एमालेबाट निष्कासनमा परेका नेताहरू के गर्दैछन् ?

A+ A A-

एमालेबाट निष्कासनमा परेका माधवकुमार नेपाल, झलनाथ खनालसहितका नेताहरूले नयाँ पार्टी घोषणा गर्ने तयारीबारे सार्वजनिक रुपमा बारम्बार बोले ।

नेता नेपालले एकसाताभित्र नयाँ क्रान्तिकारी पार्टी घोषणा हुनसक्ने संकेत त गरेका छन् तर त्यसको लागि विधान, विचार र संगठनात्मक कार्यविधि लगायतका विषयमा केही प्रारम्भ नभएको नेताहरू बताउँछन् । संसद विघटनको मुद्दाको फैसलापछि मात्रै नयाँ कदम चाल्ने उनीहरूको भनाइ छ । नयाँ पार्टी घोषणापूर्व उनीहरू कार्यकर्ताहरूमाझ भर्चुअल विधिबाट राजनीतिक जागरण सञ्चालन गरिरहेका छन् ।

निष्कासनमा परेका नेता खनालले नयाँ पार्टी घोषणका लागि तल्लो तहका कार्यकर्ताहरूबाट निरन्तर दबाब आइरहेको बताएका छन् । हाल प्रतिनिधिसभा विघटनविरुद्धको संघर्षमा ध्यान केन्द्रित भएकाले यसको छिनोफानोपछि मात्रै पार्टी घोषणा हुने उनले बताएका छन् । ‘अहिले हामीले हाम्रो सम्पूर्ण ध्यान र शक्ति प्रतिनिधिसभा विघटनबिरूद्ध केन्द्रित गरेका छौँ । प्रतिगमनको पराजय गराउनैपर्ने आजको आवश्यकता छ । राजनीतिक र कानुनी लडाइँमार्फत प्रतिगमन परास्तपछि हामी नयाँ कदम अघि बढाउँछौँ,’ उनले भने ।

हाल तल्लो तहका कार्यकर्ताहरूलाई पनि यस समूहले संसद विघटनविरुद्ध व्यापक जनचेतना फैलाउन भनेको छ । निष्कासनमा परेका नेता भीम रावलले भने तत्कालै नयाँ पार्टी घोषणाको तयारी नरहेको बताए । कार्यकर्ताबाट दबाबका बाबजुद पनि अहिलेको ध्यान संसद विघटनविरुद्धकै रणनीतिमा केन्द्रित रहेको उनको भनाइ छ ।

‘कार्यकर्ताहरूको प्रेसर त अत्याधिक नै छ । तथापी हामीले अहिले हाम्रो सम्पूर्ण ध्यान संसद विघटनविरुद्ध रहेकाले केही समय लाग्ने जानकारी गराएका छौँ । प्रधानमन्त्री केपी ओलीको स्वेच्छाचारी गतिविधिले हद नाघ्दा तल्लो तहबाट अत्याधिक दबाब छ,’ उनले भने ।

नयाँ पार्टी घोषणाका लागि विधान, विचार, संगठनको ढाँचा लगायत जरुरी भए पनि त्यस समूहले हाल यसतर्फ कुनै गतिविधि अघि सारेको छैन । ‘आवश्यकतामा नयाँ पार्टी गठन गर्ने पहिलेदेखि नै भनिएको हो । त्यसका लागि विधान बनाउने कामको सुरुवात भएको जानकारी मलाई छैन,’ रावलले भने ।

यस समूहले हाल कार्यकर्ताहरूमाझ राजनीतिक जागरणको काम अघि बढाइरहेको छ । भर्चुअल विधिमार्फत आफ्नो समूहका केन्द्रीय कमिटी, प्रदेश कमिटी र जनसंगठन तथा भ्रातृ संगठनहरूमाझ जागरणका काम सकेको निष्कासनमा परेकी नेता कल्याणी खड्काले बताइन् । एमालेभित्रै स्पेस पाएको अवस्थामा नयाँ पार्टी गठन गर्नु जायज नहुने सल्लाह कतिपय कार्यकर्ताहरूले जागरणका क्रममा दिएको उनले बताइन् ।

