संसदमा गण्डकी सरकारले बोल्यो झुट, भन्यो- अस्पतालमा अक्सिजन नपाएर कसैको मृत्यु भएको छैन

संसदमा गण्डकी सरकारले बोल्यो झुट, भन्यो- अस्पतालमा अक्सिजन नपाएर कसैको मृत्यु भएको छैन

A+ A A-

गण्डकी प्रदेश सरकारले अक्सिजन अभावले पश्चिमाञ्चल क्षेत्रीय अस्पतालमा मृत्यु भएको विषय झुटो भएको दाबी गरेको छ ।

आइतबार प्रदेशसभाको बर्खे अधिवेशनको पहिलो बैठकमा मुख्यमन्त्री एवं स्वास्थ्यमन्त्री पृथ्वीसुब्बा गुरुङका तर्फबाट जवाफ दिँदै सरकारका प्रवक्ता रामशरण बस्नेतले अक्सिजन अभावमा पश्चिमाञ्चल क्षेत्रीय अस्पतालमा कसैको मृत्यु नभएको झुटो दाबी गरे ।

अक्सिजन अभावमा कसैको पनि मृत्यु नभएको निचोडमा आफूहरू पुगेको बस्नेतको भनाइ छ । ‘कमजोरी भएको भए छानविन गर्दैछौँ । होइन भन्ने निचोडमा पुगिसकेका छौँ । सत्य कुरा पत्ता नलगाई माफी माग्नुपर्छ भन्न हुँदैन,’ प्रवक्ता बस्नेतले भने ।

गत बिहीबार राति क्षेत्रीय अस्पतालमा आधा घण्टा अक्सिजन आपूर्ति बन्द भएको थियो । त्यही कारण तीन जना संक्रमितले ज्यान गुमाए । शुक्रबार बिहानसम्म आठ जना संक्रमितको पश्चिमाञ्चल अस्पतालमा मृत्यु भयो ।

आठै संक्रमितको अक्सिजन नपाएर मृत्यु नभएको अस्पतालले शुक्रबार विज्ञप्तिमार्फत जानकारी गराएको छ । अस्पतालका अनुसार गम्भीर संक्रमितको पनि सो रात उपचारकै क्रममा ज्यान गएको थियो ।

अस्पतालका एक डाक्टर तीन जनाको मृत्यु हाइफ्लो अक्सिजन नपाएर मृत्यु भएको बताउँछन् । तर, प्रदेश सरकारले भने आवश्यकता अनुसार अक्सिजन नपाएको गम्भीर विषयलाई मिथ्या खबर भन्दै हलुका टिप्पणी गरेको छ ।

आइतबारको संसद बैठकमा प्रतिपक्षी दलका सांसदहरूले मुख्यमन्त्रीले यो घटनामा माफी माग्नुपर्ने र छानविन हुनुपर्ने माग गरेका थिए । तर, प्रदेश सरकारका प्रवक्ता यसलाई मिथ्या खबर भन्दै यसले जनतामा भ्रम छरेको दाबी गरे ।

‘मिथ्या कुरा बोल्यौँ भने जनता सडकमा आए भने ठूलो क्षति हुनसक्छ । सत्यतथ्य बोल्नुपर्छ,’ उनले भने, ‘सदनमा आएर हामीले जे पाए त्यही बोल्यौँ भने, भोलि केही घटना घट्यो भने जिम्मेवारी कसले लिने ? त्योबारेमा पनि सोच्नुपर्‍यो ।’

उनले प्रदेश सरकार सांसदहरूकै सल्लाह सुझाव अनुसार कोभिड नियन्त्रणमा लागेको बताए । ‘धेरै मान्छे नमोरुन सरकारले त्यो पहल गरिरहेको छ । माननीयज्यूहरूको सल्लाह सुझावलाई लिएर उपकरण ल्यायौं,’ बस्नेतले भने, ‘तपाईंहरूले नै नभनेको भए आज ८-९ वटा अस्पतालमा अक्सिजन प्लान्ट बन्दैनथ्यो होला ।’

प्रकाशित मिति: आइतबार, जेठ १६, २०७८ १७:०२