२७ जेठमा विश्वासको मत लिने तयारीमा मुख्यमन्त्री गुरुङ

A+ A A-

गण्डकी प्रदेशका मुख्यमन्त्री पृथ्वीसुब्बा गुरुङले २७ जेठमा विश्वासको मत लिने तयारी गरेका छन् । आज बसेको कार्यव्यवस्था परामर्श समिति बैठकमा सत्तापक्षीय प्रतिनिधिले २७ जेठमा विश्वासको मत लिने बताएका हुन् ।

‘२५ गते जानकारी गराउँछौँ । दुई दिनमा त्यो परिपक्व हुन्छ अनि २७ गते मतदान गर्ने भनेर सत्तापक्षका माननीयले भन्नुभयो,’ कार्यव्यवस्थाका एक विपक्षी दलका सदस्यले शिलापत्रसँग भने ।

विश्वासको मत लिनुभन्दा दुई दिन अगाडि सरकार पक्षले संसद सचिवालयलाई जानकारी गराउनुपर्छ । ‘अब सरकारले कहिले प्रस्ताव ल्याउँछ त्यसको दुई दिनपछि मतदान हुन्छ,’ सभामुख नेत्रनाथ अधिकारीले भने । सरकारले २७ जेठभन्दा अगाडि प्रस्ताव नल्याउने बताएकाले २७ गते नै विश्वासको मत लिने सम्भावना देखिएको छ ।

गत २९ वैशाखमा पृथ्वीसुब्बा गुरुङ ठूलो दलको नेताको हैसियतले पुनः मुख्यमन्त्री बनेका थिए । मुख्यमन्त्री नियुक्त भएको ३० दिनभित्र विश्वासको मत लिनुपर्ने संवैधानिक व्यवस्था छ ।

कुनै कार्यसूची नभएकाले आइतबारको बैठक स्थगित हुने भएको छ । ‘बजेट अधिवेशन भएकाले विनियोजन विधेयकबाहेक अरुमा छलफल गर्ने कुरा भएन । बजेट ल्याउन पहिला विश्वासको मत लिनुपर्छ,’ कार्यव्यवस्थाका एक सदस्यले भने, ‘अरु कार्यसूची नहुने भएपछि अब विश्वासको मत लिने दिनलाई बैठक बोलाइन्छ । सरकारले कहिले प्रस्ताव दर्ता गर्छ त्यसमा भर पर्ने भयो ।’

यस्तो छ अंकगणित

राष्ट्रिय जनमोर्चाका सांसद कृष्ण थापा बिहीबार पदमुक्त भएसँगै ६० सदस्यीय गण्डकी प्रदेशसभामा हाल सांसद संख्या ५९ भएको छ । सरकारमा आफूलाई टिकाइराख्न मुख्यमन्त्री गुरुङले आफूसँग भएकाबाहेक अरु पार्टीका दुई सांसद आफ्नो पक्षमा पार्नुपर्छ ।

आफू नेतृत्वको सरकार टिकाइराख्न पृथ्वीसुब्बालाई अब ३० मत चाहिन्छ । सांसदबाट थापा पदमुक्त नभएको भए मुख्यमन्त्रीले आफ्नो पक्षमा ३१ जना पुर्‍याउनु पर्थ्यो । हालको अवस्थामा स्पष्ट बहुमत नरहेकाले पृथ्वीसुब्बाको सरकार जोगिने देखिँदैन । सरकार जोगाउन उनले विपक्षी पार्टीका सांसदलाई फ्लोर क्रस गराउन सक्नुपर्छ ।

प्रदेशसभामा एमालेसँग स्वतन्त्रसहित २८, कांग्रेससँग १५, माओवादीसँग १२, जनता समाजवादी पार्टी र राष्ट्रिय जनमोर्चासँग क्रमशः दुई/दुई सांसद छन् । मुख्यमन्त्री पृथ्वीसुब्बा गुरुङलाई विश्वासको मत पुर्‍याउन जसपा र जनमोर्चालाई ल्याउन सके पनि हुन्छ । दुई/दुई सांसद रहेकाले यी पार्टीमध्ये कुनै एकलाई आफ्नो पक्षमा पार्न सके ३० मत पुग्छ ।

पार्टी नै सरकार जोगाउने पक्षमा नआए पनि जनमोर्चा सांसद खिमविक्रम शाही के गर्छन् भन्नेमा धेरैको शंका छ । १५ वैशाखमा अविश्वासमाथि मतदान हुने कार्यसूची रहँदा सांसद शाही एकाएक सम्पर्कविहीन भए । पछि उनी कोरोना पोजिटिभ भएको भन्दै एउटा अस्पतालमा उपचाररत भेटिए ।

२४ घन्टामा गरिएको कोरोना परीक्षणमा रिपोर्ट पोजेटिभ र नेगेटिभ आउँदा उनी बिरामी नभएको र सरकार जोगाउन लागिपरेको आरोप लागेको थियो ।

विपक्षीले बहुमत पुर्‍याउन २९ वैशाखमा प्रदेश प्रमुखकहाँ हस्ताक्षर बुझाउँदा सांसद शाहीले आफू तटस्थ रहेको भन्दै विज्ञप्ती निकाले । प्रदेश प्रमुख सीताकुमारी पौडेलले विपक्षीसँग ३० सांसद रहेको र बहुमत (संसदमा ६० सदस्य हुँदा ३१) नपुगेको भन्दै मुख्यमन्त्रीमा पृथ्वीसुब्बालाई पुनः नियुक्त गरिन् । पृथ्वीसुब्बाको शपथपछि सार्वजनिक विज्ञप्ति आफ्नो नभएको दाबी सांसद शाहीले गरेका थिए ।

अहिले सांसद शाहीलाई मात्रै आफ्नो पक्षमा पारेर पृथ्वीसुब्बा नेतृत्वको सरकार जोगिँदैन । त्यसका लागि थप एक जना सांसद आफ्नो पक्षमा पारेर बहुमत पुर्‍याउनु पर्छ । एमालेकै कोही सांसदले फ्लोर क्रस गरे भने पृथ्वीसुब्बालाई अझ अप्ठेरो पर्नेछ ।

प्रकाशित मिति: शनिबार, जेठ २२, २०७८ १६:२२