‘कोरोना संक्रमणको दर घटेको होइन, ल्याबहरूले परीक्षणको विवरण नपठाउँदा संख्यामा कमी’

A+ A A-

देशका विभिन्न जिल्लाका अस्पताल र ल्याबले पीसीआर परीक्षणको विवरण नपठाएकाले कोरोना संक्रमितको संख्यामा कमी आएको पाइएको छ ।

आइतबार मन्त्रालयको तथ्यांकमा संख्यामा कमी देखिनेबित्तिकै धेरैले संक्रमण घटेको आकलन गरे । तर, वास्तवमा संक्रमणको दर अझै घटेको छैन । आइतबार १२ हजार ७ सय ७० जनाको परीक्षण गर्दा ४ हजार ३ सय ६९ जनामा कोरोना पुष्टि भएको थियो । अघिल्लो दिनको तुलनामा पनि संक्रमितको संख्या कम थियो । शनिबार १४ हजार ७ सय ५२ जनाको परीक्षण गर्दा ४ हजार ४ सय ८७ जनामा कोरोना पुष्टि भएको थियो ।

त्यसो त स्वास्थ्य मन्त्रालयको नियमित पत्रकार सम्मेलनमा डा. विराज कर्मचार्यले अघिल्लो साताको तुलानामा संक्रमितको संख्यामा कमी आएको बताएका थिए । ‘१७ दशमलव ५ प्रतिशतले संक्रमितको संख्यामा कमी आएको छ । प्रदेश अनुसार भने फरक-फरक छ’, उनले भने, ‘अहिले देखिएको संख्याभन्दा धेरै गुणा बढी समुदायमा छन् भन्ने आकलन गर्न सकिन्छ ।’

संक्रमणको दर घटेको होइन

स्वास्थ्य मन्त्रालयले पनि संक्रमणको दर नघटेको स्पष्ट पारेको छ । मन्त्रालयका प्रवक्ता डा. कृष्ण पौडेलले शिलापत्रसँग भने, ‘हिजोको तथ्यांकले पनि संक्रमण दर ४० प्रतिशत नै देखाउँछ । प्रतिशतको हिसाबले संक्रमण दर घटेको छैन । संक्रमितको संख्यामा कमी देखिएको हो ।’

संक्रमणदर ४० प्रतिशत हुनु भनेको उच्च हो । ५ प्रतिशतमा झरेमा मात्र न्यून भएको भन्न सकिने डा. कर्मचार्य बताउँछन् ।

किन कम देखियो परीक्षण र संख्या ?

विभिन्न ल्याब र अस्पतालले परीक्षणको विवरण नपठाएकाले संख्यामा कमी देखिएको प्रवक्ता डा. पौडलले बताए ।

‘धेरै अस्पताल र ल्याबको रिपोर्टिङ भएको छैन । विवरण नआएकाले संख्यामा कमी देखिएको हो’, उनले भने, ‘उताबाट नआएकाले इन्ट्री नभएको हो । किन विवरण नआएको हो यो विषयमा हामीले अध्ययन गरिरहेका छौँ ।’

पछिल्ला दिनमा केही अस्पताल र ल्याबको विवरण शून्य देखिन्छ ।

कुन–कुन अस्पताल र ल्याबबाट आएन विवरण ?

आइतबारको तथ्यांकमा अस्पताल र ल्याब गरेर १८ वटा प्रयोगशालाबाट विवरण आएको छैन ।
–धनकुटा अस्पताल
–नेपाल मेडिकल कलेज शिक्षण अस्पताल
–कलैया अस्पताल
–मलंगवा अस्पताल
–भरतपुर अस्पताल कोभिड-१९ प्रयोगशाला
–प्रादेशिक जनस्वास्थ्य प्रयोगशाला धुलिखेल
–धुलिखेल अस्पताल
–सेन्ट्रल डायगोनिस्टक ल्याबरोटरी एन्ड रिसर्च सेन्टर
–इन्टरपिड डायगोनिस्टक सेन्टर
–कान्तिपुर ल्याब
–अल्का ल्याब
–भक्तपुर अस्पताल ल्याब
–शिद्धि ल्याब
–चरिकोट ल्याब
–पोखरा स्वास्थ्य विज्ञान प्रतिष्ठान
–लाइफ केयर ल्याब, पोखरा
–युनिभर्सले कलेज अफ मेडिकल साइन्स
–डडेल्धुरा अस्पताल प्रयोगशला

कन्ट्याक्ट ट्रेसिङ नहुँदा परीक्षणमा कमी

सरकारले कन्ट्याक्ट ट्रेसिङ नगरेकाले परीक्षणको दायरा बढ्न नसकेको विज्ञहरूको बुझाइ छ । पहिलो लहरमा केही समय कन्ट्याक्ट ट्रेसिङ भएको थियो तर दोस्रो लहरमा आइपुग्दा कन्ट्याक्ट ट्रेसिङ शून्यमा झरेको छ ।

‘पहिला पनि सिस्टमेटिक तरिकाले परीक्षण भएको होइन । परीक्षणका लागि बिरामी आफैँ आएका हुन्’, सरुवा रोग विशेषज्ञ डा. शेरबहादुर पुन भन्छन्, ‘दोस्रो लहरमा पनि परीक्षणका लागि आफैँ आएका हुन् । कन्ट्याक्ट ट्रेसिङ भएको छैन ।’

अहिले जति संख्या देखिएको छ त्योभन्दा बढी संक्रमित रहेको उनी बताउँछन् । ‘मानिस सुरुदेखि नै परीक्षण गर्न आएका छैनन् । समुदायमा धेरै संक्रमण छ । संक्रमणको दरमा अहिले नै कमी आयो भन्ने स्थिति छैन’, उनी भन्छन्, ‘अस्पतालमा परीक्षण गर्न आउने कमी भएको छ । तीव्र गतिमा फैलिएको अवस्थामा जस्तो भागाभाग स्थिति अहिले छैन ।’

गाउँ-गाउँमा संक्रमण फैलिए पनि परीक्षणको दायरामा संक्रमित आउन नसकेको उनको ठम्याइ छ । ‘धेरै समस्या भए मात्र परीक्षण गर्न आउने गरेको पाइन्छ । गाउँ-गाउँका मानिस परीक्षणको दायरामा आउन गाह्रो छ’, उनी भन्छन् ।

यस्तो छ १५ दिनको कोरोना संक्रमितको संख्या