विराटनगर दुर्घटना अपडेट : बिनालाइसेन्स गाडी चलाउने छोरा बचाउन सांसद विन्दियाको चलखेल

विराटनगर दुर्घटना अपडेट : बिनालाइसेन्स गाडी चलाउने छोरा बचाउन सांसद विन्दियाको चलखेल

बिहीबार राति कार दुर्घटनामा मारिएका मजदुर । फाइल तस्वीर

A+ A A-

प्रदेश १ की प्रदेशसभा सदस्य विन्दिया कार्कीको छोरा रोविन कार्कीले चलाएको कारको ठक्करबाट एक जना भारतीय नागरिक मृत्यु र अर्का एक जना मजदुर गम्भीर घाइते भए पनि उनलाई बचाउन चलखेल सुरु भएको छ ।

राजनीतिक पहुँचकै भरमा दुर्घटनामा चालकको पहिचान खुले पनि प्रहरीले कार्कीलाई नियन्त्रणमा लिएको छैन । विराटनगरस्थित एयरपोर्ट रोडमा बिहीबार राति प्रदेशसभा सदस्य कार्कीले प्रयोग गर्दै आएको प्रदेश ३–०१–००२ च २१३९ नम्बरको कारको ठक्करबाट मजदुर भारतीय नागरिक ३५ वर्षीया मुकेश शर्माको मृत्यु भएको थियो ।

अर्का मोरङको कटहरी गाउँपालिका-२ का २७ वर्षीया राजकुमार राजवंशी गम्भीर घाइते भएका छन् । मृतक र घाइते विराटनगर–४ स्थित एभरेष्ट स्टिल उद्योगमा कार्यरत मजदुर हुन् । कार चालक रोविनसँग सवारी चालक अनुमति पत्र (लाइसेन्स) नभएको समेत बताइएको छ ।

दुर्घटना भएपछि रोविन फरार छन् । जिल्ला प्रहरी कार्यालय मोरङका प्रवक्ता प्रहरी नायव उपरीक्षक मानबहादुर राईले घटनाको विषयमा अनुसन्धान भइरहेको बताए । दुर्घटनास्थल एशियाटिक होटल र जगदम्बा स्टिल हार्डवेयरको बीचमा रहेका कारण प्रहरीले सीसीटीभी फुटेज र सबै कोटदेखि चालकको पहिचान गर्ने काम सुरु गरेको डीएसपी राईले बताए ।

‘केही कुराहरू खुल्न बाँकी नै छ । अनुसन्धान पूरा भएपछि विस्तृत विवरण उपलब्ध गराउँछौँ,’ उनले शिलापत्रसँग भने, ‘न कानुनी व्यवस्था छ न तथ्यले दिन्छ चलखेल गनलाई । अहिले धेरै चाँडै बोलिहाल्ने विषय होइन । अभियुक्तहरू खुलाउने क्रममा छौँ । अपराधसँग सम्बन्धित व्यक्तिहरूलाई नियन्त्रणमा लिनुपर्ने भएकाले गोपनीयताको कुरा आउँछ । कुनै पक्षपात वा आग्रह पूर्वाग्रह हुँदैन ।’

उनले प्रहरी कसैको दबाब र प्रभावमा नपरी सत्यतथ्य छानबिन गरी दोषीलाई कारबाहीको दायरामा ल्याउने बताए । स्रोतका अनुसार मजदुरीकै लागि नेपाल आएका मृतक भारतीय नागरिक मुकेश शर्माको शव पठाइसकिएको छ ।

उनको परिवारलाई शवसँग भारतीय रुपैयाँ ५० हजार क्षतिपूर्ति स्वरूप दिइएको स्रोतको दाबी छ । यसैबीच दुर्घटनाबारे बुझ्न जिल्ला प्रहरी कार्यालय पुगेका संचारकर्मीलाई समेत प्रहरीले ‘आज यो समाचार नलेख्नु’ भन्दै फर्काइदिएको छ ।

उता सांसद कार्कीले भने गाडी आफ्नै रहेको भए पनि छोराले नकुदाएको दाबी गरेकी छन् । तर, श्रोतका अनुसार कार्कीका छोरा रोविनले मादक पदार्थ सेवन गरेर कार चलाएका कारण दुर्घटना भएको हो ।