अक्सिमिटरमा व्यापारीको लुट धन्दा : ८ सयमा किन्छन्, ६ हजारमा बेच्छन्

A+ A A-

बानेश्वरकी स्मिता खनालले आइतबार ओके दाम नामक अनलाइन डेलिभरी संस्थाबाट ६ हजार रुपैयाँमा पल्स अक्सिमिटर किनिन् । बजारमा ८ सय रुपैयाँसम्ममा अक्सिमिटर पाइन्छ भन्ने थाहा हुँदाहुँदै पनि कतै नपाएपछि महँगो मूल्य तिर्न बाध्य बनिन् ।

कोरोना संक्रमित आमालाई घरमै राखेर हेरचाह गरिरहेकी स्मिता भन्छिन्, 'आइतबार दिउँसोतिर आमाले सास फेर्न गाह्रो भयो भन्नुभयो । अक्सिजन लेबल चेक गर्न अक्सिमिटर किन्न मेडिकल जाँदा नपाएपछि ओके दामबाट ६ हजार रुपैयाँमा किनेँ ।’

उनी आफू ठगिएको थाहा पाए पनि कतै नपाएपछि उनीहरूले भनेकी मूल्यमा किन्न बाध्य भइन् ।

यता भक्तपुरका रमेश शाक्य पनि अस्पतालपरिसरकै मेडिकल पसलबाट ठगिएको गुनासो गर्छन् । गत साता संक्रमित छोरीलाई टिचिङ अस्पतालमा भर्ना गरेका उनी अस्पताल परिसरमा नै ३ हजार ५ सय रुपैयाँमा अक्सिमिटर किन्न बाध्य भए ।

‘त्यो दिन छोरीलाई सास फेर्न गाह्रो भयो भनेर डाक्टरले अक्सिजन जोडे । त्यसपछि अक्सिजन जाँच्ने मेसिन ल्याउनू भन्नुभयो,’ उनी भन्छन्, ‘दुईवटा पसलमा नपाएपछि अस्पतालभित्रै एउटा पसले भाइले दिनुभयो । सानो बट्टाजस्तै हुँदो रहेछ । पैसा भने ३ हजार । आत्तिएको बेला कसले बार्गेनिङ गर्ने ? जति माग्यो, उति दिएर लिएँ ।’

यी दुई त प्रतिनिधिपात्र मात्र हुन् । अहिले हरेक दिनजसो वाणिज्य, आपूर्ति तथा उपभोक्ता संरक्षण विभागको गुनासो शाखामा औषधिजन्य वस्तुमा ठगिएको गुनासाका चाङ नै लाग्ने गरेका छन् ।

जसमा अक्सिमिटरबाट ठगिनेको संख्या बढिरहेको छ । निषेधाज्ञा सुरु भएसँगै अभाव भएको अक्सिमिटर अहिले छ्याप्छ्याप्ती पाइन्छन् । तर, यसरी पाइएको अक्सिमिटरको मूल्यमा भने एकरूपता छैन । एउटा पल्स अक्सिमिटर अनलाइन डेलिभरी संस्था सस्तोडिलले ७ सय ७५ रुपैयाँदेखि २५ सय ४९ रुपैयाँसम्ममा बेच्दै आएको छ । बजारको मूल्य ८ सय रुपैयाँ भए पनि सस्तो डिलले ६० प्रतिशत छुट अफर दिएर प्रतिगोटा २५ सय रुपैयाँसम्ममा बेच्दै आएको हो ।

यस्तै, दराजमा ७ सय ९९ देखि ३ हजार ९ सय ५० रुपैयाँ पर्छ । अनलाइन स्टोर अन्नपूर्ण फार्मेसी डटकममा पनि न्यूनतम ३ हजार ६ सय रुपैयाँदेखि माथिका अक्सिमिटर पाइन्छन् । ई–फार्मेसी डटकमले पनि अक्सिमिटर पनि ३ हजार ७ सय २० रुपैयाँमा बिक्री गर्दै आएको छ ।

अहिले ई–कमर्समा मात्र नभएर वीर अस्पताल, टिचिङ, ह्याम्सलगायतका अस्पतालवरिपरिका मेडिकल व्यवसायीले पनि फरकफरक मूल्यमा अक्सिमिटर बिक्री गर्दै आएका छन् ।

त्रिपुरेश्वरमा रहेको स्वस्तिक सर्जिकल हाउसमा ८ सयदेखि ३ हजारसम्मका अक्सिमिटर पाइन्छन् । आफूहरूबाट ८ सयमा किनेको अक्सिमिटर ३ हजारसम्ममा र ३ हजारमा किनेको अक्सिमिटर ६ हजारसम्ममा बेच्ने गरेको सर्जिकल व्यवसायीको भनाइ छ ।

औषधि व्यवसायी महासंघका अध्यक्ष मृगेन्द्र श्रेष्ठले चाइनाबाट आएको अक्सिमिटरले गर्दा अहिले गुणस्तरीय अक्सिमिटर पाउन छोडेको बताउँछन् । उनी भन्छन्, ‘चाइनाबाट छ्याप्छ्याप्ती आएका छन्, त्यसैले ब्राण्डअनुसार मूल्यमा फरक आएको हो ।’

खरिद मूल्यमा एकरूपता नहुँदा समस्या भएको अध्यक्ष श्रेष्ठको भनाइ छ ।

यता सर्जिकल व्यवसायी भने आफूहरूबाट किनेको सर्जिकल सामानमा २० प्रतिशतसम्म मूल्य बढाएर अरु व्यवसायीले बेच्ने गरेको बताउँदै आएका छन् ।

आकृति मेडिकल सेन्टरका सञ्चालक मेघराज पाण्डे भने केही ठूला व्यवसायीले कालोबजारी गर्दा अक्सिमिटरको कृत्रिम अभाव भएको आरोप लगाउँछन् । ‘हामीले किन्ने होलसेलमा नै महँगो छ,' उनी भन्छन्, ‘काम एउटै भए पनि ब्राण्डअनुसार मूल्यमा फरक आएको हो ।’

उपभोक्ताकर्मी ज्योति बानियाँ ठूला औषधि व्यवसायीहरूले कृत्रिम अभाव सिर्जना गर्दा अक्सिमिटर सहजै नपाइएको गुनासो गर्छन् ।

अक्सिमिटरमा कालोबजारी मात्रै होइन, अहिले बजारमा नक्कली अक्सिमिटरसमेत पाइन थालेको छ ।

केही दिनअघि मात्रै प्रहरीले नक्कली अक्सिमिटर बेचेको आरोपमा विराटनगर र सिरहाबाट दुई जना फार्मेसी सञ्चालकलाई पक्राउ गरेको थियो । काठमाडौंमा पनि सर्जिकल पसल, मेडिकल स्टोर र अनलाइन स्टोरहरूबाट ठगिएको गुनासो बढेको छ ।

कोरोना संक्रमण भएपश्चात् अक्सिजन लेबल परीक्षण गरिरहनुपर्ने भएपछि एकाएक अक्सिमिटरको माग बढ्दा नक्कली अक्सिमिटरको बिगबिगी बढेको होे ।

विभागले औषधि र औषधिजन्य वस्तुमा उपभोक्ताको गुनासो बढेपछि अनुगमनलाई तीव्रता दिएको बताएको छ । यद्यपि विभागको तथ्यांकमा दिन बिराएर तीनदेखि चारवटा स्थानमा मात्रै अनुगमन भएको देखिन्छ ।

प्रकाशित मिति: सोमबार, जेठ १७, २०७८ १९:२०