नेपाली भाषामा झाँ-पल सार्त्रको नाटक 'अनुपस्थित तीन', अनलाइनबाटै मञ्चन [हेर्नुहोस् भिडियो]

नेपाली भाषामा झाँ-पल सार्त्रको नाटक 'अनुपस्थित तीन', अनलाइनबाटै मञ्चन [हेर्नुहोस् भिडियो]

A+ A A-

फ्रान्सेली नाटककार झाँ-पल सार्त्रको नाटक 'अनुपस्थित तीन' नेपाली भाषामा अनलाइनमार्फत मञ्चन गरिएको छ । शिल्पी थिएटरले उक्त नाटक मञ्चन गरेको हो ।

शिल्पी थिएटरको युट्युब च्यानल र फेसबुकमा मञ्चन गरिएको सो नाटकको नेपाली अनुवाद अवतार पाठकले गरेका हुन् भने घिमिरे युवराजले परिकल्पना तथा निर्देशन गरेका हुन् ।

निर्देशक घिमिरेका अनुसार कोरोना संकटको समयमा शिल्पी थिएटरले नयाँ प्रयोग गरी नाटक मञ्चन गरेको हो । हरेक कलाकारले यस नाटकमा घरको कोठालाई मञ्च बनाएका थिए ।

यसअघि नाटकलाई थिएटरमै देखाउने योजनाअनुसार सेट बनिसकेको थियो । रंगमञ्चको विकल्प खोज्ने क्रममा उनले भर्चुअल रंगमञ्च रोजेका हुन् । ३० दिनजति रिहर्सल गरे, देशमा निषेधाज्ञा सुरु भएपछि भर्चुअल्ली दर्शकबीच पुग्ने सोचे बनाएको उनले बताए ।

'इन्टरनेटलगायतका केही समस्या आए पनि यो माध्यममा नाटक गर्न रमाइलो भयो,' उनले शिलापत्रसँग भने, 'दर्शकको पनि राम्रो रिस्पोन्स आएको छ ।'

विदेशतिर यस्तो अभ्यास गर्ने गरिएको भए तापनि नेपालमा भने यो पहिलो प्रयास भएको उनको भनाइ छ । उनले शिल्पीले गरेको प्रयासलाई अन्य थियटरले पनि अंगिकार गर्न सक्ने बताए ।

कलाकार उषा, सलिल र पवित्रा । तस्वीर - शिल्पी थियटर

नाटकमा आजादको भूमिकामा सलिल सुवेदी कनिकाले निभाएका छन् भने इच्छाको भूमिकामा उषा रजक छिन् । अभिलाशाको भूमिकामा पवित्रा खड्का र मनगरेको भूमिकामा मानाहाङ लावतीले अभिनय गरेका छन् ।

त्यस्तै, नाटकमा भोकल गिरिश सुवेदी र स्मारिका फुयालले दिएका छन् भने किरण महर्जनले सारङ्गी बजाएका छन् । गितारमा किशोर महर्जन र पियानोमा सोम मानन्धरले साथ दिएका छन् ।