गण्डकीका सांसद खिमविक्रम शाही भन्छन्- शंका गर्नु पर्दैन, पार्टीले भनेकै ठाउँमा मत हाल्छु

गण्डकीका सांसद खिमविक्रम शाही भन्छन्- शंका गर्नु पर्दैन, पार्टीले भनेकै ठाउँमा मत हाल्छु

राष्ट्रिय जनमोर्चाका सांसद खिमविक्रम शाही ।

A+ A A-

गत १५ वैशाखमा गण्डकी प्रदेशका मुख्यमन्त्री पृथ्वीसुब्बा गुरूङमाथि संसदमा मत विभाजन हुने कार्यसूची थियो । राष्ट्रिय जनमोर्चाका सांसद खिमविक्रम शाही एक्कासि सम्पर्कविहीन भए ।

उनी हराएको निवेदन परेको भन्दै सभामुखले अर्को विशेष अधिवेशनको चौँथो बैठक सूचना नआउँदासम्म स्थगित गरे । पछि उनी अस्पतालमा भेटिए । २४ घन्टामै तीनथरी कोरोना रिपोर्ट आयो । यो स्वाभाविक थिएन ।

पछि २९ वैशाखमा विपक्षी गठबन्धनले सरकार बनाउने भनेर प्रदेश प्रमुख कहाँ हस्ताक्षर बुझाउँदा सांसद शाहीले आफू तटस्थ रहेको बताए । ठूलो दलको नेताको हैसियतले पृथ्वीसुब्बा गुरूङले शपथ लिएपछि सांसद शाहीले आफ्नो हस्ताक्षर किर्ते गरेर प्रदेश प्रमुखलाई तटस्थको पत्र पठाइएको दाबी गरे ।

२७ जेठमा मुख्यमन्त्री विश्वासको मत लिँदै छन् । दुई पटक मुख्यमन्त्री गुरूङको पक्षमा देखिएका उनले अब के गर्छन् भन्ने धेरैको चासो छ । सांसद शाहीले फ्लोर क्रस गर्छन् भन्ने आशंका पनि नभएको होइन ।

‘तपइँमाथि धेरैको शंका छ । विश्वासको मत लिँदा के गर्नुहुन्छ ?’ भन्ने प्रश्नमा सांसद शाहीले आफू विपक्षी गठबन्धनमै रहेको प्रतिक्रिया दिएका छन् । शिलापत्रलाई छोटो प्रतिक्रिया दिँदै सांसद शाहीले आफू पार्टीको निर्णयअनुसार चल्ने र विश्वासको मतको विपक्षमै मत हाल्ने बताए । ‘त्यसमा शंका गर्नु पर्दैन । पार्टीको नीति विपरीत जाने कुरा नै भएन,’ उनले भने, ‘म विपक्षी गठबन्धनमै छु । पार्टीले भनेकै ठाउँमा मत हाल्छु ।’

सांसद शाही विपक्षी गठबन्धनको बैठकमा पनि सहभागी हुँदै आएका छन् । जनमोर्चा पार्टी केन्द्रले एमाले नेतृत्वको सरकारको विपक्षीमा रहन सांसदलाई निर्देशन दिएको छ । मुख्यमन्त्री गुरूङले विश्वासको मत पाएनन् भने विपक्षीले संविधानको धारा १६८ (५) अनुसार सरकार बनाउने अवसर पाउँछन् ।

जनमोर्चाका सांसद कृष्ण थापा हालकै सरकार जोगिनुपर्ने पक्षमा छन् । सो धाराअनुसार सरकार बनाउँदा सभामुख नेत्रनाथ अधिकारीले राजीनामा गर्नुपर्छ । माओवादीनिकट सभामुख अधिकारी सांसदको हैसियतमा रहे भने विपक्षी गठबन्धनसँग ३१ मत पुग्छ ।

विपक्षी गठबन्धनले सभामुखको राजीनामालाई अन्तिम विकल्पको रुपमा लिएको छ । तर, सरकार बनाउन सभामुखले राजीनामा दिएको घटना हालसम्म नभएकाले सभामुखले राजीनामा दिए नजिर बस्ने छ ।

माओवादी सांसद दीपक कोइरालाले सभामुखको राजीनामाबारे अहिलेसम्म पार्टीमा छलफल नभएको बताए । ‘मर्यादाको पनि कुरा भयो । सभामुखको मनस्थिति के छ त्यो पनि हेर्नुप¥यो,’ उनले भने, ‘यसबारेमा छलफल भइसकेको छैन । अन्तिम विकल्प हुनसक्छ तर स्वाभाविकचाहिँ हुँदैन ।’

यस्तो छ प्रदेशसभाको अंकगणित

पृथ्वीसुब्बाले विश्वासको मत नपाउने र विपक्षीले सरकार बनाउन नसके प्रदेशसभा विघटन हुनेछ । प्रदेशसभामा एमालेको पक्षमा एक स्वतन्त्रसहित २८, कांग्रेससँग १५, माओवादीसँग १२ (सभामुखसहित), राष्ट्रिय जनमोर्चासँग तीन र जनता समाजवादी पार्टीसँग दुई सांसद छन् । उनले विश्वासको मत लिँदा सभामुखबाहेक ५९ जनाले सरकारबारे पक्ष–विपक्षमा मत हाल्ने छन् ।

पृथ्वीसुब्बाको पक्षमा २८ मत भएकाले विश्वासको मत पाउन उनले तीन सांसद आफ्नो पक्षमा पार्नुपर्छ । अंकगणित हेर्दा उनले विश्वासको मत पाउने देखिँदैन । विपक्षीले सरकार बनाउन दुई पटक प्रयास गरे पनि जनमोर्चाका सांसद विभाजित हुँदा पृथ्वीसुब्बाको सरकार जोगिएको छ ।

जनमोर्चाका तीन सांसदमध्ये कृष्ण थापा हालकै सरकार जोगाउनुपर्ने पक्षमा खुलेरै लागेका छन् । सरकार पक्षसँग उनीसहित २९ सांसद छन् । कांग्रेसका १५, माओवादीका ११, जनमोर्चा र जसपाका दुई–दुई गरेर ३० सांसद नयाँ सरकार बनाउनुपर्ने पक्षमा छन् ।

यसरी प्रतिपक्षसँग ३० र सत्तापक्षसँग सांसद संख्या २९ छ । सत्ता र प्रतिपक्षले सरकार बनाउन नसके संविधानको धारा १६८ (७) अनुसार चुनाव घोषणा हुनेछ ।

प्रकाशित मिति: मंगलबार, जेठ २५, २०७८ १६:१७