‘कार्यकर्ताहरूले निषेधको राजनीतिको शृंखला अन्त्य नभएमा मात्रै नयाँ विकल्पमा जान सुझाएका छन् । हामी पनि स्पेस पाएको अवस्थामा नयाँ पार्टी गठन गर्ने मनस्थितिमा छैनौँ । एमालेभित्रै रहने वातावरण हालसम्म नदेखिएकाले नयाँ पार्टी घोषणाको विकल्प पनि छैन । संसद विघटनको मुद्दा किनारा लागेपछि हामी निर्णयमा पुग्छौँ,’ उनले भनिन् ।

यस समूहभित्र रहेका घनश्याम भुसाल, योगेश भट्टराई र गोकर्ण विष्ट एकताको पक्षमै लबिङ गरिरहेका छन् । नेता विष्टलाई माधवकुमार नेपालले एक साताभित्र एकताको विषय टुंगो लगाउन निर्देशन दिएका छन् । आफू संस्थापक रहेको एमालेको माया अझै रहे पनि अध्यक्ष ओलीको रवैयाका कारण एकताको सम्भावना नरहेको उनको भनाइ थियो । एकताको पक्षमा एक साताभित्र निर्णय नभए नयाँ क्रान्तिकारी पार्टी गठन गर्दै कम्युनिस्टहरूलाई गोलबद्ध गर्ने अभियानमा आफू लाग्ने जानकारी उनले नेता विष्टलाई गराएका छन् ।

अनेरास्वियुको आफू पक्षका केन्द्रिय कमिटी बैठकलाई आइतबार भर्चुअल सम्बोधन गर्दै नेता नेपालले भनेका थिए-‘म यो पार्टीको संस्थापक मध्येको एक हुँ । एमालेको मलाई पनि माया छ । संस्थापक मध्येको म र एकताका लागि गठित कार्यदलको वार्ता टोलीका संयोजक भीम रावललाई निष्कासन गरेपछि ओली एकताको पक्षमा रहेनन् । एकता जोगाउने हो भने एक साताभित्र परिणामउन्मुख प्रयास गर्नुस् । हामी नयाँ क्रान्तिकारी पार्टी गठनको अन्तिम चरणमा छौँ ।’

यस समूहका नेता रावल भने एकताको सम्भावना टरेको बताउँछन् । ‘अहिलेको परिस्थितिमा पार्टी एकता कुनै हालतमा पनि संभव छैन । नयाँ परिवेशनमा नयाँ विकल्प दिन जरुरी छ,’ उनी भन्छन् ।

१० जेठमा एमालेले माधव नेपालसहित झलनाथ खनाल, भीम रावल, मुकुन्द न्यौपाने, निरादेवी जैरु, रामकुमारी झाँक्री, सरला यादव, पुष्पाकुमारी कर्ण, लक्ष्मीकुमारी चौधरी, कल्याणी खड्का र कलिला खानलाई पार्टीको साधारण सदस्यसमेत नरहने गरी पार्टीबाट निष्कासन गरेको थियो ।

नेपाल-खनाल समूहले नयाँ पार्टी घोषणाको तयारी गरिरहेका बेला निर्वाचन आयोगमा गत साता नेपाल पक्षका एक नेताले एकीकृत नेकपा नामको दल दर्ताका लागि निवेदन दिइसकेका छन् । माधव नेपालले भनेझैँ नयाँ क्रान्तिकारी पार्टीको निरन्तरता त्यसैले पाउँछ वा नयाँ नाममा दर्ता हुन्छ अझै प्रतिक्षीत छ ।

प्रकाशित मिति: सोमबार, जेठ १७, २०७८ १८:२७