विराटनगर दुर्घटना फलोअपः दुर्घटना गराएका सांसद विन्दियाका छोरा रोबिन पक्राउ

विराटनगर दुर्घटना फलोअपः दुर्घटना गराएका सांसद विन्दियाका छोरा रोबिन पक्राउ

A+ A A-

एक भारतीय मजदुरकोे मृत्यु र अर्का एक गम्भीर घाइते हुनेगरी भएको दुर्घटनामा संलग्न आरोपमा प्रहरीले सांसद विन्दिया कार्कीका छोरालाई पक्राउ गरेको छ । नेपाली कांग्रेस प्रदेश १ की प्रदेशसभा सदस्य बिन्दिया कार्कीका छोरा रोबिन भनिने रविन कार्कीलाई प्रहरीले पक्राउ गरेको हो ।

कार्कीलाई आइतबार अपराह्न विराटनगरको बरगाछीस्थित घरदेखि नै पक्राउ गरेको जिल्ला प्रहरी कार्यालय मोरङका प्रमुख प्रहरी उपरीक्षक सन्तोष खड्काले जानकारी दिए । पक्राउ परेका कार्कीलाई प्रहरीले म्याद थपका लागि लगे पनि अदालतको समय सकिएकाले आज म्याद थप हुन नसकेको मोरङ प्रहरी प्रवक्ता प्रहरी नायब उपरीक्षक मानबहादुर राईले शिलापत्रलाई जानकारी दिए ।

उनले भोलि म्याद थपका लागि कार्कीलाई अदालतमा उपस्थित गराइने बताए । कार्कीलाई सवारी ज्यान मुद्दामा म्याद थप तयारी गरिएको प्रहरीले जनाएको छ ।

गत बिहीबार राति साढे ७ बजे प्रदेश सांसद कार्कीका छोरा रोबिनले मदिरा सेवन गरी चलाएको प्रदेश ३–०१–००२ च २१३९ नम्बरको कारले पैदलयात्रीलाई ठक्कर दिदाँ ३५ वर्षीय भारतीय नागरिक मुकेश शर्माको मृत्यु भएको थियो भने मोरङको कटहरी गाउँपालिका– २ का २७ वर्षीया राजकुमार राजवंशी गम्भीर घाइते भएका थिए ।

तर, सांसद कार्कीले दुर्घटनामा आफ्नो छोराको संलग्नता नरहेको दाबी गर्दै आएकी छिन् । उनले छोरालाई बचाउन दुर्घटना भएको कार आफ्नै रहे पनि सो कार कोरोना महामारीमा एम्बुलेन्सका रूपमा प्रयोग गर्न दिएको दाबी गरेकी थिइन् ।