गर्भवती श्रीमतीलाई खुवाउन लागेको ‘ड्यु’मा झिँगा र लेदो भेटिएपछि... (भिडियोसहित)

गर्भवती श्रीमतीलाई खुवाउन लागेको ‘ड्यु’मा झिँगा र लेदो भेटिएपछि... (भिडियोसहित)

A+ A A-

आइतबार काठमाडौंको पेप्सीकोलामा बसोबास गर्ने अक्षयकुमार चौधरीलाई उनकी गर्भवती श्रीमतीले ‘माउण्टेन ड्यु’ ल्याइदिन आग्रह गरिन् । चौधरी सिधै आफू खाजा खाने गरेको होटल पुगेर सिसाको बोतलको ड्यु किने र बोतल केही बेरमा ल्याइदिने भनेर कोठामा पुगे ।

उनकी श्रीमतीले टेबुलमाथि राखिएको उक्त बोतलभित्र केही असामान्य चीज देखिन् । ‘भित्र नियालेर हेर्दा दुईवटा झिँगा र तल सेतो लेदो रहेछ । मलाई त डर नै लाग्यो नि,’ चौधरीले भने ।

पेप्सी, मिरिन्डा, स्लाइस र ड्युजस्तो लोकप्रिय पेय पदार्थ बनाउने कम्पनीको लापर्बाहीप्रति उनी आक्रोशित छन् ।

‘यो खाएर बिरामी परेको भए को जिम्मेवारी हुन्थ्यो ? यस्ता कम्पनीलाई सरकारले कारबाही गर्नुपर्छ,’ उनले भने ।

हामीले योबारे उत्पादक कम्पनी वरुण वेभरेजमा सम्पर्क गर्दा कसैले स्पष्ट उत्तर दिएनन् । कम्पनीका मार्केटिङ प्रमुख हेमन्त वाङ्सु यो आफ्नो डिपार्टमेन्ट नभएको भन्दै पन्छिए ।

‘यो मेरो डिपार्टमेन्ट होइन । हाम्रो कन्जुमर कप्लेन पोर्टलमा नम्बर होला । त्यहाँ फोन गर्नुस्, कि त अफिसमै आएर कम्प्लेन गर्न सकिन्छ,’ उनले शिलापत्रसित भने ।

सिजनको समयमा कम्पनीको लापर्बाहीका कारणले यस्ता पेय पदार्थमा अखाद्य वस्तु भेटिने घटना बढिरहेको उपभोक्ता अधिकारकर्मी माधव तिमल्सिनाले बताए ।

‘विगतका उदाहरण हेर्दा बजारबाट उठाएर ल्याएका बोतल राम्रोसँग सफा नगर्दा यस्ता समस्या देखिने गरेको छ । यस्ता लापर्बाहीका कारण लाखौँ उपभोक्ताको स्वास्थ्यमा गम्भीर असर पर्ने हुँदा कानुनको दायरामा ल्याइनुपर्छ,’ उनले भने ।

ग्राहकले वाणिज्य आपूर्ति तथा उपभोक्ता संरक्षण विभागमा उजुरी गरे उपभोक्ता संरक्षण ऐनले अखाद्य वस्तुको उत्पादन र बेचबिखन गर्नेलाई एक वर्षसम्म जेल र ३ लाख रुपैयाँसम्म जरिवाना गराउन सक्ने तिमल्सिनाले जानकारी दिए ।

सिल नखोलेका यस्ता पेय पदार्थमा कम्पनीकै दायित्व हुने वाणिज्य आपूर्ति तथा उपभोक्ता संरक्षण विभागका महानिर्देशक प्रकाश पौडेलले बताए । उपभोक्ता वा उपभोक्ताको तर्फबाट कसैले निवेदन दिए कारबाहीको प्रक्रिया अघि बढाउन सकिने उनले बताए ।

प्रकाशित मिति: सोमबार, जेठ २४, २०७८ १८:५०