प्रदेश १ का उद्योगी-व्यवसायी भन्छन्, 'बजेट उत्साहजनक, तर कार्यान्वयनमा शंका छ'

प्रदेश १ का उद्योगी-व्यवसायी भन्छन्, 'बजेट उत्साहजनक, तर कार्यान्वयनमा शंका छ'

A+ A A-

सरकारले शनिबार अध्यादेशमार्फत आगामी आर्थिक वर्षक २०७८-७९ का लागि ल्याएको बजेट उत्साहजनक भएपनि कार्यान्वयनमा शंका रहेको पूर्वका उद्योगी व्यवसायीहरूले प्रतिक्रिया दिएका छन् ।

विश्व नै कोरोना महामारीसँग जुधिरहेका बेला सरकारले कोरोना रोकथाम तथा नियन्त्रणलाई प्रथामिकतामा राखेर ल्याएको बजेट सकारात्मक भए पनि कार्यान्वयन हुनेमा भने उनीहरूले आशंका व्यक्त गरेका छन् । अर्थमन्त्री विष्णु पौडेलले शनिबार १६ खर्ब ४७ अर्ब ५७ करोडको बजेट ल्याएका थिए ।

उद्योगी-व्यवसायी भन्छन् : कार्यान्वयन नभए सरकार आलोचनाको पात्र बन्नेछ

नेपाल उद्योग परिसंघ प्रदेश १ का अध्यक्ष अध्यक्ष भीम घिमिरेले सरकारले प्रस्तुत गरेको बजेटले धेरै विषयवस्तुलाई समेटेको बताएका छन् । विगतका वर्षमा भन्दा यो बजेटमा निजी क्षेत्रका धेरै माग समेटिएको बताउँदै उनले कार्यान्वयन हुनेमा भने आशंका व्यक्त गरे ।

‘विगतमा भन्दा यो पटक निजी क्षेत्रका धेरै माग सम्बोधन गरिएकाे छ । धेरै कुरा समेट्ने प्रयास भएको छ । तर, कार्यान्वनय पक्ष कस्तो हुन्छ, हामी त्यसलाई हेर्नुपर्ने हुन्छ,’ उनले शिलापत्रसँग भने, ‘कार्यान्वयनमा ध्यान दिएर व्यवहारमा उतार्न सके सरकार धन्यवादको पात्र हुन्छ । नत्र आलोचनाको पात्र बन्नुपर्नेछ ।’

त्यस्तै नेपाल घरेलु तथा साना उद्योग महासंघ मोरङका उपाध्यक्ष चेतन निरौलाले आफूहरूले उठाउँदै आएका सम्पूर्ण विषयवस्तु बजेटमा समेटिएको बताए । उनले उद्योग, कलकारखाना बन्द रहेको समयमा विद्युतको डिमाण्ड शुल्क, घरभाडा, राजस्व छुटलगायतका माग सम्बोधन भएकाले बजेट सकारात्कम रहेको बताए ।

‘हामी उद्योगी व्यवसायीका लागि मात्र नभएर विपन्न वर्गदेखि ठूला उद्योगी व्यवसायी, पर्यटन उद्योग, शिक्षित युवा, ज्येष्ठ नागरिक, पत्रकार सबै क्षेत्रलाई समेटेको एकदमै राम्रो बजेट छ,’ उनले भने ।

विराट व्यापार संघका अध्यक्ष सुजन थापाले सरकारले ल्याएको बजेटमा उद्योगी व्यवसायीले उठाउँदै आएका अधिकांश माग सम्बोधन भएको बताए । उनले बजेटमा साना उद्योगी-व्यवसायीका समस्यालाई पनि सम्बोधन गरिएको बताए ।

‘बजेटमा हामी उद्योगी व्यवसायीले उठाएका धेरै कुरा समेटिएको महसुस गरेका छौँ । कृषि, स्वास्थ्य, शिक्षालगायत सबै क्षेत्रलाई राम्रो बजेट छुट्याएको देखियो । साना व्यवसायीहरूलाई पनि सम्बोधन भएको महसुस गरेका छौँ,’ उनले भने, ‘जहिल्यै बजेट नीति तथा कार्यक्रम आउँछ तर कार्यान्वयन पक्ष फितलो हुन्छ । यसपालिको बजेट राम्रो र ऐतिहासिक भएपनि हामीलाई कार्यान्वयनमै आशंका छ ।’

मोरङ व्यापार संघका अध्यक्ष प्रकाश मुण्दडाले सरकाले बजेटमा चौतर्फी ध्यान दिएको बताए । उनले स्वास्थ्य क्षेत्रलाई सबैभन्दा बढी प्राथमिकतामा राखिएको बताए । अध्यक्ष मुण्दडाले आफूहरूले उठाउँदै आएका अधिकांश विषयवस्तुलाई सरकारले बजेटमार्फत सम्बोधन गरेको बताए । यद्यपि उनले बजेट कार्यान्वयनमा भने आशंका व्यक्त गरे ।

‘समग्रमा बजेट राम्रो छ,’ उनले भने, ‘अबको दुई महिनाभित्र भ्याक्सिनेसनको काम गर्न सक्यौँ भने लक्ष्य पूरा गर्न सकिन्छ भन्ने मलाई लाग्छ । कार्यान्वयन पक्ष राम्रो भए १० खर्बको राजश्व उठाउने लक्ष्य पनि ठूलो होइन ।’

प्रकाशित मिति: आइतबार, जेठ १६, २०७८ १४:३२