बैंकर्स संघले भन्‍यो - सामाजिक सुरक्षा कोषमा आवद्ध हुन जबर्जस्ती नगर्नू

A+ A A-

सामाजिक सुरक्षा कोषले असार मसान्तभित्र सूचीकृत हुन निरन्तर ताकेता गरिरहेको अवस्थामा वाणिज्य बैंकहरूको छाता संगठन बैंकर्स संघले जबर्जस्ती नगर्न भनेको छ ।

'अहिले पनि कर्मचारीहरूको ठूलो समूह सामाजिक सुरक्षा कोषमा योगदान गर्नभन्दा हालका अवकास योजनाहरूमा योगदान गर्दा नै अवकासपछि आफू बढी सुरक्षित हुने महसुस गरिराख्नुभएको छ,' संघले सामाजिक सुरक्षाकोषलाई बुधबार लेखिएको पत्रमा भनिएको छ 'संविधानले प्रत्याभूत गरेको सम्पत्तिको हक, सामाजिक सुरक्षाको हक, समानताको हक, श्रमको हकलगायतका मौलिक हकहरूको व्यवस्थालाई ध्यान दिँदै योगदानमा आधारित सामाजिक सुरक्षा कोषमा आबद्ध हुन चाहने कर्मचारीलाई आबद्ध गर्ने र हालको अवकास कोषहरूमा आबद्ध हुन चाहने कर्मचारीहरूलाई त्यसैमा आबद्ध हुने स्वतन्त्रता दिन उपयुक्त देखिन्छ ।'

कोषले बजेटलगत्तै संघलाई पत्र लेख्दै मसान्तभित्र सामाजिक सुरक्षा कोषमा आवद्ध हुन भनेको थियो । यस विषयमा बैंकका कर्मचारीलेसमेत असन्तुष्टि जनाएपछि संघले इच्छाअनुसार मात्रै आउन पाउनुपर्ने व्यवस्था गर्न भनेको हो ।

एउटै बैंकका कर्मचारीहरू दुइटा फरक कोषहरूमा आबद्ध हुँदा बैंकको काम बढ्ने पनि संघले जनाएको छ । 'कोष तथा संघबीच सामाजिक सुरक्षाका विषयमा नियमित रूपमा सम्पर्कमा रही सुमधुर सम्बन्धका साथ अघि बढिरहेको अवस्था छ,' संघले लेखेको छ, 'पछिल्लो समय कोषले २ बैंकहरूलाई सम्बन्धित बैंकसँग केही छलफल तथा बुझबुझारथसमेत नगरी उजुरीउपर एकतर्फी रूपमा आदेश दिएको तथा यस विषयमा कोषका अधिकारीहरूले मिडियामा प्रचारात्मक रूपले अभिव्यक्ति दिएकोमा संघको तर्फबाट असन्तुष्टि व्यक्त गर्दछौँ ।'

संघले कर्मचारीलाई जोरजबर्जस्ती गरेरभन्दा आकर्षित गरेर लैजान पनि कोषलाई सुझाव दिएको छ।