हिरासतमा रहेका खगेन्द्र संग्रौलालाई प्रश्न: निषेधाज्ञाको बेला जुलुस निकाल्न पाइन्छ ?

हिरासतमा रहेका खगेन्द्र संग्रौलालाई प्रश्न: निषेधाज्ञाको बेला जुलुस निकाल्न पाइन्छ ?

A+ A A-

नागरिक अगुवा खगेन्द्र संग्रौला यति बेला १८ जना अधिकारकर्मी, नागरिक आन्दोलनकारीसहित कमलपोखरीको पुलिस हिरासतमा थुनिएका छन् । उनीसँग शिलापत्रको छोटो कुराकानी :

तपाईंहरू किन आन्दोलनमा निस्कनुभएको ?

सरकारले जनस्वास्थ्यजस्तो अत्यन्तै संवेदनशील मुद्दालाई बजारको जिम्मा लगाइदियो । यसले जनताको स्वास्थ्यलाई दुर्गा प्रसाईंजस्तो बदमास मेडिकल माफियाको खल्तीमा पर्ने गरी बेच्यो । जनप्रतिनिधि बस्ने थलो संसद् मासेर, अनि भएका सबै नीति नियम मिचेर बालुवाटारले एकलौटी गरेपछि हामीले त्यसलाई बालुवाटारमै गएर चुनौती दिने निर्णय गर्‍यौँ । त्यसैले हामी सडकमा गयौँ । प्रहरीले हिरासतमा लिएको छ अहिले ।

कोभिडले देश आक्रान्त छ । निषेधाज्ञाको बेला सडकमा जान पाइन्छ ?

निषेधाज्ञाको मौका छोपेर राज्यले स्वास्थ्यजस्तो संवेदनशील विषयलाई बजारमा लगेर बुझाउनुपर्छ भन्ने चैँ कहाँ लेख्या छ ?

जे तर्क दिए पनि कोभिड त यसरी झन् फैलिन्छ होइन ?

हामीले सतर्कतापूर्वक प्रदर्शन गरेका छौँ । भौतिक दूरी पालना गरेका छौँ । मास्क लगाएका छौँ । आफ्नो स्वास्थ्य र आफ्नो छेउमा हुने अर्को मान्छेको स्वास्थ्यको ख्याल गरेका छौँ । तर, हामी देशमा शोषण अत्याचार हुँदा मौन रहेर घरैमा बस्न सक्दैनौँ । यो एकदमै प्रस्ट कुरा हो ।

दुर्गा प्रसाईंले सम्बन्धन पाए भन्नेमा तपाईंहरूलाई चित्त नबुझेको ?

त्यो एउटा विषय पक्कै हो । सम्बन्धनजस्तो प्राज्ञिक शैक्षिक विषयलाई कमाउने भाँडो बनाउन पाउँदैन कसैले पनि । यो जनताको सरोकारसँग सिधै जोडिन्छ । हामी आफ्नो मुद्दा छाड्दैनौँ ।

हिरासतमा कस्तो व्यवहार गरेको छ प्रहरीले ?

समाउने बेलामा मलाई धरपकड झम्ल्याङझुम्लुङ गरियो । पुलिसले त्यति त गरिहाल्छ नि । तर, अहिले चैँ शिष्ट र सभ्य व्यवहार गरेको छ ।

अब के गर्नुहुन्छ ?

अहिले त हामी हिरासतमा छाैँ । तर, याे संघर्ष राेकिँदैन । हामी थुनिए पनि अर्काेले आवाज उठाइहाल्छ । हामी पनि बाहिर निस्केर फेरि बाेल्छाैँ । सबैले बाेल्नुपर्छ । किनकि याे जनताकाे ढाड भाँच्ने गरी सरकारले गरेकाे गलत हर्कत हाे । याे सरकारकाे वैधानिकतामाथि नै प्रश्नहरू उठेका बेला झन् अनुचित र अक्षम्य निर्णयहरू गर्दै लगेकाे छ । हामी प्रतिवाद गरिरहन्छाैँ ।

सम्बन्धित समाचार

प्रकाशित मिति: शुक्रबार, जेठ २८, २०७८ ११:५७