दीपक मनाङेले छाडे मुख्यमन्त्री गुरुङकाे साथ, गण्डकीमा अब विपक्षीकाे पल्ला भारी

दीपक मनाङेले छाडे मुख्यमन्त्री गुरुङकाे साथ, गण्डकीमा अब विपक्षीकाे पल्ला भारी

A+ A A-

मुख्यमन्त्री पृथ्वीसुब्बा गुरूङ नेतृत्वको सरकारका मन्त्री राजीव गुरुङ (दीपक मनाङे)ले सरकार पक्षको साथ छोडेका छन् ।

प्रदेशसभा विघटन हुने देखेपछि युवा तथा खेलकुदमन्त्री मनाङेले सरकारको साथ छोडेका हुन् । ‘तपाईंहरूले ३० पुर्‍याउनुस्, ३१ पुर्‍याउने काम मेरो भयो तर प्रदेशसभा विघटन हुनहुँदैन भन्नुभयो’, माओवादी सांसद दीपक कोइरालाले शिलापत्रसँग भने ।

अब विपक्षी गठबन्धनको तर्फबाट फ्लोर क्रस नभए कांग्रेस संसदीय दलका नेता कृष्णचन्द्र नेपाली पोखरेल मुख्यमन्त्री बन्ने छन् ।

मनाङेले साथ दिने बताएसँगै ६० सदस्यीय प्रदेशसभामा विपक्षी गठबन्धनको पक्षमा ३१ अर्थात् सरकार बनाउन ठिक्क बहुमत पुगेको छ ।

मनाङे गण्डकी प्रदेशसभाका स्वतन्त्र सांसद हुन् । उनले मुख्यमन्त्री गुरूङ नेतृत्वको सरकारलाई समर्थन गरेका थिए । त्यसैको फलस्वरूप उनी युवा तथा खेलकुद मन्त्री बने ।

विश्वासको मत लिनुअघि उनले सरकारको साथ छोड्दा एमालेको रणनीतिमा धक्का लागेको छ । आफ्नो सरकार बन्न नसके विपक्षीलाई पनि सरकार बनाउन नदिने र चुनाव गराउने रणनीति रहेकोमा त्यसमा मनाङेले साथ नदिने भएका छन् ।

मुख्यमन्त्री गुरूङले आज १२ बजेपछि संसदबाट विश्वासको मत लिँदै छन् ।

अंकगणित यस्तो

मन्त्री मनाङे सरकारको विपक्षमा उभिएसँगै विपक्षी गठबन्धनको पक्षमा बहुमत पुगेको छ । अहिलेकै सरकार जोगिनुपर्नेमा एमालेका २७ र राष्ट्रिय जनमोर्चाका एकसहित २८ सांसद छन् ।

त्यस्तै विपक्षी गठबन्धनको पक्षमा कांग्रेसका १५, माओवादीका ११, राष्ट्रिय जनमोर्चा र जनता समाजवादी पार्टीका दुई/दुई र स्वतन्त्र सांसद मनाङे सांसद छन् । मुख्यमन्त्री गुरूङले विश्वासको मत लिँदा सभामुखबाहेक ५९ जनाले सरकारबारे पक्ष–विपक्षमा मत हाल्ने छन् ।

पृथ्वीसुब्बाको पक्षमा २८ मत भएकाले विश्वासको मत पाउन उनले तीन सांसद आफ्नो पक्षमा पार्नुपर्छ । अंकगणित हेर्दा उनले विश्वासको मत पाउने देखिँदैन । विपक्षीले सरकार बनाउन दुई पटक प्रयास गरे पनि जनमोर्चाका सांसद विभाजित हुँदा पृथ्वीसुब्बाको सरकार जोगिएको छ ।

जनमोर्चाका तीन सांसदमध्ये कृष्ण थापा हालकै सरकार जोगाउनुपर्ने पक्षमा खुलेरै लागेका छन् । बुधबार दिउँसोसम्म कांग्रेसका १५, माओवादीका ११, जनमोर्चा र जसपाका दुई–दुई गरेर ३० सांसद नयाँ सरकार बनाउनुपर्ने पक्षमा थिए । साँझ मन्त्री मनाङेले पनि विपक्षी गठबन्धनलाई साथ दिने बताएसँगै विपक्षमा ३१ मत भएको छ ।

मुख्यमन्त्रीले संसदबाट विश्वासको मत नपाए वा मत लिनुभन्दा अगाडि राजीनामा दिए प्रदेश प्रमुखबाट संविधानको धारा १६८ (५) अनुसार सरकार गठनको आह्वान हुने छ । विपक्षमा रहेका भनिएका सांसदले हालकै गठबन्धनको साथ नछोडे ३१ सांसदसहित कांग्रेस संसदीय दल नेता कृष्णचन्द्र नेपाली पोखरेल मुख्यमन्त्री प्रस्ताव हुने छन् ।

त्यसरी सरकार बनाउन खोज्दा असफल भए संविधानको धारा १६८ (७) अनुसार चुनाव घोषणा हुनेछ ।

सम्बन्धित समाचार