माओवादी केन्द्रले फिर्ता लियो प्रदेश १ सरकारलाई दिएको समर्थन

A+ A A-

नेकपा माओवादी केन्द्रले प्रदेश १ सरकारलाई दिएको समर्थन फिर्ता लिएको छ ।

सर्वोच्च अदालतको फैसलापछि एमाले र माओवादी केन्द्र ब्युँतिएको तीन महिनापछि आइतबार मओवादी केन्द्रले प्रदेश १ सरकारलाई दिएको समर्थन फिर्ता लिएको हो । माओवादी केन्द्र संसदीय दलका नेता इन्द्रबहादुर आङ्बोले सरकारलाई दिएको समर्थन फिर्ता लिएको पत्र प्रदेशसभा सचिवालयमा बुझाएका हुन् ।

दलका नेता आङ्बोले हिउँदे अधिवेनबाटै समर्थन फिर्ता लिन खोजिएपनि संसद सुचारु नभएकाले अहिले समर्थन लिएको बताए । ‘पहिल्यै फिर्ता लिने संसदीय दलबाट निर्णय भएको थियो । सदनबाटै फिर्ता लिन खोजेको भएपनि अघिल्लो पटक सदन पूरा चल्न सकेन,’ उनले शिलापत्रसँग भने ।

माओवादी केन्द्रले बजेट अधिवेशनको सुरु हुनुअगावै सरकारलाई दिएको समर्थन फिर्ता लिएको हो । १५ दिनअगाडि प्रि-बजेट छलफल गर्नुपर्ने कानुनी व्यवस्थालाई अध्यादेशमार्फत संशोधन गरेको सरकारले बोलाएको प्रदेशसभाको अधिवेशन सोमबारबाट सुरु हुँदैछ ।

३ फागुन २०७३ मा नेकपा एमाले संसदीय दलका नेता शेरधन राई माओवादी केन्द्रसमेतको समर्थनमा मुख्यमन्त्री चयन भएका थिए । एमाले र माओवादी मिलेर नेकपा भएपछि राई नै दलको नेता चयन भएका थिए ।

१६ चैत २०७७ मा बसेको माओवादी केन्द्र संसदीय दलको बैठकले सरकारलाई दिएको समर्थन फिर्ता लिने अधिकार दलको नेतालाई दिएको थियो । सरकारबाट अलग भएको र सरकारका गतिविधि आलोचनायोग्य रहेकोले प्रतिपक्षी भूमिका निर्वाह गर्न सरकारलाई दिएको समर्थन फिर्ता लिएको दलका नेता आङ्बोले बताए ।

सरकारबाट फिर्ता भएको माओवादी केन्द्रलाई प्रतिपक्षी बेञ्चमा राख्न संसद सचिवालयले व्यवस्थापन सुरु गरेको जनाएको छ । सोमबार अपराह्न २ बजे प्रदेशसभाको आठौँ तथा बजेट अधिवेशन आह्वान गरिएको छ ।

प्रकाशित मिति: आइतबार, जेठ २३, २०७८ १७:०३