मुख्यमन्त्री राईको टिप्पणी- प्रचण्डनिवासबाट सुरु भएको राजनीतिक कोभिड देशभर फैलियो

मुख्यमन्त्री राईको टिप्पणी- प्रचण्डनिवासबाट सुरु भएको राजनीतिक कोभिड देशभर फैलियो

A+ A A-

प्रदेश १ का मुख्यमन्त्री शेरधन राईले नेपाल राजनीतिक कोभिडबाट गुज्रिरहेको टिप्पणी गरेका छन् ।

सोमबार प्रदेश १ को प्रदेशसभाको आठौँ तथा बजेट अधिवेशनलाई सम्बोधन गर्दैै मुख्यमन्त्री राईले माओवादी केन्द्रका अध्यक्ष पुष्पकमल दाहाल प्रचण्डतर्फ इंगित गर्दै खुमलटारबाट सुरु भएको राजनीतिक कोभिड देशभर फैलिएको टिप्पणी गरेका हुन् ।

‘नेकपा हुँदा खुमलटारबाट सुरु भएको राजनीतिक कोभिडले देशभर गाँजेको छ । प्रदेशहरुमा अस्थिरता निम्त्याइएको छ,’ उनले भने, ‘फलस्वरुव आज हामी नयाँ अवतारमा छौँ । सरकारमै रहनुभएका साथीहरु अहिले अर्कै रो’मा पुग्नु भएको छ । चोक्टा खान जाँदा खै के भने जस्तो ।’

उनले अहिले नेकपाबाट सुरु भएको राजनीतिक कोभिडले देशभर गाँजिरहे पनि अब नयाँ ट्रयाकबाट अघि बढिरहेको दाबी गरे । उनले कोरोना महामारीका कारण अध्यादेश ल्याइएको बताए । ‘यत्रो महामारी छ । तीन÷चार जना माननीय त संक्रमित नै हुनुहुन्छ तर पनि हामी जिम्मेवार ढंगबाट उभिइरहेका छौँ,’ उनले भने, ‘सरकार जिम्मेवारीबाट पन्छिन खोजेको होइन । छल्न र तर्किन खोजेको होइन । थोरै समय मात्र घटाइएको हो ।’

मुख्यमन्त्री राईले हिउँदे अधिवेशन अन्त्यको समयमा विपक्षीले उठाएका माग सम्बोधन गर्न सदनमा उपस्थित भएपनि आफूलाई बोल्न नदिएर विपक्षीले नै गैरजिम्मेवार काम गरेको आरोप लगाए । ‘हिउँदे अधिवेशनमा माननीय सदस्यहरुले उठाएका विषयमा सम्बोधन गर्न म उपस्थित भएको थिएँ,’ उनले भने, ‘तर, मलाई बोल्ने अवसर नै दिनुभएन ।’