निषेधाज्ञा पन्छाउँदै प्रधानमन्त्री निवासअगाडि पुगेका ७६ वर्षे लेखक र २१ वर्षीया विद्यार्थी

निषेधाज्ञा पन्छाउँदै प्रधानमन्त्री निवासअगाडि पुगेका ७६ वर्षे लेखक र २१ वर्षीया विद्यार्थी

बालुवाटार पिपलबाट पक्राउ परेकी अभियन्ता रीता परियार ।

A+ A A-

कविता पढ्दापढ्दै युवा अभियन्ता सौरभ कार्की समातिए । समातिनेमा अर्चना थापा, नारायण वाग्ले, सन्जीव उप्रेती, सरिता परियार, भास्कर गौतम, रिता परियारलगायत डेढ दर्जन नागरिक प्रदर्शनकारी छन् । प्रधानमन्त्रीको सरकारी निवास बालुवाटार अगाडि गएर प्रदर्शन गर्न लागेका उनीहरुलाई आज प्रहरीले गिरफ्तार गरेर गहनापोखरी मालीगाउँस्थित प्रहरी कार्यालयमा थुनिरहेको छ ।

बालुवाटारबाट प्रहरीकाे गिरफ्तारीमा परी मालिगाउँस्थति वृत्तमा खगेन्द्र संग्राैला, नारायण वाग्लेलगायत अभियन्ता ।

कामचलाउ सरकारले चिकित्सा शिक्षा क्षेत्रका माफिया दुर्गा प्रसाईलाई चोरबाटोबाट मेडिकल कलेजको सम्बन्धन नदिएको भए आज शुक्रबारको नागरिक आन्दोलन हुने थिएन । कोभिड १९ को भयावह अवस्था झन् नबढोस् भनेर सरकारले निषेधाज्ञा लगाएको छ । दैनिक गुजारा गर्न कठिन भए पनि जनस्वास्थ्यको जोखिम बढ्न नदिन नागरिकले सरकारी फर्मान मानिदिएका छन् ।

निषेधाज्ञाको अर्थ सरकारले जे गरे पनि नागरिकले थपक्कै मान्दिन्छन् भन्ने होइन ।

विराेध प्रदर्शन गर्न बालुवाटार पुगेका साैरभ कार्की कविता वाचन गर्दागर्दै पक्राउ परेका थिए ।

७६ वर्ष नाघिसकेका गिरफ्तार लेखक खगेन्द्र संग्रौलालाई हामीले सोध्यौं, ‘निषेधाज्ञाका बेला जुलुस गर्न पाइन्छ ?’ उनले भने, ‘निषेधाज्ञाको मौका छोपेर मेडिकल माफियालाई विधि प्रक्रिया छलेर मेडिकल कलेजको सम्बन्धन बेच्न पाइन्छ भनेर कहाँ लेखेको छ ?’

संग्रौलाको यो प्रश्नमा सत्ता संस्थापनलाई दुरुपयोग गरेर माफिया पोस्न प्रयोग भएका व्यक्तिहरुमाथि सिधा चुनौती छ ।

लेखक तथा साहित्यकार खगेन्द्र संग्राैला ।

२१ वर्षीया विद्यार्थी भावना राउत यो आन्दोलनमा प्लेकार्ड बोकेर हिँडेकी थिइन् । शान्तिपूर्ण विरोध कार्यक्रममा भाग लिन बालुवाटार हिँडेकी उनी गिरफ्तार हुँदा त्यहाँ कुनै महिला प्रहरी आएनन् । हिरासत लैजान आएको गाडीमा पनि महिला प्रहरी नभएकोमा उनले आपत्ति प्रकट गरिन् ।

शिलापत्रसँग भावना राउतले भनिन्, ‘दुर्गा प्रसाइको कलेजलाई सम्बन्धन दिने सरकारी प्रयास पहिल्यै खारेज भइसकेको थियो । अहिले देश ठप्प भएको मौका छोपेर चोरबाटोबाट सम्बन्धन दिन खोज्यो । यसको विरोध नगरी बस्न सकिँदैन ।’

ठ्याक्कै पोहरको प्रवृत्ति दोहोर्याएको छ सरकारले । लकडाउने गर्ने, तर बीचको समयमा जनस्वास्थ्य जोगाउन कुनै ठोस प्रयास नगर्ने । राष्ट्रपतिका नाममा दुई चार चिठीहरु विदेश चलानी गरिएका छन् । बाँकी उल्लेख्य प्रगति छैन । उल्टै यही बेला अपारदर्शी खेलहरु चल्दैछन् । दुर्गा प्रसाईको कलेजलाइ विधि प्रक्रिया छलेर दिइएको सम्बन्धन यसैको उदाहरण हो ।

अभियन्ताहरू बालुवाटार क्षेत्रमा भेला भएकाे देख्नासाथ प्रहरीले नियन्त्रणमा लिएकाे थियाे ।

यमनका हिंसाग्रस्त गाउँहरुमा त्यहाँका जनतको उपचारमा खटिएका चिकित्सक गोविन्द केसीले पनि नागरिक आन्दोलनले उचालेको यो स्वरमा आफ्नो स्वर मिलाएका छन् । अझ भनौं, उनैले त हो, यो लडाइँलाई यो उचाईसम्म ल्याइपुर्याएको ।

सरकारका एकपछि अर्को निर्णयहरुलाई अदालतले प्रश्न गर्ने क्रम बढ्दो छ । सरकारको वैधानिकतामाथि प्रश्नहरु उठेका छन् । नागरिक आन्दोलनकारीहरु गिरफ्तार छन् । तर विरोधको यो स्वर थुनेर राख्ने सामर्थ्य अहिलेको सत्तासँग छैन । समयमै बुझेको बेस ।

सम्बन्धित समाचार