सभामुखले बोलाएको बैठकमा विपक्षी गठबन्धनले भने- संसद र लोकतन्त्रको पक्षको लडाइँ सशक्त बनाउछौँ

सभामुखले बोलाएको बैठकमा विपक्षी गठबन्धनले भने- संसद र लोकतन्त्रको पक्षको लडाइँ सशक्त बनाउछौँ

सभामुख अग्नि सापकोटाले बोलाएको बैठकमा सहभागी पूर्वप्रधानमन्त्री तथा राजनीतिक दलका शीर्ष नेताहरू । तस्वीर : सुशील श्रेष्ठ/शिलापत्र

A+ A A-

सभामुख अग्निप्रसाद सापकोटाले बोलाएको बैठकमा विपक्षी गठबन्धनका नेताहरूले संसद पुनर्स्थापना र लोकतन्त्रका लागि सुरु गरेको राजनीतिक र कानुनी लडाइँ सशक्त बनाउने बताएका छन् ।

शुक्रबार नयाँ बानेश्वरस्थित संसद भवनमा बसेको बैठकमा विपक्षी गठबन्धनका तर्फबाट उपस्थित कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, जनता समाजवादी पार्टीका अध्यक्ष उपेन्द्र यादव, बाबुराम भट्टराई र पूर्वप्रधानमन्त्री माधवकुमार नेपालले संसद पुनर्स्थापना हुने विश्वास व्यक्त गर्दै लोकतन्त्रको सुदृढीकरणका लागि राजनीतिक आन्दोलन सशक्त बनाउने बताएका हुन् ।

बैठकमा कांग्रेस सभापति शेरबहादुर देउवाले संसद पुनर्स्थापना हुने विश्वास व्यक्त गर्दै संसदीय लोकतन्त्रको सुदृढीकरण र लोकतन्त्रको रक्षाका निम्ति विपक्षी गठबन्धनमा सहभागी दल एकजुट हुने बताएका थिए । ‘हामीले सुरु गरेको कानुनी लडाइँ निष्कर्षतर्फ उन्मुख छ । अदालतले संसद पुनर्स्थापना गर्छ भन्ने विश्वास हामीले राखेका छौँ । संसद ब्युँतिएपनि लोकतन्त्रको रक्षाको निम्ति विपक्षी गठबन्धन क्रियाशील हुनुपर्छ,’ उनको भनाइ थियो ।

यस्तै माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री संसद विघटन गरी संविधान र राजनीतिक व्यवस्थामाथि प्रहार गरेकाले त्यसलाई अदालतले सच्याउने विश्वास व्यक्त गरेका थिए । उनले विपक्षी गठबन्धनको राजनीतिक लडाइँ संसद पुनर्स्थापना हुनेवित्तिकै नसकिने धारणा व्यक्त गरे ।

‘संसद फर्किँदैन हाम्रो राजनीतिक लडाइँ समाप्त हुँदैन, लोकतन्त्रमाथिको बारम्बारको घात रोक्न हाम्रो सहकार्य दीर्घकालीन रूपमा हुनुपर्छ,’ उनको भनाइ थियो ।

बैठकमा सहभागी जनता समाजवादी पार्टीका अध्यक्ष उपेन्द्र यादवले सर्वोच्चले संसद पुनर्स्थापनाको पक्षमा फैसला गर्ने विश्वास व्यक्त गरेको बताए । ‘लोकतन्त्रलाई बचाउन सहकार्यलाई निरन्तरता दिने निचोड बैठकको रहेको छ,’ बैठकपछि सञ्चारकर्मीहरूसँग नेता यादवले भने ।

यस्तै पूर्वप्रधानमन्त्रीमा माधवकुमार नेपालले लोकतन्त्रको पक्षमा हालको राजनीतिक सहकार्यलाई निरन्तरता दिइने बताएका थिए । अदालतले संसद पुनर्स्थापना गर्ने विश्वास व्यक्त गर्दै नेता नेपालले भनेका थिए, ’अदालतले संसद पुनर्स्थापनाको पक्षमा फैसला सुनाउनेमा विश्वस्त छु । संसद पुनर्स्थापना हुनेवित्तिकै सबै राजनीतिक समाधानको हल हुन सक्दैन । लोकतन्त्रको पक्षमा एकै ठाउँमा उभिएक शक्तिहरूबीचको दीर्घकालीन सहकार्य आजको आवश्यकता हो ।’

बैठकमा नेपाल मजदुर किसान पार्टीका नेता प्रेम सुवालले ठूला दलकै कारण मुलुकमा राजनीतिक अस्थिरता निम्तिएको र हालका परिणामको भागीदार राष्ट्रिय दलहरू भएको बताएका थिए । ‘मुलुकमा ठूला दलहरूकै कारण अस्थिरता निम्तियो । पञ्चायतकालको विरोध गर्ने दलहरू आफैँले पञ्चायतको अभ्यास गर्न थाले साना दलहरूलाई थ्रेस होल्ड लगाएर रोक्दा अस्थिरताको विजारोपण ठूला दलहरूबाटै भयो,’ उनको भनाइ थियो ।

राप्रपाले पनि संसद विघटन असंवैधानिक भनेको छ । बैठकमा सहभागी नेता दीपक बोहराले भने,’संसद विघटनको कदम असंवैधानिक भन्ने हाम्रो दलको सहित सबैको साझा निष्कर्ष रह्यो । संसद पुनर्स्थापना हुनेमा सबैको विश्वास छ,’ बैठकपछि उनले भने ।

बैठकमा सभामुख अग्निप्रसाद सापकोटाले संसदीय लोकतन्त्र र व्यवस्थाको रक्षाका लागि आफूले पनि संवैधानिक रूपमा भूमिका निर्वाह गर्ने बताएका थिए । ‘संसद र लोकतन्त्रको सुदृढीकरण निम्ति मैले निर्वाह गर्नुपर्ने दायित्व संवैधानिक रूपमा निर्वाह गर्दै अघि बढ्नेछु,’ उनको भनाइ थियो ।

बैठकमा सबै राजनीतिक दलहरूले चुरे दोहन गर्ने सरकारी नीतिको विरोध गरेका थिए । सभामुख सापकोटाले बोलाएको सर्वदलीय बैठक प्रधानमन्त्रीको दल एमालेले भने बहिष्कार गर्‍यो ।

प्रकाशित मिति: शुक्रबार, जेठ २८, २०७८ १८:१३