प्रदेश १ : सरकारलाई नेपाल समूहको साथ, विपक्षीको चाहनामा धक्का लाग्ने

A+ A A-

सत्तारुढ नेकपा (एमाले) को विवाद कायमै रहेका बेला प्रदेश १ सरकारले प्रदेशसभाको बजेट अधिवेशन आगामी सोमबार दिउँसो २ बजेका लागि आह्वान गरेको छ । पार्टीभित्रकै असन्तुष्ट समूहले असहयोग गर्ने आशंकाका बीच सरकारले प्रि–बजेट छलफलको समयावधि छोट्याउने अध्यादेश जारी गर्दै २० जेठमा बजेट अधिवेशन आह्वान गरेको थियो ।

सरकारले प्रि–बजेटमाथिको छलफल छोट्याउने अध्यादेश ल्याएसँगै प्रमुख प्रतिपक्षी नेपाली कांग्रेसहितका विपक्षी दलहरू मात्र होइन, पार्टीभित्रकै माधव नेपाल समूहसमेत रुष्ट छ । तर, एमालेको विवाद समाधानका लागि केन्द्रमा छलफल र वार्ता चलिरहेकाले नेपाल समूहले तत्काललाई सरकारलाई नै साथ दिने संकेत गरेको छ ।

उता प्रमुख प्रतिपक्षी दल नेपाली कांग्रेससहितका विपक्षी दलहरूले भने सरकारका गलत क्रियाकलापको सदनबाटै कडा प्रतिवाद गर्ने बताउँदै आएका छन् । केन्द्रमा विपक्षी गठबन्धनलाई साथ दिएको नेपाल समूहले प्रदेश १ मा विपक्षी दलहरूलाई साथ नदिएको अवस्थामा सरकारको नीति कार्यक्रम तथा बजेट बहुमतले पास हुनेछ ।

नीति तथा कार्यक्रम फेल भए सरकारसमेत परिवर्तन हुन सक्छ । तर, तत्काललाई विपक्षी गठबन्धनमा रहेको माधव नेपाल समूहले सरकारलाई नै साथ दिने भएपछि सरकारको नीति तथा कार्यक्रम फेल गराउने विपक्षी दलहरूको चाहना असफल हुने भएको छ ।

सत्तारुढ दल नेकपा एमालेभित्रको विवाद कायम रहेकाले नेपाल समूहका सांसदहरूले सरकारका प्रस्तावमा असहयोग गर्ने विपक्षी दलहरूको अनुमान थियो । तर, एमालेको केन्द्रमा विवाद समाधानका लागि प्रयास भइरहेकाले हाललाई माधव नेपाल समूहले सरकारलाई नै साथ दिने भएपछि बजेट असफल बनाउने विपक्षीको चाहनामा धक्का लाग्ने भएको हो ।

नेपाल समूहका प्रभावशाली नेतासमेत रहेका एमाले केन्द्रीय सदस्य तथा प्रदेश सांसद राजेन्द्र राईले हाललाई आफ्नो समूहको साथ सरकारलाई नै रहने शिलापत्रलाई बताए । ‘माथि छलफल र वार्ता अगाडि बढिरहेको छ । सरकारलाई बजेट कार्यक्रममा त सहयोग समर्थन भइहाल्छ । बजेटसम्मको कुरामा समस्या हुँदैन,’ उनले भने, ‘बजेट नै फेल भएर सरकार परिवर्तन हुने प्रक्रिया अगाडि नबढ्ला ।’

प्रदेशसभामा सत्तारुढ दल नेकपा (एमाले) एक्लैको एकल बहुमत रहेकाले एमाले एकजुट हुँदा सरकारको बजेट बहुमतले पास हुन्छ । त्यसैले एकल बहुमतका कारण सरकारले विपक्षी दलहरूलाई पेलेरै जाने सम्भावना देखिएको छ । विपक्षी सबै दलहरूले सरकारविरुद्ध मोर्चाबन्दी गरेका छन् र सदनमा सरकारको कडा प्रतिवाद गर्ने बताएका छन् ।

