प्रदेश २ को स्वास्थ्य केन्द्रित नीति तथा कार्यक्रम, चुरे संरक्षणमा विशेष सहयोग गर्ने [पूर्णपाठ]

प्रदेश २ को स्वास्थ्य केन्द्रित नीति तथा कार्यक्रम, चुरे संरक्षणमा विशेष सहयोग गर्ने [पूर्णपाठ]

A+ A A-

प्रदेश २ सरकारले आगामी आर्थिक वर्षको नीति तथा कार्यक्रम सार्वजनिक गरेको छ । विकासका गतिविधिभन्दा मानवीय स्वास्थ्यलाई प्राथमिकतामा राखी प्रदेश प्रमुख राजेश झा अहिराजले प्रदेशसभामा आर्थिक वर्ष ०७८/०७९ को नीति तथा कार्यक्रम प्रस्तुत गरेका हुन् । सरकारले पुरानै अभियान ‘बेटी पढाऊ, बेटी बचाऊ’, ‘जहाँ सडक, त्यहीँ विकास’, पोखरी सौन्दर्यीकरणलगायतका कार्यक्रम तथा अभियानलाई निरन्तरता दिएको छ ।

महामारीले जनस्वास्थ्यसँग सम्बन्धित जोखिम कम गर्न आवश्यक्ताअनुसार गुणस्तरीय क्वारेन्टाइन र आइसोलेसन स्थापना गर्न मणिपालमा कोभिड अस्पताल निर्माणमा तीब्रता, मधेस विज्ञान प्रतिष्ठान तथा प्रादेशिक अस्पतालमा भेन्टिलेटर र अक्सिजन सुविधा दिने नीति तथा कार्यक्रममा समेटेको छ ।

त्यसैगरी, महामारीबाट मृत्युदर कम गर्न सुविधायुक्त प्रदेश स्वास्थ्य आपत्कालीन स्थापना गरी सञ्चालन गरिने नीति तथा कार्यक्रममा उल्लेख छ । सरकारले संघ तथा स्थानीय सरकारसँगको समन्वय र साझेदारीमा पूर्ण सुरक्षित मातृत्व प्रदेश र पूर्ण खोपयुक्त प्रदेश घोषणा गर्ने गरी अभियानकै रूपमा सघन कार्यक्रम सञ्चालन गरिनेछ ।

शल्यक्रिया सुविधासहितको घुम्ती विशिष्ट स्वास्थ्य र ल्याब सेवा शिविर नियमित रूपमा सञ्चालन गरिने, गौरवको आयोजनाको रूपमा मधेस विज्ञान स्वासथ्य प्रष्ठिानलाई स्वास्थ्यक्षेत्रको विशिष्ट अध्ययन र अनुसन्धान गर्ने क्षेत्रको रूपमा विकास गर्दै लगिने र आगामी आर्थिक वर्षभित्रै अध्ययन आध्यापनको सुरुवात गरिने, बाराको पथलैया र सप्तरीको रूपनीमा ट्रमा अस्पताल बनाई सञ्चालनमा ल्याइने नीति तथा कार्यक्रममा उल्लेख छ ।

त्यसैगरी, दलित सशक्तीकरण ऐनले व्यवस्था गरेका प्रदेशभित्रको दलितलगायत सीमान्तकृत तथा विपन्न परिवारको निःशुल्क स्वास्थ्य बीमा कार्यक्रम सञ्चालन गरिनेछ । प्रत्येक जिल्लामा स्रोतसाधान सम्पन्न प्रविधिमैत्री दक्ष जनशक्तियुक्त एउटा नमुना विद्यालय स्थापना गरिने नीति तथा कार्यक्रममा उल्लेख छ । त्यस्तै, कोभिडका कारण रोजगारी गुमाएका युवाका लागि मुख्यमन्त्री युवा स्वरोजगार उद्यम विकास कार्याक्रम सञ्चालन, मुख्यमन्त्री रनिङ शिल्ड सुरु गरी खेलकुद विकास र विपन्न दलितहरूका लागि दलित छात्रावृत्ति र रासन कार्ड उपलब्ध गराउने सरकारको नीति तथा कार्यक्रममा समेटिएको छ ।

चुरे संरक्षणमा विशेष सहयोगको घोषणा गर्दै स्थानीय तह, संघीय सरकारसँग समन्वय गरी चुरे संरक्षण गर्ने नीति लिएको छ । एक जिल्ला एक पर्यटन केन्द्र बनाएर प्रदेश पर्यटन विकास गर्ने सरकारले नीति लिएको छ ।

कृषि व्यवसाय प्रवर्द्धन गर्न मूल्य निर्धारणमा कृषकको मुख्य भूमिका, कृषि बीमा, कृषि सडक, कृषि विद्युतीकरण र कृषि सिँचाइ प्राथमिकतामा राखिएको छ । कृषिको मझौला उद्योगको कर राजस्व छुट, उखु कृषक र चिनी उद्योगका लागि विशेष प्याकेज, भेटेनरी सेवालाई प्रभावकारी बनाउने नीति सरकारले लिएको छ ।

कृषि यन्त्रीकरणको विकास गरी कृषि उत्पादकत्व बढाउन दिगो मूल आधार तय गरी कृषिजन्य औद्यौगिकीकरणमा विशेष सहयोग गरिनेछ ।