शेयरमा पैसा : लगानी १ हजार, नाफा झण्डै ४७ हजार

A+ A A-

नेपाल स्टक एक्स्चेन्जमा सूचीकृत ५२ वटा लघुवित्त वित्तीय संस्थाहरूमा सबैभन्दा महँगो शेयरको रुपमा महिला लघुवित्त वित्तीय संस्था रहेको छ । दोस्रो बजारमा कारोबारमा आएको झण्डै अढाइ महिना हुँदा नै शेयरमूल्यले नयाँ रेकर्ड कायम गरिसकेको छ ।

महिला लघुवित्तको शेयर प्रतिकित्ता ४ हजार ७ सय ५० रुपैयाँ मूल्य पुगिसकेको छ । केही दिनअघि ५ हजारको हाराहारीमा पुगेको शेयरमूल्य पुन: घटेर ४ हजार ७ सयमा आइपुगेको हो । जसबाट १ हजार रुपैयाँ लगानी गरेका लगानीकर्ताले अढाई महिनामा नै ४६ हजार ५ सय रुपैयाँ नाफा कमाइसकेका छन् । १० कित्ता शेयर पाएका लगानीकर्ताले अहिलेसम्म आफ्नो लगानी १ हजार रुपैयाँसहित झण्डै ४७ गुणाले नाफा कमाउन सफल बनेका हुन् ।

३ चैतबाट दोस्रो बजारमा कारोबारमा आएको महिला लघुवित्तको शेयरलाई नेप्सेले ३ सय १३ रुपैयाँ १६ पैसादेखि ९ सय ३९ रुपैयाँ ४८ पैसा सुरुवाती मूल्य तोकेको थियो । जसअनुसार लघुवित्तको पहिलो कारोबार प्रतिकित्ता ४ सय ३८ रुपैयाँ १० पैसामा शेयर खरिदबिक्री भएको थियो ।

महिला लघुवित्तले ४ लाख कित्ता आईपीओ निष्कासन गरेको थियो । बजारमा महिला लघुवित्तको आपूर्ति कम हुँदा पनि दोस्रो बजारमा कारोबारमा आएदेखि यसको माग बढ्न पुग्यो । जसले गर्दा हरेक दिनजसो सर्किट लाग्दै आएको छ ।

हिजो पनि महिला लघुवित्तको शेयरमूल्य ४ सय ३२ रुपैयाँले बढेर सकारात्मक सर्किट लागेको थियो । मागअनुसार आपूर्ति न्यून हुँदा पनि यसको प्रभाव शेयरमूल्यमा पर्दै आएको छ ।

दैनिक कारोबारलाई हेर्ने हो भने पनि औसतमा २ हजार कित्ता मात्रै कारोबार हुँदै आएको छ ।

निरन्तर मूल्य बढ्नुमा यस्ता छन् कारण

कुनै पनि कम्पनीको शेयरमा माग अत्याधिक भएमा सोहीअनुसार मूल्य पनि बढ्दै जान्छ । महिलाको शेयर थोरै र माग दैनिक रूपमा वृद्धि हुँदा मूल्य आकाशिएको हो । योसँगै कम्पनीको वित्तीय अवस्थाले पनि शेयरमूल्य बढ्नुुमा महत्त्वपूर्ण भूमिका खेल्ने गर्छ । यसर्थ सोही कम्पनीमा लगानीकर्ता झुम्मिनुको पछाडि पनि सो कम्पनीको वित्तीय अवस्था सन्तोषजनक रहेको मान्न सकिन्छ ।

महिला लघुवित्तको नाफाको अवस्था पनि राम्रो छ । चालु आर्थिक वर्षको तेस्रो त्रैमासको वित्तीय विवरणअनुसार चैत मसान्तसम्ममा लघुवित्तले ६ करोड ४२ लाख रुपैयाँ खुद नाफा आर्जन गरेको छ । गतवर्षको तुलानमा यस वर्षको नाफा बढी हो ।

