको निति तथा कार्यक्रमको सर्मथन गरेका थिए ।

प्रकाशित मिति: शनिबार, जेठ २९, २०७८ २०:०३