विपक्षी दलहरूले प्रदेशसभामा सरकारविरुद्ध सशक्त प्रतिवाद गर्ने चेतावनी दिएका छन् । प्रमुख प्रतिपक्षी दल नेपाली कांग्रेसका प्रमुख सचेतक केदार कार्कीले सदनमा सरकारविरुद्ध कडा रूपमा प्रस्तुत हुने शिलापत्रलाई बताए ।

‘सरकार जुन ढंगले गलत प्रक्रियाबाट अगाडि बढ्न खोजिरहेको छ, त्यसमा हाम्रो असहमति छ,’ उनले भने, ‘केन्द्रकै सिको गरेर सरकारले संविधान र कानुनविपरीत क्रियाकलाप सुरु गरेको छ । सरकारले तालिका र ऐनअनुसार पनि काम गरेन । सदनमा यस कुराको हामी सशक्त प्रतिवाद गछौँ ।’

विपक्षी दल नेकपा माओवादी केन्द्रको संसदीय दलका नेता इन्द्र आङ्बोले सरकारले संसद् र जनमतलाई अपमान गरेर बजेट ल्याउन खोजेकाले जनताप्रति सरकारलाई जनउत्तरदायी बनाउन सदनबाटै कडा प्रतिवाद गर्ने बताए । ‘हाम्रो कुरा प्रस्टै छ । अहिले सरकारले ल्याउन खोजिरहेको बजेट औपचारिकता पूरा गर्न र कर्मकाण्डी ढंगबाट ल्याउन लागिरहेको छ,’ उनले भने, ‘संसद र जनमतलाई अपमान गरेर जुन ढंगबाट सरकार प्रस्तुत हुँदै छ, त्यसको हामी सदनबाटै सरकारलाई जवाफदेही बनाउन प्रतिवाद गर्छौं।’

विपक्षी दल जनता समाजवादी पार्टीले सरकारका कमीकमजोरी भए पनि बजेट पारित हुनुपर्ने बताए । ‘सरकारले ल्याएका प्रस्तावमा हाम्रो समर्थन रहँदैन, जुन प्रक्रिया र कानुन मिचेर ल्याउन लागिरहेको छ,’ उनले भने, ‘तर, बजेट आउनुपर्छ । बजेट कुन खालको आउँछ, त्यहीअनुसार हामी सरकारका कमजोरी सदनमा राख्छौँ ।’

यता सक्षपक्षले भने सरकारले प्रस्तुत गर्ने बजेट बहुमतले पारित हुने बताएको छ । प्रदेश सरकारका उद्योग, पर्यटन वन तथा वातावरण राज्यमन्त्री राजकुमार ओझाले पार्टीको विवाद समाधानको प्रयास भइरहेकाले सरकारका प्रस्ताव बहुमतले पारित हुने दाबी गरे ।

उनले पार्टी र संसदीय दलको निर्णयविरुद्ध पार्टीका कुनै पनि सांसद नउभिने बताउँदै पार्टीको निर्णय र हितविपरीत चल्नेलाई कारबाही गरिने बताए । ‘अहिले पार्टीको विवाद समाधानका लागि प्रयास भइरहेका छन् । मिल्ने कुरा भइरहेको छ । मिल्नेसम्म मिलाउने नै हो,’ उनले भने, ‘नमिल्नेहरू त भोलि पार्टीको ट्रयाकभन्दा बाहिर जाँदाखेरि कारबाहीमा पर्नुभन्दा अर्को विकल्प छैन ।’

प्रदेश १ मा नेकपा एमाले एक्लैको स्पष्ट बहुमत छ । सबै सांसद एकढिक्का भएको खण्डमा बजेट सहज रूपमा पारित हुन्छ । ९३ सदस्यीय प्रदेशसभामा एमालेका ५१ सांसद छन् ।

प्रदेशसभा सचिव गोपाल पराजुलीले प्रदेशसभा बैठकको कार्यसूची तयार भइनसकेको बताए । उनले सोमबार बिहानसम्म कार्यसूची तयार हुने जानकारी दिए ।

प्रकाशित मिति: आइतबार, जेठ २३, २०७८ १९:५४