यस्तै, लघुवित्तले आफ्नो ६ करोड रुपैयाँ चुक्ता पुँजीलाई एक वर्षमा नै १० करोड रुपैयाँको बनाएको छ । साथै, जगेडा कोषमा पनि १९ करोड १८ लाख रुपैयाँ सञ्चित गरेको छ । चैत मसान्तसम्म ८६ करोड २८ लाख रुपैयाँ निक्षेप संकलन गरेको यस लघुवित्तले ३ अर्ब १८ करोड ९४ लाख रुपैयाँ कर्जा लगानी गरेको छ । चालु आर्थिक वर्षमा लघुवित्तले निक्षेप र कर्जा लगानी क्रमश: ३२ प्रतिशत र ८८ प्रतिशतले बढाएको छ ।

लघुवित्तको प्रतिशेयर आम्दानी ८५ रुपैयाँ ६६ पैसा छ । गत वर्षको चैत मशान्तसम्ममा ७६ रुपैयाँ रहेको प्रतिशेयर आम्दानी यस अवधिमा १८ रुपैयाँले बढाएको हो । उसको प्रतिशेयर नेटवर्थ २९१ रुपैयाँ छ ।

कर्जा लगानी उच्च रुपले बढाएको लघुवित्तको निष्कृय कर्जा अनुपात २ दशमलव २५ प्रतिशत छ । योबाहेक नेप्सेमा सूचीकृत भएर दोस्रो बजारमा कारोबार भइरहेका ५२ वटा लघुवित्तमध्ये अन्य १० लघुवित्तको शेयरमूल्य पनि महँगो छ ।

२ हजारमाथि छ यी १० लघुवित्तको शेयमूल्य

महिला लघुवित्तबाहेकका १० अन्य अघुवित्तको शेयर पनि महँगो छ । सानो पुँजीमा सञ्चालित यस्ता लघुवित्तले पछिल्लो समय नाफा भने ठूला कम्पनीहरूभन्दा धेरै गर्दै आएका छन् । जसमा उन्नती, स्वाभिमान, सपोर्ट, नेसनल माइक्रोफाइनान्स, मिथिला, महुली, लक्ष्मी, जनउत्थान, ग्लोबल आईएमई र फर्वार्ड लघुवित्त वित्तीय संस्था छन् ।

महिलापछि सर्वाधिक महँगो शेयरमूल्य भएको लघुवित्त हो नेसनल माइक्रोफाइनान्स वित्तीय संस्था । यसको शेयर मूल्य प्रतिकित्ता ३ हजार ६ सय ७० रुपैयाँ छ भने दोस्रो बजारमा ३१ लाख ९४ हजार ९ सय ४८ कित्ता शेयर सूचीकृत छ ।

यस्तै, दोस्रोमा जनउत्थान सामुदायिक लघुवित्त विकास बैंक पर्छ । जनउत्थानको ११ लाख ८३ हजार २ सय ४८ कित्ता शेयर ३ हजार ५ सय ५९ रुपैयाँ प्रतिकित्ताको दरले दोस्रो बजारमा किनबेच भइरहेको छ ।

योसँगै उन्नति लघुवित्त वित्तीय संस्थाको दोस्रो बजारमा १७ लाख ६१ हजार ६ सय ५७ कित्ता शेयर २ हजार ७ सय ७९ रुपैयाँ प्रतिकित्तामा कारोबार भइरहेको छ । योबाहेक स्वाभिमान लघुवित्त वित्तीय संस्थाको २ हजार ५ सय ६७ रुपैयाँ प्रतिकित्तामा किनबेच भइरहेको छ । नेप्सेमा सो कम्पनीको ९ लाख २० हजार ५ सय कित्ता सूचीकृत छ ।

सपोर्ट माइक्रोफाइनान्स वित्तीय संस्थाको भने २ हजार ४ सय ९५ रुपैयाँ, मिथिला लघुवित्त २ हजार २ सय ६५ रुपैयाँ, महुली सामुदायिक लघुवित्त वित्तीय संस्थाको २ हजार २ सय २०, लक्ष्मी लघुवित्त वित्तीय संस्थाको २ हजार ३ सय १५, जनउत्थान सामुदायिक लघुवित्त विकास बैंकको ३ हजार ५ सय ५९ रुपैयाँ, ग्लोबल आईएमई लघुवित्त वित्तीय संस्थाको २ हजार ७ सय ८८ रुपैयाँ, फर्वार्ड सामुदायिक लघुवित्त वित्तीय संस्थाको २ हजार ८ सय २७ रुपैयाँ प्रतिकित्तामा कारोबार भइरहेको छ ।

प्रकाशित मिति: शुक्रबार, जेठ २१, २०७८ १६:०८